Jisumé Sogabnam
(Moti 26.47-56; Mark 14.43-50; Luk 22.47-53)
18
Édílo Jisubí agom lungaptoji, bí luyírsunékídíːdok lédílo Kidron moːlo-amoːdém gíkola kekonpé gíkang, okolo baːriːko dungngan, odokké édé baːriːdoːpé bíːlaː luyírsunékídíːdé gíangkang.a 2 Judaːbí, bím yadla-kopakpénédé édé baːriːdém kindagai; kapéné odo baːriːdo Jisubí bíkkol luyírsunékídíːdém ríksukeːdungngai. 3 Édémpila Judaːbí maglíng asutkolaː abíné miríkídíːdoglaː Parosikídíːdok mélígnam kumli kanggabné ékkém gíbola odoːpé alaglo mérrom, serakiémnaː gídíng yoksém bomna gíaːdo. 4 Odo Jisubí bíkkolo okko kapiyéji édé appíːdém kinna bulukkodoːpé gílenna tauto, "Nolu séːkom madun?"5 Bulu bím lulatsutoku, "Najareddok Jisumé."
Jisubí bulum luto, "Ngoːna Jisubí."
Bím yadla-kopagné, Judaːbí, odo buluk lédílo dagmínna dungngai. 6 "Ngoːna Jisubí," émna édílo bí bulum luton, bulu ngedladamsula amoːboːpé kéttapkang. 7 Lékoda bí bulum tauto, "Nolu séːkom madun?"
Bulu luto, "Najareddok Jisumé."
8 Jisubí lulatsutoku, "Ngo nolum lubidung ngoːna Jisubíː," édémpila nolu ngom maduːmílo, séː taniːkídíːsém gímotoku." 9 Bík lunam agom, "No séːkobulum ngom bitang bulukkolok ngo aːkomsin yogmotomang" émnamdém ilet-gílednam légaːpé ikang.
10 Odo Simon Pitorbí, yoksako gébomna dungngai, édém sadlenna abíngaryan mirídok pagbodém palígla, bík lagbíkké yerudém papakto. Pagbodok aminém Malkas émtagai. 11 Jisubí Pitormé luto, "Nok yoksadém sobugdo líktoku; ngom oko batidém tíːdopé Abubí bituːji édé batiːdém ngo tíːmayénei?"b
Jisumé Annaskodoːpé Gíbonam
12 Odo maglíng asumdéːla buluk keptendéːla kumli kanggabnékídíːdé Jisumé sogabgeːla bím yénggapto.c 13 Bulu bím Annaskodoːpé gíbopoːto, kapéné bí Kaipaské atodéːai, séːko édé dítagdok abíngaryan mirídé. 14 Édé Kaipasbíːai séːko Jiudikídíːdém luyírbika, 'Taniːko appíng taniːké légaːpé sibimílo aiyé.'
Pitorbí Jisumé Lupaksunam
(Moti 26.69,70; Mark 14.66-68; Luk 22.55-57)
15 Simon Pitorbíːla luyírsuné aːko Jisuké lédílo gímínkang. Édé luyírsunédé abíngaryan mirídok kangkinai. Bí Jisuké lédílo abíngaryan mirídok okum-lottaːdoːpé gíamínkang, 16 édílo Pitorbí yabgo ruːyido dagla dungngan. Odo édé akon luyírsunédé, séːko abíngaryan mirídok kangkinan, gílenna yabgodok duːné pagnédém luto, odokké bí Pitormé gíabodoku. 17 Yabgodok duːné pagnédé Pitormé luto, "Noːsin séː taniːsok luyírsunékídíːdok aːkomaːlang?"
Bí luto, "Ma, ngoma."
18 Pagbokídíːdé:la kumli kanggabnékídíːdé síkírnam légaːpé umíko pargapto, odokké bulu dagla amsula dungngai; Pitorbíːsin buluk lédílo dagmínna amsumínto.
Abíngaryan Mirídé Jisumé Taunam
(Moti 26.59-66; Mark 14.55-64; Luk 22.66-71)
19 Odo abíngaryan mirídé Jisumé bíkkol luyírsunékídíːdémnaː bík luyírnamkídíːdok agomém tauto. 20 Jisubí bím lulatsutoku, "Ngo moːpísok appíngké tatkolo lubika; ngo loːdém murong-okumkídíːdoːla kumli:do luyírbika, okolo Jiudi appíːdé gíkumsudoji; ngo okkomsin léːsila lumangai. 21 No kapila ngom taudun? Ngok lubinammém tadnékídíːdém tautopén; ngo okkom lukaji édém bulu kindag."
