Angur-amíːdéːla Réngkéːdé
15
"Ngo aro angur-amíːdé odokké ngok Abubí angur aríg-inédé.a 2 Ngokkolo a:ye e:man réngké appí:dém tékpagyé, a:ye e:né réngké appí:dém bí kolomaiyé, édémpimílo édé aːyem eːyaːyé. 3 Nolum ngok lubinam agomkokki nolu naréla duːbo. 4 Nolu ngokkol du:míntok odokké ngo nolukkol du:mínyé. Réngké atéroːdé a:yem e:la:ma; édíloːpé édé angur-amí:do pargabla duːmínmaːyéji. Édémíːpé nolusin aːyem eːlaːmang édíloːpé nolu ngokkolo duːmínmaːyéji.b5 Ngo angur-amí:dé; nolu réngkékídí:dé. Taniːkoné ngokkolo du:mínmílo; ngo bíkkolo du:míndo, odo bí bojéko a:yem e:yé; ngo katémaːmílo nolu okkomsin ilaːmang. 6 Sé:koi ngokkolo du:mínma:ji, bí yoppagnam réngkékonémpé idag okodé sanpagdag; odokké édémpin réngkéngém tísaːla umílo érrígla rompagdag. 7 Nolu ngokkolo du:mínmílo; ngok agomé nolukkolo du:mínyé, nolu okkoméi méːdoji édéméi kolang, odokké konamdéméi nolum biyé.c 8 Odokki ngok Abumé unjígmodo, nolu bojéko aːyem engkaːlangka, odokké aːyedé nolu ngokkolo luyírsuné émnamdém léngkandag.d 9 Abubí ngom kapé aipé-méːdagji, édémí:pé ngoːsin nolum aipé-méːdag. Odokké suːpag ngok aipé-méːnamno du:lang. 10 Nolu ngok lulígnamkídí:dém tadmílo, nolu ngok aipé-méːnamdo du:yé, kapé ngo ngok Abuké lulígnamkídí:dém tadla bík aipé-méːnamdo duːyardun.
11 Ngok méːpo nolukkolo duːyépé émna ngo sidém nolum lubidung odokké noluk méːpodé píːsíngkaːlangka. 12 Ngok lulígnamdé sidé, ngo kapé nolum ayaːdoji édémíːpé nolu akoné akoném aya:mínsulang. 13 Ajonkolok légaːpé sibinamdémyang bottéyaːné ayangé okkosin kamang.e 14 Ngo okkom lulíktagji édémbulum imílo nolu ngok ajoné.f 15 Ngo nolum pagbo émna gogmaːbo, kapila:né pagbo ruːtumdok gernam agerdém kinmang. Émpigeːla ngo nolum ajoné émna gogyé, kapéné ngo Abukolok oko okkom tattoji édé appíːdém ngo nolum kinmoto. 16 Nolu ngom balenmang, ngo nolum balentag odokké nolum gídopéla aːyem eːdopé, oko aːyedé duːyaryéji ngo tolíktag. Odo nolu ngok aminno okkoméi koyéji édéméi Abubí nolum biyé. 17 Akoné akoném ayaːmínsulang, édé ngok lulígnamdé."
Moːpísok Tayumnam
18 "Moːpísé nolum tayummílo, odo nolu kinnaːbo édé nolum tayumoːmaːdapé ngom tayumpoːto.g 19 Nolu moːpísokkaːmílo, moːpísé nolum bík aíkémpé ayaːyai; kapéné nolu moːpísok taniːmang; émpigeːla ngo nolum moːpísokkém balentag, odok-légaːpé moːpísé nolum tayumdag. 20 Ngok lubinam agomkídíːdém nolu méːpaːlang, 'Pagbokoné bík ruːtumdémyang bottéyaːmang.' Bulu ngom ipusirekamílo, bulu nolumsin ipusireye; bulu ngok agomém tatkamílo, bulu noluk agomémsin tadyé.h 21 Ngok amindok légaːpé bulu nolum ipusireye, kapilaːné séːko ngom mélíktang bulu kinmang. 22 Ngo gígeːla bulum lubimaːnamkaːmílo, bulu buluk imurra duːnamdém kinmaːyai. Émpigeːla, suːpag buluk paːpkídíːdok lupaksunan bulukké lambé katomaːbong. 23 Odokké séːko ngom tayumdagji bí ngok Abumésin tayumdag. 24 Oko agerém amme édíloːsin ikímaːji, ngo bulukkolo édémpin agerém imaːnamkaːmílo, bulu imurém imaːyai; émpigeːla suːpag ngo okkom itagji édém kaːto, odokké bulu ngoyim ngomna ngok Abumé tayumdag. 25 Émpigeːla buluk luroːdo adla léːnam agomdém ilet-gílednam légaːpé sémpé ikang, 'Okkosin kamaːpé bulu ngom tayumto.'i