Simang Kaman Agodé
(Moti 18.1-8; Mark 16.1-8; Luk 24.1-12)
20
Odo loːníddok anggotpo:né longédo, airu:pé roːrokompé, kémogamna duːdodo Meri Magdolonibí agodoːpé gíkang, odokké agodok gíangkodok ílíːdém pérpagla léːdopé kaːto. 2 Édémpila bí Pitorkoloːpélaː akon luyírsunédoːpé séːkom Jisubí aipé-méːdagaji, duglangkula lubitoku, "Bulu Ruːtummé agodokkém laːpakto, odokké bím okoloi léːtosong édém ngolu kinmang."3 Édémpila Pitorbíːla akon luyírsunédé agodoːpé émna gílenkang. 4 Binyí annyidé dukkang, émpigeːla akon luyírsunédé Pitormé dugbadla agodoːpé dukpípoːto. 5 Bí tungkula ngengala kaːnamé, asong-onnolok gayino:ngkídíːdé asumpé duːdopé kaːto, émgom bí araːdoːpé gíaːtomang. 6 Odo Simon Pitorbí bík lédupé gípí:la agodok araːdoːpé gíangkang. Bí asong-onnolok gayindém odo duːdopé kaːto. 7 Émpigeːla oko dumérdém bík tukkudo e:bittagaji, édé dumérdé gasordok dungkodo kamangai, émpigeːla édé aídé yetsula dungngai. 8 Odo édé akon luyírsunédé, séːko agodoːpé gípípongkaːji, bíːsin gíamínkang. Odokké édém bí kanggeːla méngkésuto. 9 Kapéné Jisubí sikolokké turyéku émna Ruːnék-gomugdok adnamdém odoloːpé bulu kinmangai. 10 Odok lédupé luyírsunékídíːdé buluk okumpé gílatkangku.
Meri Magdoloniːmé Jisuké Léngkansunam
(Moti 28.9,10; Mark 16.9-11)
11 Émpigeːla Meriːbí agodok ruːyido dagla kapto. Bí kaptuːla tungkula agodém ngengala kaːnamé, 12 odo bí kampopé géné tayéng-yaːme annyiko, okolo Jisuk simaːdém léːtagan, aːko tukkudo odokké akondé alébo, tedla duːdopé kaːto. 13 Bulu bím tauto, "Bírma, no kapila kabdun?"
Bí bulum lubisuto, "Bulu ngok Ruːtummé laːpakto odokké bulu bím okoloi léːtosong édém ngo kinmang."
14 Édém lugeːla, bí ngengola kaːnamé Jisumé dagla duːdopé kaːto, émpigeːla édé Jisubí émna bí kinmangai. 15 Jisubí bím luto, "Bírma, kapila no kabdun? Séːkom no magoladun?"
Bí baːriːdém kaːsíːnédé émna méːla bím luto,"Ruːtuma, no bím joːpakkamílo, bím okolo léːlíkton ngom lukítei, ngo bím bomkupé."
16 Jisubí bím luto, "Meri."
Bí bím bérratsula kangeːla bím Ibri agompé luto, "Rabboniǃ" Odok légíːdé Luyír-abu.
17 Jisubí bím luto, "Ngom gakkípoːyok, kapéné ngo suːloːpé Abukotoːpé gísangkuma:da; émpigeːla no ngok bírrangkídíngoloːpé gíla lubita, ngo ngokkélaː noluk Abukotoːpé odokké ngokkélaː noluk Ruːnékotoːpé gísadakku."
18 Meri Magdolonibí gílangkula luyírsunékídíːdém lubitoku, "Ngo Ruːtummé kaːtoǃ" Odokké bí bím édémbulum lubitag émna bí bulum lubito.
Jisubí Luyírsunékídíːdém Léngkansunam
(Moti 28.16-20; Mark16.14-18; Luk 24.36-49)
19 Édé longédok yummayírdo, loːníddok anggotpoːné longédo, Jiudikídíːdém pésola luyírsunékídíːdé yabgo síkkapsula dungngai. Jisubí gíaːla buluk pongkodo daggeːla bulum luto, "Asin-ansíngé nolukkolo dungkaːlangka." 20 Édílo bí édém lutoji, bí bulum bík alagdémna angkeddém léngkanto. Odokké édílo luyírsunékídíːdé Ruːtummé kaːpaːtoji bulu méːpokang. 21 Jisubí bulum lékoda luto, "Asin-ansíngé nolukkolo dungkaːlangkaǃ Abubí kapé ngom mélíktagji, édémíːpé ngoːsin nolum mélígdung." 22 Odokké édílo bí édém lutoji, bí buluk tayéːlo ngalíggeːla luto, "Angunné Yalomém la:ríksutok.a 23 Nolu séːkkaiké imurém méːyinsubimílo; bulum méːyinsubiyé; nolu séːkkaiké imurém méːyinsubimaːmílo; bulum méːyisubimaːyé."b
Jisubí Tomasmé Léngkansunam
24 Tomasbí yíːlaːnyi luyírsunékídíːdok aːko séːkom opem émdo, Jisubí odoːpé gíaːdodo bí buluk lédílo kamangai. 25 Édémpila akon luyírsunékídíːdé bím lubitoku, "Ngolu Ruːtummé kaːtoǃ"
Émpigeːla bí bulum luto, "Édíloːpé ngo bík alagdo kili pítkodém kaːmaːyéji, odokké ngok lagném kili pítkurkodo líkkaːmaːyéji odokké ngok alagém bík angkedo líkkaːmaːyéji odoloːpé ngo méngkésumaːyé."
26 Piːnyi longé lédupé lékoda bíkkol luyírsunékídíːdé édé okumíːdok araːdo dungngai, Tomasbíːsin buluk lédílo duːtédungngai. Yabgom síkkaptagai, émpigeːla Jisubí gíanggeːla buluk pongkodo daggeːla luto, "Asin-ansíngé nolukkolo dungkaːlangkaǃ" 27 Odo bí Tomasmé luto, "Nok lagnédém sido líkkaːta, odokké ngok alaksém kaːta, nok alagdém lagjunto odokké édém ngok angketso líkkaːta; méːtinsunamé kamapé duːyok, émpigeːla méngkésulang."
28 Tomasbí bím luto, "Ngok Ruːtuma, ngok Ruːnénoǃ"
29 Odo Jisubí bím luto, "No ngom kaːlai méngkésudun? Émpigeːla ayang-paːnékídíːdé bulu séːko ngom kaːmaːpésin méngkésutoji."c
Séː Potinsém Adnam Légaːdé