19
Odo Piladbí Jisumé sabukki díːdopé lulíkto. 2 Maglíngkídíːdé tang dumlupko pogeːla bík tukkudo kublíkto. Odokké bulu baːyomné galukko bím molíkto;a 3 odokké bulu bíkkodoːpé gímogímola gísaːla luto, "Írroi, Jiudilok migomméǃ" Odokké bulu bím migmodok pito.4 Piladbí lékoda gílengekula bulum luto, "Kangkí, ngo bím nolukkosoːpé gílenboyéku, odo nolu kinyépé ngo bíkkolok oko imurkosin paːtomang."b 5 Édémpila Jisubí tang dumlubdémnaː baːyomné galugdém géla gílendo. Piladbí bulum luto, "Kaːtok, sidé édé taniːdéǃ"
6 Édílo abín miríkídíːdéːla kumli kanggabnékídíːdé bím kaːtoji, odo bulu jéːropkang, "Bím kuruslo pítketok, bím kuruslo pítketokǃ"
Piladbí bulum luto, "Nolu aíé gíbola bím pítketa, kapéné bíkkolo ngo oko imurkosin paːtomang."
7 Jiudikídíːdé bím lulatsutoku, "Ngolukké luroːko dung, odokké édé lurodokki bí sipéruːnammé, kapilaːné bí aíém Ruːnék Aoːdé émna lusuka."c
8 Édílo Piladbí édé agomkídíːdém tatpaːsuton, bí péssoːyangkang, 9 bí lékoda rajbobondoːpé gíanggekula Jisumé tauto,"No okolokké gídun?"
Émpigeːla Jisubí okkomsin lulatsutokumang. 10 Odok-légaːpé Piladbí bím luto, "No ngom okkomsin lubisukumaːyenei? Nom mélíglangkunannéla kuruslo pítkenan ilang-gílangé ngokké dung émna no kindoyé?"
11 Jisubí bím lulatsutoku, "Tayéːtokké nom bimanamkaːmílo, nokké ngok tayéːlo ilang-gílangé kamaːyai; odok-légaːpé séːkobí ngom nok alaglo tolíktoji bík imurdé bottéyaːdag."d
12 Édém tatpaːsugeːla Piladbí Jisumé mélenníkkupé ikíto, émpigeːla Jiudikídíːdé jéːyartíkang, "No séː taniːsém mélenníkkumílo, no Kaisarké ajonéimang. Séːkoi aíé migomé émsuyéji bí Kaisarké kekonpé dagrobdag."
13 Édílo Piladbí édé agomkídíːdém tadbeksuton, bí Jisumé gílenbomoto, odokké Ibri agompé okodém Gobbata émdoji, édé ílíng kungké tayéːdo kébaːbaːbinam légaːpé tetto. 14 Édé longédé Gíboːla donam gíːdíːdok moninsunan longngai; ayírdé loːtudaggaboi. Bí Jiudikídíːdém luto, "Kaːtok noluk Migomdéǃ"e
15 Bulu jéːsangkang, "Bím gípagbokang, bím gípagbokang, bím kuruslo píttokǃ"
Piladbí bulum tauto, "Noluk migomé ngo kuruslo pítkepéi?"
Abín miríkídíːdé lulatsutoku, "Kaisaroːbí ngoluk migomé, odokké ngolukké migomé kasedmang."
16 Odo Piladbí Jisumé kuruslo pítkedopé buluk alaglo tolíkto.
Jisumé Kuruslo Pítkenam
(Moti 27.32-44; Mark 15.21-32;Luk 23.26-43)
17 Édémpila bulu Jisumé gílenbokang. Bí aíé aíképé kurusdém joːlenbomna, kulong émkodoːpé gípíto, Ibri agompé okodém Golgota émdo. 18 Odo bulu Jisumé kuruslo pítketo, odokké bík lédílo taniːannyikosin, bím pongkodo odokké bínyim kekon kesakpé pítto. 19 Piladbí lupangko adgeːla kurus tayéːdo pídgablíkto. Édém sémpé attagai, "Najareddok Jisubí, Jiudikídíːdok Migomdé." 20 Bojérungko Jiudi taniyé édém poto, kapéné Jisumé kuruslo pítkekodé nogordok kéraːdaggai, odokké édém Ibri, Letin, odokké Girik agompé attagai. 21 Odo Jiudikídíːdok abín miríkídíːdé Piladmé luto, "Jiudikídíːdok migomdé émna addyo," émpigeːla 'séː taniːsé Jiudikídíːdok migomé émna lusudaggai.'"
