Angu-Gomugélaː Lungor
14
Ayangké lambédok gímínnang odokké yaloké amankídíːdém, anguruːpé lungor-lunan amandém, paːpé méːlang. 2 Kapéné séːkoi angun-gomuglo ludoji, bí taniːyém lubimang émpigeːla Ruːnémé lubidag. Aro aropé séːkosin bík lunamdém tatkinmang; bí bík yaloki taniːlok kinpílaːmaːnammém ludag. 3 Émpigeːla séːkoi lungor-ludon, bulu kínggíːdopé, lusanam agomém paːdopélaː luyinsunamém paːdopé, bí taniːyém lubidag. 4 Séːkobí angun gomukpé ludoji bí aíém kínggíːsumodag, émpigeːla séːkobí lungorém-ludoji bí kumgodém kínggiːmodag. 5 Nolukkolok appíngé angun gomukpé lutoka émna ngo méːdag, émpigeːla ngo nolum lungorémpag lutoka émna méːyaːdag. Édíloːpé lungor-lunamdém lusonsubimaji, lungor-lunédé angun gomukpé lunédémyang bottéyaːdag, odokké lusonsubimílo méngkésunékídíːdé kínggíyé. 6 Ajonkídínga, ngo suːpag nolukkodoːpé gíla angun gomukpé lumílo, édé nolukképé oko ainamkopé iyen, édíloːpé ngo nolukkoloːpé oːkai léngkanamkomanggom kinnamkomanggom lungor-lunamkomanggom luyírnamko bombimaːmílo?7 Émmum mannamésin pempémanggom gunggangém mandodo, alam kadopé manpaːyé, émmamílo séːkosin odok béːnamdém tatkinmaːyé. 8 Odokké tuːtogdé tong émna béːmaːmílo, gokkumsudung émna kinna séːko mimagmokapé moninsuyén? 9 Édémíːpé nolukkoloːsin. Édíloːpé nolu noluk nappaːdokki kinnépaːné agomém lumaːyéji, séːkai akoné nolu okkom luduːji édém kapé kinyén? Noluk lunamdé ésarro lunamémpé iyé. 10 Moːpíso bangkí bangkíné gomukpé ludag, odok tayélo méːmo kamang, émgom lunam agom appíːdém tatkindag. 11 Émpigeːla ngok lunam agomdok légíːdém tatkinmaːmílo, ngo édé agom-lunédok kinmaːnam taniːpé iyé odokké agom-luné taniːdéːsin ngokképé kinmaːnam taniːko. 12 Édémíːpé nolukkoloːsin idag, nolusin yalolok amankídíːdém paːpé méːbomsula dung, kumgom kínggíːmoné amandém malang.
13 Odok légaːpé séːkobí angun gomukpé ludoji, bí okkom luduːji édém lusonsubilaːnam légaːpé kumnang. 14 Kapéné ngo angun gomukpé kummílo, ngok yalodé kumdag, émpigeːla ngo okkom luduji édém ngok asinsé kinmaːyé. 15 Émpém ngo okkom iyyan? Ngo ngok yaloki kumpé, ngok asinkisin kumpé; ngo ngok yaloki niːtom gokpé, émpigeːla ngo ngok asinkisin niːtomdém goktéːyé. 16 Nolu noluk yaloki Ruːnémé luyitsudumílo, noluk araːdo séːko tatkinmaːji kapé bí noluk aipai bidodo "Amen" émmínyén, kapéné nolu okko émna luton édém bí tatkinéitoma?a 17 Nolu píːnamkopé aipai bilaːdo, émpigeːla nok lunamdém tadla duːné taniːdém no kinggímotomang.
18 Ngo nolumyam bojéyangko angun-gomukpé lunam légangé Ruːnémé aipai bidung. 19 Émpigeːla kumgolo akoném luyírnam légaːpé líːyíng-íyíngko angun agomém lutaying tatkinnam agom bangko lupé émna méːdag.
