Jisubí Gímínnékídíːdok Légaːpé Kumbinam
17
Jisubí édé agomdém lunam lédupé, bí tayéːtoːpé nge:saːla lutoː "Abu, ayíré píngangkaːbo; nok Aoːmé unjígmotei, odo nok Aoːbí nom unjígmoyépé. 2 No séːkobulum bím bitang bulum appíngém turyarné turnamém binam légaːpé no bím appíngké tayéːlo ilang-gílangém bitag. 3 Odokké turyarné turnamdé sidéː no atéroːdé aro Ruːnébí émna odokké nok mélígnam Jisu Kiristomé bulu kinyépé. 4 No ngom oko agerém gerdopé bitagan, édém ngo moːpíso gerredgeːla nom unjígmoto. 5 Abu, suːpag, nok aíké kanggaːdo ngom unjígmotei. Moːpísém ruːlenmaːdodok poːpélo nok lédílo ngokké kapin unjígé dungngan édémíːpé ngom suːpag unjígmotei.a6 No sé: moːpísok araːlokkém séːkobulum ngom bitang, buluk kanggaːlo ngo nok aminém lukanbika; bulu nonggíngkai, no bulum ngom bitagai; odokké bulu nok agomém tatka. 7 No oko okko ngom bitagji édé appíːdé nokkolokké émna, suːpag bulu kinkaːbo. 8 Kapéné no oko do:yingém ngom lulíktang, édé doːyingkídíːdém ngo bulum lubika odokké bulu édémbulum toríksuto. Ngo nokkolokké gídung émnamdém bulu aropé kinto odokké no ngom mélíktag émnamdém bulu méngkésuto.
9 Ngo buluk légaːpé kumbidung, ngo moːpísok légaːpé kumbimang, émpigeːla buluk légaːpé kumbidung séːkobulum no ngom bitang; kapéné bulu nokké. 10 Ngok appíːdéi nokké, odokké nok appíːdéi ngokké. Odokké ngo bulukkolo unjígém paːdung. 11 Odokké suːpag ngo moːpíso duːyarmaːbo; émpigeːla bulu duːyaryé, ngo nokkodoːpé gídokubo. Angunné Abu, séːkobulum no ngom bitang, bulum nok aminno duːribilang, ngolu kapé lékola duːji, édémíːpé bulu lékola duːyé.b 12 Édílo ngo buluk lédílo dungngan, ngo bulum nok amindok tornamki morila léngka, nok binam édé amindokki. Ngo bulum duːribika; bulukkolok aːkosin yoktoma, édé taniːdok ruːyiːpé séːkom yogdop tolíktungan, Ruːnék-gomugdok adnamdém ilet-gílednam légaːpé yokkang.c 13 Suːpag ngo nokkoloːpé gídokubo, émpigeːla ngok méːpodém bulu píːsíːdopé paːyépé émna moːpíso duːdodo ngo sémbulum bulum lubidung. 14 Ngo nok doːyingkídíːdém bulum lubika, moːpísé bulum tayumdag, kapilaːné ngo kapé moːpísokkémaːji bulusin édémíːpé moːpísokkémang. 15 Bulum sé: moːpísokké gípagbodokupé émna ngo kummang, émpigeːla no bulum aimaːnélokkém morila léːdopé émna kumdung. 16 Ngo kapé moːpísokkémaːji, édémíːpé bulusin sokkémang. 17 Nok agomdé arro; arodokki bulum naréːmotei. 18 No kapé ngom sé: moːpísoːpé mélíktagji, édémíːpé ngo:sin bulum moːpí araːdoːpé mélíktag. 19 Odokké bulumsin arodo narémoyépé émna buluk légaːpé ngo aíé naréːsuka.
20 Odogbuluk légangoːpé ngo kummang, émpigeːla séːkobulu buluk doːying lubinamdokki ngom méngkésuduji buluk légaːpésin ngo kumbidung. 21 Odo bulu appíːdé lékoyépé; Abu, kapé no ngokkolo, odokké ngo nokkolo lékoladun. Bulusin ngolukkolo lékokaːlangka, odo moːpísé no ngom mélíktag émna méngkésuyépé. 22 Odokké ngolu kapé lékodagji bulusin édémíːpé lékodopé, no ngom binam unjígdém ngo bulum bitag. 23 Ngo bulukkolo dung odokké no ngokkolo dung. Odo bulu aro-aropé lékoyépé, édémpimílo no ngom mélíktag, odokké no kapé ngom ayaːdagji édémíːpé bulumsin ayaːdag émna moːpísé kinyépé.
24 Abu, no séːkobulum ngom bitang, bulu ngok dungkodo duːmíndopé, odokké ngok unjígdém kaːdopé ngo méːdag. Oko unjígdém no ngom bitang, kapéné moːpísém ruːlenmaːdo poːpéloːbo no ngom aipé-méːdaggai.d 25 Arolok-duːné Abu, moːpísé nom kinmang, émpigeːla ngo nom kindag, odokké bulu kindag no ngom mélíktag émna. 26 No séːkon édém bulum lubikabo odokké lubitíla duːyé, oko ayaːdé nokké ngok légaːpé dungngaːji édé ayaːdé bulukkolo dungkaːlangka, odokké ngo bulukkolo duːmínyé."