16
Nolu opagledmaːdopé émna ngo séː appíːsém nolum lubidung. 2 Bulu nolum murong-okumnokké ménnenyé, aroruːpé lubidung édé ayírdé aːdobo édílo séːkoi nolum mokeyéji, bí Ruːnémé agergerbidung émna méːsuyé.a 3 Bulu Abumélaː ngom kinmaːla sémpin agerém geryé. 4 Édílo ayírdé aːyéji odo ngo nolum lupanoːbika émna nolu édém méːpaːyé. Ngo noluk lédílo duːmínam légaːpé sémbulum poːpélo lubimangai.Angunné Yaloké Ager
5 Suːpag ngo ngom mélígnékodoːpé gídakku; émgom nolukkolok séːkosin ngom taumang, 'No okoloːpé gídakkun émna?' 6 Ngo nolum sémbulum lubinam légaːpé, noluk asiné méːdírro biːpakkang. 7 Émgom ngo nolum arodém lubidung; ngok gípakkunamdé nolukképé aidag. Kapéné ngo gípakkumaːmílo, Lusíbinébí nolukkoloːpé gítogmaːyé; émpigeːla ngo gíkumílo, nolukkoloːpé ngo bím mélígbiyé. 8 Odokké édílo bí gíyéji, paːbém, arolok-duːnamém, odokké kébaːbaːnamém, moːpísok taniːyém kinjígla-kinmoyé. 9 Bí paːb légaːdém kinjígla-kinmoyé, kapéné bulu ngom méngkésutomang; 10 arolok-duːnam légaːdém kinmoyé, kapilaːné ngo Abukoloːpé gídakkubo, odokké nolu ngom kaːbekkumaːyé.b 11 Kébaːbaːnamdok légaːdé, kapilaːné séː moːpísok migomdém kébangém baːtagbo.
12 Ngokké nolum bojéruːngko lubipénam agomé duːda, émpige:la nolu su:pag édém tarrasulamang. 13 Édílo aroné Yalodé gíyéji, bí nolum appíng arodoːpé gíboyé. Kapéné bí bík aíké ilang-gílaːlo lumaːyé, émpigeːla bí okkom tattagji édém lubiyé, odokké oko okko aːyéji édémbulum nolum lubiyé. 14 Bí ngom unjígmoyé, kapéné ngokké oko okko du:ji édémbulum bí laːyé odokké édémbulum nolum lubiyé. 15 Oko okko Abuké duːji édé appíːdé ngokké; odok-légaːpé ngo nolum lubika ngok appíngém bí laːyé odokké édém nolum lubiyé.
Méːdírdé Mé:popé Iyeku
16 Asudouko duːnam lédupé nolu ngom ka:bekkuma:yébo, odokké asudouko lédoːupé, nolu lékoda ngom ka:begyéku."
17 Bíkkol luyírsuné ékké akoné akoném luto, "Bí okkom ngolum lubiton, 'Asudoukomílo, nolu ngom kaːbegmaːyé, émpigeːla asudouko lédupé lékoda nolu ngom kaːbegyéku' odokké 'Kapilaːné ngo Abukotoːpé gídakku' édé lunamdé okkan?" 18 Bulu luto, "Bí okkom sémpé lukan, 'Asudoukomílo'? Bík lunamdém ngolu tatkinduːlang?"
19 Jisubí kinto bulu bím taukínamko taulíːdung émna, édémpila bí bulum luto, "Ngo luka, 'Asudoukomílo, nolu ngom kaːbegmaːyé, odokké asudouko lédupé nolu lékoda ngom kaːbegyéku.' Noluk araːdo nolu édémyé taumínsudun? 20 Ngo nolum arodém lubidung, nolu kabaném-kabla uːla duːyé, émpigeːla moːpísé méːpola duːyé; nolu méːdíryé; émpige:la noluk méːdírdé mé:popé iyeku. 21 Édílo néːngkoné ommang pangkíramdon bík obo akiyé-kido, kapilaːné bík odí ayírdé píngangkaːbo. Émpigeːla édílo bí ko:dém obíddagji, bí bík aki-kinamdém méːpangkumaːbo, kapéné moːpísoːpé koːko gído émna bí méːpodag.c 22 Édémpila suːpag nolukké méːdírnan ayíré, émgom ngo nolum lékoda ka:ríksuyéku odo noluk asiné mé:poyéku, odokké séːkosin noluk méːpodém nolukkolokkém laːpaglaːmaːyé.
23 Odo longédo nolu ngom okkomsin taumaːyé. Ngo nolum arodém lubidung, nolu okkoméi Abukolok koyéji bí nolum ngok aminno édéméi biyé. 24 Su:loːpé nolu ngok aminno okkomsin koma:da. Kotok odo nolu paːyé, odopag noluk mé:ponamdé pí:síːyé."
Moːpísém Motabnam
25 "Ngo nolum sémbulum luyisula lunamki lubidung. Émpige:la ayírdé aːyé édílo luyisunampé lumaːbo, émpigeːla nolum Abuké tayéːlok agomém naréngoːpé lubiyé.d 26 Odo longédo nolu ngok aminno koyé; odokké ngo lumang ngo nolukképé ibila Abukolok kobiyé émna. 27 Abubí aídéi nolum aipé-mé:dag; kapila:né nolu ngom aipé-mé:dag odokké ngo Abukolokké gídung émna nolu méngkésudag. 28 Ngo Abukolokké moːpíso:pé gíatag; odokké ngo suːpag moːpísém mépagla Abukoloːpé gídakku."
29 Odo bíkkol luyírsunékídí:dé luto, "Su:pakpag no okkomsin luyisumaːpé, naréngo:pé lubidungǃ 30 No appíngém kindag émna ngolu suːpag kinto, odokké nom taupénamé okkosin kamaːbo; no Ru:nékolokké gídung émna sidé ngolum méngkésumodung."
31 Jisubí bulum lulatsutoku, "Nolu suːpag méngkésudoyé? 32 Ayírdé píngadobo, aropé édé píngangkaːbo, édílo nolum appíngém, aíké okumpé dukpitsumoyé, odokké nolu ngom atéroːpé mépagyé; émgom ngo atérmaːyé; kapéné Abubí ngok lédílo dung.e 33 Ngokkolo nolukké ansíngé duːyépé émna ngo nolum sémbulum lubika. Moːpíso nolukké ngasodé kayé. Émpige:la asiné méːpola duːlang! Ngo moːpísém motaptagbo."