Jisu Kiristoké Lékod-Turkunam
15
Ajonkídínga, suːpag ngo nolum ngok lugo:binam tatpon lutaddém méːpaːmolídungku, okodém nolu toríksugeːla okodok tayéːlo nolu méngkésuladung. 2 Nolu ngok lugoːbinam agomkídíːdém ménggabla ibomílo, édé tatpon lutaddokki nolu turnamém paːtag. Émmamílo nolu émmumém méngkésutag.3 Kapéné ngo okkom paːtoji édém lagipagyaːnam kísapé ngo nolum bikonsuka, Ruːnék-gomugdo atkamardémpé Kiristobí ngoluk paːb légaːpé sibikang, 4 bím yusíːto, odokké Ruːnék-gomugdo atkamardémpé loumné longédo bím turmotoku. 5 Bí Pitormé léngkansuto, odok lédupé Yíːlaːnyidém. 6 Odok lédupé, bí língko angngokomyang bojéko bírrangém lékkopé léngkansuto, odok akedé sidaggom, abayangé suːpaksin turra dung. 7 Odok lédupé bí Jemsmé léngkansuto, odokké mélígnam appíːdém,
8 odokké ngomsin odímaːpé onamsém appíngké léddarpé bí léngkansuto. 9 Kapéné mélígnamkídíːdok araːdo ngo amepagyaːnédé, odokké mélígnam émna ngokké lusunan arrésin kamang, kapilaːné ngo Ruːnéké kumgom ipusireka.a 10 Émpigeːla Ruːnéké aséngki ngo okopé ipénamman suːpag ngo édémpéi iladung, odokké bík aséːdé ngokkolo arré kamapé itomang. Émpigeːla ngo buluk appíngkémyang agerém geryaːto; ngo atéroːngé gerka émnamang Ruːnéké aséːdé ngom gerboka. 11 Édémpila édé ngodaggom, buludaggom, ngolu édémíng lugoːbika odokké édémíng nolusin méngkésudung.
Ngoluk Lékod-Turkunam
12 Émpigeːla Kiristomé sikolokké turmotoku émna édém lugoːbimílo, nolukkolok akke kapé lulangkan sikolokké lékod-turkunammé kamang émna? 13 Sikolokké lékod-turkunammé kamaːmílo, émpém Kiristobí:sinyem sikolokké turkuman. 14 Odokké Kiristomé sikolokké turmokumaːmílo, ngoluk lugoːbinamsé agerkaman ageré, odokké édémíːpé noluk méːtinsunamséːsin. 15 Édémyang bojéyaːpé, ngolu Ruːnéké agomém aropé lukanbiné taniːpé imayeda, kapéné Ruːnébí Kiristomé sikolokké turmotoku émna ngolu lukanbigoto. Émpigeːla aroruːpésin sinékídíːdém bí turmokumaːmílo, Ruːnébí Kiristomé turmokumang. 16 Sinékídíːdém turmokumaːmílo, Kiristomésin turmokumang. 17 Odokké Kiristomé turmokumaːmílo, noluk méːtinsunamdé émmumkang; odokké nolu suːpaksin noluk paːblo duːtídung. 18 Émmílo séːkobulu Kiristomé méngkésugeːla singapkaːbon bulusin yokkang. 19 Séː turra duːnamoːsok légangoːpé ngolu Kiristom akaːla duːmílo, akon taniːkídíːdéyamyaːsin ngolu ayangém paːson taniːpé iyé.
20 Kiristomé sikolokké turmokunamdé arorungé, sinékídíːdok araːdo eːpongarné aːyédé bí. 21 Kapéné tani akolokki sinamé angkang, odokké tani akolokki sikolokké lékod-turkunamésin angkang.b 22 Kapéné Adomkolo ngolu appíngé simínkang, édémíːpé Kiristokolo ngolum appíngém turmoyé. 23 Émpigeːla lékod-turkunamdo appíngké aí-aíké ayíré dung; Kiristobí eːpongarné aːyédé, odokké édílo bí gíyekuji, séːkobulu bíkkén bulu turyéku. 24 Édílo bí takam migomém, takam ilang-gílangémnaː tornamém momígamgeːla Abu Ruːnémé migomdokodém tolígyéji, odo gítersuné ayírdé píngaːyé. 25 Kapéné édíloːpé bí bík mirukídíːdém bík alé kéígbo mémaːyéji odoloːpé bí migom-dopoːruːyé.c 26 Léddarké momíkpénam mirudé sinamdé. 27 Kapéné bí "appíngém bík alé kéígbo léːtag." Odokké édílo, "Appíngém bík alé kéígbo léːtag," émna ludon, Ruːnébí, séːko appíngém Kiristoké alé kéígbo léːto, odok kéígdo Ruːnébí aːtémang.d 28 Édílo bí édém itobon, odo Aoːdé aíé Ruːnéké kéíkpé duːsunépé iyé séːko appíngém bík kéíkpé léːtang, odo Ruːnébí appíngké tayéːlok duːnépé iyé.