20 Ajonkídínga, koːkaːngémpé méːnamém mépaktok. Aimaːnélo koːkaːpé ilang, émpigeːla noluk méːlotsaglodlo kinnépé ilang.b 21 Luroːdo édém adla léːbitagː
Ruːtumbí ludung, "Kinmaːnam taniːlok gomukkilaː
tatkinmaːnam taniːlok agomki
ngo séː taniːkídíːsém luyé,
émpigeːla odosin séː taniːkídíːsé ngok lunam agomdém tadmaːyé."c
22 Édémpila, angun gomugdé méngkésumaːnélokképé kanggotko, méngkésunékídíːdok légaːpémang; émgom, lungor-lunamdé méngkésunélokképé, méngkésumaːnélokképémang.
23 Édémpila méngkésuné appíːdé lékopé gíkumsugeːla appíngé angun gomukpé lumílo, odokké méngkésuman taniːékké odoːpé gíamílo, émmangom ake taniyé séːkobulu tatkinmaːji, nolu simatkang émna bulu nolum lumayélang? 24 Émpigeːla édílo nolu appíngé lungor-lula duːji odo méngkésumaːnékomanggom séːkai akoné séːko tatkinmaːji gíamílo, noluk appíngké lunamki, bí imurnékolaː bím appíngé kébangém baːyé émna bí kinsuyé. 25 Odokké bík asinbok méːla duːnamdémsin kinyé; édémpila bí lébíːtungala Ruːnémé sémpé lula kumyé, "Noluk lédílo Ruːnébí aroruːpé dungǃ"
Kumnam
26 Ajonkídínga, émpémílo ngolu okko émna luyyan? Édílo nolu gíkumsudoji, appíngké kumnam-niːtomkomanggom, luyírnamkomanggom, léngkanamkomaggom, angun gomukomanggom lusonsubinamko kado. Édé appíːdém kumgodém kínggíːmonam légaːpé ilang. 27 Séːkaibí angun gomukpé luladuːmílo, annyikomaggom aumkonépag lupé lagidag, édésin akondok lédupé akondé, odokké séːkai akoné okkom luduːji lusarbipénammé. 28 Odo lusonsubiné kamamílo, agom-lunédé kumgodo asoːpé duːpé lagidag odokké bí aíém Ruːnémé lubipé lagidag. 29 Annyikomanggom aumko lungor-lunné lupé lagidag, odokké bulu okkom luduːji édém akonkídíːdé ankaːpé lagidag. 30 Odok tedla duːnékídíːdok séːkkaikolo léngkannamko gímílo, lupoːnédé asoːpé dungépé lagidag. 31 Kapéné appíngém luyírnamémnaː lusang agom paːnam légaːpé nolu appíngéi ako akopé lungorém lulaːdag. 32 Lungor-lunékídíːdok yalodé lungor-lunékídíːdok kéíglo duːpaːyé. 33 Kapéné Ruːnébí ibísilíné Ruːnékomang émpigeːla ansíngém biné Ruːnéko.
Kapé takam kumgokídíːdok angunné taniːkídíːdé, 34 kumgokídíːdo mimékídíːdé asoːpé duːpé lagidag. Kapé Luro:do lutuːji, bulum agomém lumomaːdopé, émpigeːla kéíksupé lagidag.d 35 Bulu oːkaiko kinnímílo, bulu buluk milbongkídíːdém okumdo taupé lagidag; kapéné mimékolok kumgodo lunamdé anyisukannam agerko.
36 Ruːnéké gomugdé nolukkolokkéi lenkan? Émmamílo nolloi Ruːnéké gomugdém paːné taniːkídíːdén? 37 Séːkaibí aíém lungor-lunékomanggom yalolok aman kanéko émna méːsumílo, ngo okkom nolukkoloːpé adlígduːji sidé Ruːnéké lulígnammé émnamdém bím kinmolang. 38 Bí sém lupagmílo, bímsin lupagyé.