Jisubí Kínítkoném Léngkansunam
21
Odok lédupé, Jisubí lékoda bíkkol luyírsunékídíːdém Tiberia Paːtaːdo léngkansuto. Bí sémpé bulum léngkansuto. 2 Simon Pitorbí, Opem émnam Tomasbí, Galili moːtagdok Kana taondok Natanielbí, Jibediːké aoːkídíːdé, odokké akon luyírsuné annyiko gíkumsula dungngai.a 3 Simon Pitorbí bulum luto, "Ngo ongo makapé gídag."Bulu bím luto, "Ngolusin nok lédílo gímínyé." Édémpila bulu gílenna gíla olluːdo saːto; émpigeːla édé yumédo bulu ongo apirkosin paːtomang.b 4 Roːrokompé, Jisubí ragodo dagla dung, émpigeːla luyírsunékídíːdé édé Jisubí émna odoloːpé kinmangai. 5 Jisubí bulum tauto, "Ajonkídínga, nolukké ongngo duːnei?"
Bulu lulatsutoku, "Kamang."
6 Bí bulum luto, "Olluːdok lagbíkpé ésabdém érríktok odo nolu ongngom érgabyé."Édémpila bulu odo érríkto, odokké ongngo bojébatsunammé bulu ésabdém sosaːlanggékumapé ikang.
7 Édé luyírsunédé séːkom Jisubí aipé-méːdagji Pitormé luto, "Édé Ruːtumbíǃ" Édílo Pitorbí édé Ruːtumbí émnamdém tadbeksuton, bí bík attarém gélíksugeːla asiːdoːpé sumjíngkang; kapilaːné bí gétémnam galugém gémaːpé dungngai. 8 Émpigeːla akon luyírsunékídíːdé olluːdo ragodo:pé gíto, ongoki biːla duːné ésabdém busaːto. Bulu témpídokké bojéko moːtémangngai; asidoːpé língko lagdu kíramkopé idagai. 9 Édílo bulu ragodoːpé písaːtoji, odo bulu dorra duːné meredo ongngomnaː pitangém kaːbeksuto. 10 Jisubí bulum luto, "Noluk suːpaggongké sogabnam ongo ékkém laːta."
11 Odo Simon Pitorbí olluːdo sangaːla ésabdém ragodoːpé busaːto. Odo língkokolaː yíngokolaː pirumko; pirtan ongoki biːla dungngai; odokkíddíko onggo pannasin, ésabdé bettoma. 12 Jisubí bulum gokto, "Soːpé gígeːla pinkang dopota." "Séːkon no émna?"Luyírsunékídíːdé séːkosin bím taulaːnané angékatoma. Bulu kindagai édé Ruːtumbí. 13 Jisubí gíla pitaːdém langgeːla bulum bito, odokké ongodémsin édémíːpé bito.
14 Jisubí sikolokké turkunam lédupé luyírsunékídíːdém léngkasunamdé sidé léumnannéboi.
Jisubíːla Pitorbí
15 Édílo bulu pinkaːdém doton, Jisubí Simon Pitormé tauto, "Jonké ao Simon, no ngom sémbulumyaːsin aipé-méːyaːdoye?"
Pitorbí bím luto, "Éː Ruːtuma; no kindag ngo nom aipé-méːdag."
Jisubí bím luto, "Ngok meːr-aoːkídíːdém dogomota."c 16 Jisubí lékoda bím luto, "Jonké ao Simon, no ngom aipé-méːdoye?"
Bí bím lulatsutoku, "Éː Ruːtuma, no kindag ngo nom aipé-méːdag."
Jisubí bím luto, "Ngok meːrkídíːdém mosíːta." 17 Jisubí bím lékoda luto, "Jonké ao Simon, no ngom aipé-méːdoye?"
Pitorbí méːdírkang kapilaːné Jisubí bím léumkopé tauto, "No ngom aipé-méːdoye?" Bí bím luto, "Ruːtuma, no appíngém kindag; ngo nom aipé-méːdag émnamdém no kindag."
Jisubí bím luto, "Ngok meːrkídíːdém dogomota. 18 Ngo nom arodém lubidung, édílo no yaːmeaːji no aíé yeːréksudagai odokké okoloːpéi gílíːdagji odoːpéi gídagai; émpigeːla édílo no míjíngéboːji; no nok alagém lagjaryé, odokké séːkai akoné nom yeːrégbiyé odokké no okoloːpé gílí:maːji odoːpéi nom gíboyé." 19 Bí oko sinamki sila Ruːnémé luyitsuyéji édém léngkanam légaːpé Jisubí édém luto. Odokké odok lédupé bí bím luto, "Ngok lédulo gímíntoǃ"d
Jisubíːla Luyírsuné Akonkoda
20 Pitorbí nge:latsunamé Jisuké aipé-méːnam luyírsunédém buluk lédulo gímínna duːdopé kaːto. Édé bíːai séːko yumé apin dododo Jisumé kégabdangeːla taukan, "Ruːtuma, séːko nom yadla-kopagyén?" 21 Édílo Pitorbí bím kaːton, bí Jisumé tauto, "Ruːtuma, bím kapé iyen?"
22 Jisubí bím lulatsutoku, "Ngo bím ngok gíladdokudoːpé turra duːtoka émna méːmílo, odo nokképé oko ageré dun? No ngok lédulo gímínto."e
23 Édé luyírsunédé simaːyébo émna Jisuké lunam agomdém bírrangkídíːdok araːlo lujerto; émgom bí simaːyé émna Jisubí bím lumangai. Émpigeːla "Ngok gílatkumaːdoːpé bí turra dungkaːlangka émnamdé ngok méːnamai, édé nokképé okkon?"
24 Édé appíːdém lukanbikunédéːla édémbulum adnédé édé luyírsunédé; odokké bík lukanbikunamdé arro émnamdém ngolu kindag.
Attér
25 Sidogbuluk ruːyiːpésin Jisubí bojéruːngko agerém gerka; édé appíːdém ako akopé admílo; éddíko potiném adlenyéːji, édémbulum méko-tíːkko séː moːpíso kagémaːyé.