29 Suːpag lékod-turkunammé kamaːmílo, séːkobulu sinékídíːdok légaːpé baptisém langkaji bulu okkom iyén? Sinédkídíːdém aroruːpé turmokumaːmílo, kapila taniyé buluk légaːpé baptisém laːdon? 30 Odokké kapila ngolu aíé, appíng ayírro sinamém pangkíramdun? 31 Ajonkídínga, ngo pesubidung, ngo loːdísém sinamém paːsudung. Édém ngok luyitsunamardémpé arro okkom ngoluk Ruːtum Jisu Kiristobí nolukkolo ibitang. 32 Tani lukampé lumílo, sinékídíːdém sikolokké turmokumaːmílo, Ipisiaːdo simínkídíːdok lédílo momínsugeːla ngo okkom paːton? Akke sémpé ludag, "Yampo ngolu siyérung siyé, odok-légaːpé kajé doman-tíːmannai."
33 Ammem yatkosuyokː "Aiman ajoné ainé séuém aimaːpé ibodag." 34 Ainé méːloddém méːlang, odokké paːbém ingasulang. Noluk anyisunam légaːpé ngo sém ludung, nolukkolok akke Ruːnémé ajjikosin kinmaːda."
Adin-amírrok Lékod-Turkunam
35 Émpigeːla séːkai taulaːdo, "Sinékídíːdém kapé turmoyékun? Kapin adin-amíré bulukké kayékun?" 36 Makkonékídíngaǃ Okkom nolu pidlígdoji édé simaːsissém sangkumang. 37 Édílo nolu pidlígdon, kapin amíːpé iyen édém pídlígma, émpigeːla geːukomanggom amnimumko pídlígdag. 38 Émpigeːla Ruːnébí bík méngkampé édém saːlenmodag, odokké bangkí bangkín amniém bí buluk aí aísuan amíːpé imodag.e
39 Édémíːpé appíng adiné lékomang, taniːké adiné angudag, simínnok adiné angudag, pédyipétatangké angudag, odokké ongoké angudag.
40 Tayéng-amo:té:sin amírkanné dung odokké moːpíso:sin amírkanné dung; émpigeːla tayéng-amongké amírdok unnakaːponamdé angunéko, odokké moːpísok amírdok unnakaːponamdé angunéko. 41 Doːnyiké angun unnakaːponamko dung, poːloké angunéko odokké takarké angunéko; odokké takarésin akon takarrokké angun unnakaːponamko dung.
42 Sikolokké lékod-turkunamdé édémarpé iyé. Pidlígnam adin-amírdé yokpéné, odokké turmokunam adin-amírdé yogmaːné.f 43 Piddodém pittépittér piddag, édém méggésunamno turmodakku, piddodém siperedag, édém tornamno turmodakku. 44 Piddodém adin-amírmumpé piddag, édém yalolok amírro turmodakku. Émmum adin-amíré duːmílo yalolok amírékosin dung. 45 Édémpila édém adla léːtagː "Lénpongaryaːné Adombí turné taniːpé ikang"; léddarké Adombí, turnamém biné yalodé.g 46 Yalolokkédé lenpoːmangai, émpigeːla émmudéːpag lenpongka, odokké odok lédupé yalokédé. 47 Lenpoːngarné taniːdé moːdisok lékamnokkai, lédíkédé tayéng-amoːtokkai. 48 Moːpísok taniːkísapé, séːkobulu moːpísokkén; odokké tayéng-amoːtok kísaːdag, séːkobulu tayéng-amoːtokkén. 49 Odokké kapé ngolum moːpísok taniːdém gésudopé otuji, édémíːpé ngolu tayéng-amongké taniːdémsin gésuyé.
50 Ajonkídínga, ngo nolum lubidung, íːikila adinki monamdé Ruːnék migomdokoto panggom paːlaːmaːyé, odokké yokpénédé yogmaːpénédém paːlaːmang.
51 Tatkítok, ngo nolum kinmaːnamko lubisoiː Ngolu appíngé simaːyé, émpigeːla ngolum appíngém angumoyé. 52 Léddarké tuːtogdém muddodo, édém bagémpé, amig-migyabnamdo. Kapéné tuːtoggém mudyé, sinékídíːdém yogmangkoloːpé turmoyéku, odokké ngolum angumoyéku. 53 Kapéné yokpénédé aíé yogmaːpénédém gélíksuyé, odokké sinédé édíloːsin simaːnédém. 54 Édílo yokpénédém yogmaːnédém molígyéji; odokké sinédém édíloːsin simaːnamdém molígyeji, odo séː lunamsé aroːpé iyéː "Sinamém motabnamno metpakto."h
55 Sinama, nok jikinamdé okolan?
Sinama, nok nígnanédé okolan?i
56 Paːbdé sinamnok nígnanédé, odokké paːbdok tornamdé luro:dé. 57 Émpigeːla Ruːnémé aipaiǃ Bí ngolum Ruːtum Jisu Kiristokokki jikinammém bidag.
58 Odok-légaːpé, ngok méːbomsunam ajonkídínga, dagrasula duːlang. Nolum okkosin éngunmopé lagimang. Nolu aíé loːdísém Ruːtumké agerém asin-bila gerrang, kapilaːné nolu kindag Ruːtumké aminnok noluk gernamdé émmumpé gímaːyé.