22 Édílo Jisubí édémpé luton, bík kéraːdok dagla duːné kumli kanggabnékoné bím pigeːla sémpé luto, "Abíngaryan mirídém no édémpéi lulatsudokun?"
23 Jisubí bím lulatsutoku, "Ngo lumurtagmílo, lumurdém lukanbikunédém léngkantei, émpigeːla arrom lukamílo, no kapila ngom piton?"d
24 Odo Annasbí bím, abíngaryane mirí Kaipaskoloːpé yenggabla mélíkto.
Pitorbí Jisumé Lékoda Lupaksunam
(Moti 26.71-75; Mark 14.69-72; Luk 22.5-62)
25 Odo ayírdo Simon Pitorbí dagla umí amsula dungngai. Bulu bím luto, "Noːsin bíkkol luyírsunékídíːdok aːkomaːlang?"
Bí édém lupaksula luto, "Ma, ngoːma."
26 Abíngaryan mirídok pagbokoné, Pitorké yeru papagnamdok aíːtaniːko, bím tauto, "Ngo nom bík lédílo duːdopé édé baːriːdo kaːtagda."
27 Pitorbí édém lékoda lupaksuto; odokké oddar kikir kokkang.
Jisubí Pilatké Kanggaːdo
(Moti 27.1,2,11-14; Mark 15.1-5; Luk 23.1-5)
28 Roːrokompé bulu Jisumé Kaipaské okumdokké rajbobondoːpé gíboto. Bulu aíkídíːdé kapéigom Gíboːla donam gíːdíːdém dolaːdopé, odokké suamaːdopé émna bulu rajbobondoːpé gíatomang.f 29 Édémpila Piladbí bulukkodoːpé gílenna luto, "Nolu séː taniːsok kekonpé oko lujémnamém bomtang?"
30 Bulu bím lulatsutoku, "Séː taniːsé imurnékomaːmílo, ngolu bím nok alaglo tolígmaːyai."
31 Piladbí bulum luto, "Bím gíbokangku odokké nolu noluk aíké lurodokki bím kébaːbaːtaːku."
Jiudikídíːdé bím luto, "Ngoluk luroːdo séːkomsin mokelanan ilang-gílangé kamang." 32 Jisubí kapin sinamki siyéji, odokké bík lunam agomdém ilet-gílednam légaːpé sémpé ikang.
33 Piladbí rajbobondoːpé lékoda gíanggekula Jisumé goggeːla tauto, "No Jiudikídíːdok Migomdéi?"
34 Jisubí lulatsutoku, "No édém aíké asin méngkampéi ludun, émmamílo séːkai akonei nom ngok légaːpé édém lubitang?"
35 Piladbí lulatsutoku, "Ngo Jiudi taniːkoi?" Nok aíké taniːkídíːdéːla abín miríkídíːdé nom ngok alaglo tolíktag, no okkom iton?"
36 Jisubí lulatsutoku, "Ngok migomdokodé séː moːpísokkémang; ngok migomdokodé séː moːpísokkaːmílo, ngok pagbokídíːdé mimag-moyyai; odo ngom Jiudikídíːdok alaglo tolígmaːyapé; édémpila ngok migomdokodé séː moːpísokkémang."
37 Piladbí bím luto, "Émpém no migomkoiǃ" Jisubí lulatsutoku, "No ludung ngo migomé. Kapéné ngom édémpéi otagai, odokké odok légangéi arodém lukanbikolo, ngo séː moːpísoːpé gítag. Séːkoi arolo duːji bí ngok agomém taddag."
38 Piladbí bím tauto, "Okkon arodé?" Bí édém lunam lédupé, bí lékoda Jiudikídíːdoːpé gílengeːla bulum luto, "Ngo bíkkolok oko imurkosin paːmang."
39 Émpigeːla nolukké ilot-gílotko dung Gíboːla donam gíːdíːlo taniː aːkom mélennígdoku; nolu méːdumílo, ngo nolukkoloːpé Jiudikídíːdok migomé mélennígbikupé."
40 Bulu jéːlatsutoku, "Bímma, ngolum Barabbasmé mélenníktéikuiǃ" Barabbasbí taniːmokennékkai.