22 Piladbí lulatsutoku, "Ngo okkoméi attagboːji, attagbo."
23 Édílo maglíngkídíːdé Jisumé kuruslo pítton, bulu bík bédugasorkídíːdém langgeːla édémbulum baːpikopé orto, ako maglíng légaːpé aːko. Bulu gétémnam galugdémsin laːto; émpigeːla édém ommangai, tayéːtokké kéígboːpé aborongokoːpé sumtagai. 24 Édémpila bulu akoné akoném luposuto, "Sém bupedyobo, émpigeːla sidé séːkképé iyéji, amin-kunamko kuːpoːlai." Édé Ruːnék-gomugdém ilet-gílednam légaːpé ikang.
"Bulu buluk araːlo ngok génamém orpansuto,
odokké ngok galug légaːpé bulu aminém kuːto."
Édémpila maglíngkídíːdé édém ito.f
25 Jisuké kurus kéraːdo bík anédé, bík annoidé, Kolopaské yamné Meriːbíːla Meri Magdolonibí dagla dungngai. 26 Édílo Jisubí bík anédémnaː bíkkol luyírsuné séːkom bí aipé-méːdagaji bík kéraːdo dagla duːdopé kaːton, odo bí bík anédém luto, "Oːno, kaːtok, nok aoːdéǃ"
27 Odokké bí luyírsunédém luto, "Kaːtok, nok anédé." Odokké édé ayírdokké, édé luyírsunédé bím bík okumpé gíbokangku.
Jisuké Sinam
(Moti 27.45-56; Mark 15. 33-41; Luk 23.44-49)
28 Odok lédupé Jisubí, appíngém suːpag ingaptagbo émna kinsugeːla, Ruːnék-gomugdok lukamdémpé idopé, bí luto, "Ngo asiko tíːlíːdung."
29 Odo batikolo biːnékopé bakserené apongé dungngai; édémpila bulu gimurkolo biːdopé apodém jíːbudlíggeːla essup réngkéːkolo níggabgeːla édém bík nappaːdo níglígbito. 30 Édílo Jisubí bakserné apodém paːtoji, bí luto, "Édém gerpíttagbo."
Odok lédupé bí bík tukkudém íbumgeːla bík yalodém tolíkto.
Jisuké Angkédém Nígjognam
31 Édé longédé moninsunam longngai, odokké longkondo angurun yoddí longékai. Édémpila Jiudikídíːdé Yoddo longédo simangkídíːdém kuruskídíːdo duːmolíːmala Piladmé buluk allém díːsodmodopélaː buluk simaːdém bomdokupé tausuto.g 32 Édémpila maglíngkídíːdé gíla paːponamdok allém díːsotto, odokké akondém séːkom bík lédílo kurusdo píttagan. 33 Émpigeːla édílo bulu Jisukodoːpé gíton, bulu bím sila duːdopé kaːto, bulu bík allém díːsotomang. 34 Maglíngkoné bík gídídokki Jisuk angkeddok níkkurto, odokké lékkolo odokké íːyélaː assé bidlendo. 35 Séːkoi kaːtoji bí édém lukanbitoku, odokké bík lukanbikunamdé arro. Bí kindag bí arrom ludung, odokké nolusin méngkésuyépé émna bí édém lukanbidung. 36 Ruːnék-gomugdok adnamdém ilet-gílednam légaːpé édébulumpé ikang, "Bík along asongkosin díːsodmaːyé."h 37 Odokké, Ruːnék-gomugdo oːkolai lutag, "Séːkom bulu níkkurtoji bímmíng bulu kaːtinsuyéku."i
Jisumé Yusínam
(Moti 27.57-61; Mark 15.42-47; Luk 23.50-56)
38 Odok lédupé, Arimatiadok Jusebbí, séːko Jiudiém pésola léːsila Jisuké lédulo gímínnékkai, bí Pilatkolok Jisuké simaːdém bomkupé kotoku. Édémpila Piladbí bím laːmoːtoku, bí gíla simaːdém laːtoku. 39 Nikodemasbí bím gíjonka, séːko Jisukodoːpé poːpélo yumékoném agom tatkapé gíka. Bí yíngum séːrkíramkopé molusunam nampon-yonsunammémnaː eloém bomna gído. 40 Bulu Jisuk simaːdém laːtoku, odokké asong-onnolok gayinki namponékídíːdém yonníggeːla yetto, taniːsimangém yusíːdoém Jiudilok ilot-gílot kísapé ito. 41 Jisumé kuruslo pítkekodo baːriːko dungngai, odokké édé baːriːdo séːkomésin léngkímaːnam agoko dungngai. 42 Édémpila Jiudilok moninsunam longépé inamé, odokké agodé aninnammé, bulu Jisumé odo mésíːto.