Ayang
13
Ngo taniːloglaː tayéng-yaːmelok gomukki agom ludaggom, ngokké ayangé kamaːmílo, ngo mannaduːnam pítan-luːpikomanggom tubladuːnam luːpi kísaːmumko. 2 Ngokké lungor-lunan amané dunggom, odokké kinpímaːnam appíngém kinnanélaː appíngém méːjoːnanné kagom, odokké ngokké adiém éngunmonan méngkésunamé kagom, émpigeːla ngokké ayangé kamaːmílo, ngo okosinmang.a 3 Ngok kanam attar appíːdém opanném bipagdaggom odokké ngok amírsém umíːlo ukkosubigom, émpigeːla ngokké ayangé kamaːmílo, ngo okkomsin paːmaːyé.4 Ayangé tejidag, ayangé asin-aidag. Ayangé némang, ayangé pugdasumang, ayangé bottésumang. 5 Ayangé torpé-lumang, ayangé aíké ainamém magomang, bagémpé aglíːmang, odokké germurém méːpaːla duːmang. 6 Ayangé aimaːnamno méːpomang, émpigeːla arolo méːpodag. 7 Ayangé loːdísém duːribidag, loːdísém méngkésudag, loːdísém akala duːdag, loːdísém oijosudag.
8 Lungoréla angun-agompé lunamé odokké anguruːpé kinnamdé agerkakumaːyé. Émpigeːla ayaːdé loːdí-longkípé duːyaryé. 9 Kapéné ngolu attungongko kindag odokké ngolu lungorém attungoːngko ludag; 10 émpigeːla édílo Jisubí gíyékuji, píːramnamdé yogyé.
11 Édílo ngo koːkaːla dungngan, ngo koːkaːngémpé ludagai, ngo koːkaːngémpé méːdagai, ngo koːkangémpé kindagai. Édílo ngo bottékaːji odo ngok koːkang séuom mépagamto. 12 Ngolu suːpag okkom kaːduːji édé arsikolo kaːnam pabukparené moimangkonémpé idag, émpigeːla longéko ngolu dagríksula kaːyé. Suːpag ngok kinnamdé attungngoko; odo ngo Ruːnébí taniyém kínbínna kinnamkísapé kinyé.
13 Méːtínsunam, akaːla-duːnam odokké ayang, séː baumsé suːpag duːyaryéː émpigeːla séː baumsok araːdo ayaːdé bottépagyaːnédé.