Jisubí Abukotoːpé Gíkunan Lambédé
14
"Noluk asiném méːpinsumoyok; aRuːnémé méngkésulang, odokké ngomsin méngkésulang. 2 Ngok Ba:buké okumté bojéruːngko dungko dung. Odo dungko kamaːnamkaːmílo, ngo nolum lubiyai. Ngo odoːpé noluk légaːpé dungkoko moninsubikapé gídag. 3 Odokké ngo gíla noluk légaːpé dungkoko moninsubimílo, ngo lékoda gíladlangkula ngok dungkodoːpé nolum gíríksuyéku, ngo okolo duːyéji nolusin oddung duːmínyé. 4 Ngo okoloːpé gídakkuji édé lambédém nolu kindag."5 Tomasbí bím luto, ''Ruːtuma, no okoloːpé gídakkuji édém ngolu kinmang, édémpila kapé ngolu lambédém kinnayén?''
6 Jisubí bím luto, ''Ngo lambédé, ngo arodé, odokké ngo turnamdé. Ngokkoki Abukodoːpé gímaːmílo séːkosin gílaːmang. 7 Nolu ngom aropé kinnamkaːmílo, nolu ngok Abumésin kinyai. Suːpakkolokké nolu bím kintoboːsin kaːtobo:sin.''
8 Pilibbí luto, ''Ruːtuma, Abumé ngolum léngkantei éddéi ngolukképé píːdag.''
9 Jisubí bím lulatsuto, ''Pilip, noluk lédílo siddíko duːmínam lédupésin no ngom kintoman? Séːkoi ngom kaːtoji, bíːéi Abumé kaːto:bo. Édémpila kapé no lukan, "Abumé ngolum léngkankítei émna?" 10 Ngo Abukolo dung odokké Abubí ngokkolo dung émnamdém no méngkésumaːnei? Ngok nolum lubinam agomkídíːdém ngok aíké ilang-gílangki nolum lubimang; émpigeːla ngokkolo duːmínné Abubí bík agerém gerdag. 11 Ngom méngkésulang édílo ngo Abukolo odokké Abubí ngokkolo dung émna ludon. Nolu méngkésumaːmílo, méːpílaːmanam agerkídíːdok légaːpéi ngom méngkésulang. 12 Ngo nolum arodém lubidung, séːkobí ngom méngkésuyéji, bíːsin ngok gernam agerkídíːdém geryé; odokké édémbulumyaːsin bottéyaːné agerém bí geryé, kapéné ngo Abukotoːpé gídakku. 13 Nolu ngok aminno okkoméi koyéji, ngo édém ibiyé, édémpimílo Abubí Aoːdo luyitsunamém paːyé.b 14 Nolu ngok aminno okkoméi koyéji, ngo édém ibiru:yé."
Angunné Yalomé Mélígbinamdém Pesubinam
15 ''Nolu ngom aipé-méːdagmílo, ngok lulígnammém nolu iyé. 16 Odokké ngo Abukolok akon Lusíːbinéko kobiyé, odokké bí nolum édíloːsin mépagla gíkumaːné kaːdumsunéko biyé, 17 bí arolok Yalodé. Moːpísé bím toríksulaːma, kapilaːné moːpísé bím kaːbeksinmang odokké kinsinmang. Émpigeːla nolu bím kindag, bí noluk lédílo duːmíndung odokké nolukkolo duːmíntíyé.
18 Ngo nolum rokpanpé mépagmaːyé; ngo nolukkoloːpé gíladyéku. 19 Ajjiouko lédupé moːpísé ngom kaːbekkumaːyébo, émpigeːla nolu ngom kaːbegyé; kapilaːné ngo turra duːyé, nolusin turra duːyé. 20 Ngo ngok Abukolo dung, odokké nolu ngokkolo odokké ngo nolukkolo dung émnamdém odo longédo nolu kinyé.
21 Séːko ngok lulígnamkídíːdém tadgeːla édémbulu ibomdagji; bí édé taniːdé séːko ngom aipé-méːdagji; odokké séːko ngom aipé-méːdagji, ngok Abubí bím aipé-méːyé; odokké ngo:sin bím aipé-méːyé odokké ngo aíé bím léngkansuyé.''
22 Odo Judaːbí (Juda Iskortiabíːmang) bím luto, ''Émpigeːla, Ruːtuma, kapila no moːpísém aíém léngkansumaːpé ngolumong léngkansupé méːdun?"c
23 Jisubí bím lulatsutoku, ''Séːkai ngom aipé-méːmílo, bí ngok luyírnamém tadyé. Ngok Abubí bím aipé-méːyé, odokké ngolu bíkkodoːpé gíla bík lédílo duːmínyé.d 24 Séːkobí ngom aipé-méːmaːji bí ngok luyírnamém tadmaːyé. Noluk séː tadnam agomkídíːsé ngok aíkémang; édébulu ngom mélígné Abuké agomé.
25 Ngo noluk lédílo duːdakso séː agom appíːsém nolum lubidung. 26 Émpigeːla Lusíːbinébí, édé Angunné Yalodé, séːkom Abubí ngok aminno mélígbiyéji, bí nolum appíngém luyíryé odokké ngo nolum okkom luyírbitagji édémbulum méːpaːmoyéku.
27 Ngo noluk lédílo asin-ansíngém mépagbila gídakku, ngok asin-ansíngém nolum bidung. Ngo nolum moːpísok bikamémpé bimang. Noluk asiném méːpinsuyok, odokké bulum pésosinyok.e 28 Nolu ngok lunamém tattak, 'Ngo gípoyéku odokké nolukkoloːpé lékoda gíladyéku.' Nolu ngom aipé-méːnamkaːmílo, nolu méːpopénamamín, kapéné ngo ngok Abukoloːpé gídakku; kapilaːné Abubí ngomyang bottéyaːnédé. 29 Odokké suːpag édémbulum imangoːdapé ngo nolum lubitagbo, édémpila édílo édémpé iyéji, nolu odo méngkésuyépé. 30 Ngo noluk lédílo bojéko luposumaːbo, kapilaːné moːpísok migomdé gídobo. Bí ngom motablaːmang; 31 émpigeːla okkom ngok Abubí lulíktagji édémpépag ngo ido, odo moːpísé kinyé ngo ngok Abumé aipé-méːdag émnamdém. Édémpila daropto kajé gílaboi."f