Ruːnék Taniːkídíːdok Légaːpé Urkumsubinam
16
Ruːnék taniːkídíːdok légaːpé urkumsubinam agerdéː Galatiadok kumgokídíːdém ngo okkom idopé lutagji nolusin édémíng ilang.a 2 Appíng loːnídlok anggotpo:né longédo, nolu appíngé noluk panganam murkoːdok akkem léngula léːlang. Édémpimílo ngok gídodo urkumsupé lagima:yé. 3 Odo, édílo ngo gípí:yéji, nolu noluk amandém Jerusalempé bomnígbidopé balenna léːnam taniːkídíːdok tayéːlo ngo méːtinsula:nam doːjíkko adlígbipé. 4 Odokké ngoːsin gíkanmílo, bulu ngok lédílo gímínnayepé.Polké Ipéméːnamkídíng
5 Ngo Mesodoniaːpé gínam lédupé nolukkoloːpé gíyé; kapéné ngo Mesodoniaːdok gípadla gíyé.b 6 Ngo noluk lédílo asudoukopé duːmínyé, dígíndém nolukkodo duːlaːdo, édémpimílo ngo okoloːpéi gíyéji, ngok lambélok laginamém nolu bidumsulaːyé. 7 Ngo nolum suːpag kaːpadoːla gípadlíːmang; Ruːnébí duːmomílo ngo noluk lédílo asutkopé duːmínnídung.
8 Émpigeːla ngo Ipisiaːdo Pentikosdoːpé duːyé, 9 kapilaːné odo bojéruːngko mirué kadaggom, kínggíːpé ager-gerranam bottaruːné yabgoko ngokképé síggebitag.c
10 Timotiːbí nolukkodoːpé gímílo, ngo kapé Ruːnék agerém gerra duːji bíːsin édémíːpé geryé, noluk lédílo bí duːmíndodo okkomsin mé:resumoyok. 11 Édémpila séːkosin bím lupagyok. Bík lambélo bím ansíngoːpé mélíglang odo bí ngokkosoːpé gíladyékupé. Bí bírrangkídíːdém gíjonsuyékupé émna ngo akala duːyé.
12 Suːpag ngoluk bíro Apolloské tayéːlo agomékké, akon bírrangkídíːdém gíjonsula bí nolukkodoːpé gídopé ngo bím torgamdopé ludung. Bí suːpag gílímaːpé ila dung, émpigeːla édílo solyéji bí oddoi nolukkodoːpé gíyépé.
Polké Lutér Luyírnam
13 Larrang, méːtinsunamdo dagrasulang; angpítan taniːpé ilang; kínggíla duːlang.d 14 Appíng agerém ayaːlo gerrang.
15 Akayaːdo Istepanaské okum-éraːdé anggotpoːnai édém nolu kindag; odokké bulu aíém angunné taniːyém kaːsíːmosíːnamno tolíksutag. 16 Bírrangkídínga, ngo nolum lumolumola ludung, bulukkémpin taniːyémnaː séːkobulu édémpin agerém ngarasumaːpé gerdoji bulukkolo nolu aíé kéíksulang.
17 Istepanasbí, Portunadbíːla Akaikaːbí gípí:nammé ngo méːpokang, kapilaːné nolu ngok lédílok duːmínmaːnamdém bulu kinsumotomang. 18 Bulu kapé nolum méːpomokaji édémíːpé bulu ngom méːpomoto. Édémpiné taniːkídíːdém kangkinnang.
19 Esia moːtaksok kumgokídíːdé nolukkoloːpé asin-aséngém bilígdung. Akuila:bí, Pirisilaːbí odokké buluk okumdo gíkumsuné méngkésunékídíːdé Ruːtumkolo nolukkoloːpé asin-aséngém séglígdung. 20 Sidok duːné bírrang appíngé nolukkoloːpé asin-aséngém bilígdung.
Akoné akoném angunné dosukki asin-aséngém bilang.
21 Ngo Polbí, aíké alakki séː asin-asé:sém adlígdung.
22 Séːkai Ruːtummé aipé-méːmaːmílo,
bík tayéːlo penamé aːyé. Ngoluk Ruːtuma, gítokubongǃ
23 Ruːtum Jisuké aséngé nolukkolo dungkaːlangka.
24 Kiristo Jisukolo ngok ayangé noluk appíngkolo dungkaːlangka. Amen.