Jisubí Luyírsunékídí:dok Alé-Írbinam
13
Gíboːla donam gíːdíːdok píngangoːma:dapé, édílo Jisubí bík Abukodoːpé gíkunan ayírdé píngangkaːbo émna kinsuton, moːpísok duːné bík aíːtaniːkídíːdém appíng ayírro ayangém léngkanto odokké bí simadodoːpé bulum ayaːtíto.2 Odokké yumé-apin dododo, Uiːbí Simonké ao Juda Iskortiaké asindo Jisumé yadla-kopakpé émna méːmoitobo. 3 Jisubí kindagai Abubí bík alaglo appíngém bitag, odokké bí Ruːnékolokké gídung odokké Ruːnékoloːpé gíladdakkubo émnamdém. 4 Édémpila bí apin dokodokké darobla bík gétémnam galugdém pítpaksugeːla bík ígíːdo dumérko yeːréksuto. 5 Odok lédupé, bí soriyangkolo assém pílengeːla bíkkol luyírsunékídíːdok allém írrobbito, odokké bík ígíːdok yeːréksunam dumérdokki titpu:bito.a 6 Bí Simon Pitorkodoːpé gínamé; Pitorbí bím luto, ''Ruːtuma, no ngok allémyé írbiyen?''
7 Jisubí bím lulatsuto, ''Ngo okkom iduːji édém no suːpag kinmang, émpigeːla édém no lédupé kinyéku."
8 Pitorbí bím luto, ''No, ngok allém édílo:sin írmaːyé."
Jisubí bím lulatsuto, ''Ngo nok allém írbimaːmílo, no ngok taniːpé itélaːmaːyé."b
9 Simon Pitorbí bím luto, ''Ruːtuma, ngok alloːsémma, ngok alaksémnaː tukkusémsin írtéːteiǃ''
10 Jisubí bím luto, ''Séːko írsutuːboːji, bík alloːdém írbinamdok ruːyipé bím írbikunamém lagimang, bík appíːdéi naré:dag; odokké nolu naréːla dung, émgom nolukkolok appíngé narémang. 11 Kapéné bí kinno:daggai séːko bím yadla-kopagyéji; édémpila bí luto, "Nolukkolok appíngé narémang."
12 Bí buluk allém írbinam lédupé, bí bík galugdém gétoku, odokké bík tetkodo tettoku, odokké bí bulum luto, "Ngo nolum okkom ibitoji édém nolu kindoyé? 13 Nolu ngom Luyírnélaː Ruːtum émna gogdag, noluk gognamdé kabodag, kapéné ngo éddíng. 14 Odokké suːpag, ngo noluk Ruːtumdéːla Luyír-abugeːla, ngo noluk allém írbitag, nolusin akoné akonké allém írbiruːpénamé. 15 Ngo nolum kaːyisunamko léngkanbitag, ngo okkom nolum ibitagji édémíːpé nolusin ilang.c 16 Ngo nolum arodém lubidung, pagbokoné bík ruːtumdémyang bottéyaːmang; odokké mélígnambí bím mélígnémé bottéyaːmang. 17 Nolu sémbulum kinmílo, odokké édémbulum ibommílo nolu ayang-paːné.d
18 Ngo noluk appíngké tayéːlo lumang; ngo kindag ngo séːkobulum balentuːji. Émpigeːla Ruːnék-gomugdé aroruːnam légaːpé édémpé ludung, 'Séːko ngok lédílo pitangém dojonsutoji, bí ngok kekonpé allém laksaːto.'e 19 Ngo nolum suːpag sém lubidung, édé imangoːdapé, odokké édílo édémpé iyé-gíyéji odo nolu kinyé édé taniːdé Ngo. 20 Ngo nolum arodém lubidung, séːkobí ngok mélígnam akomumkoném boríksudagji bí ngom boríksudag; odokké séːkobí ngom boríksudagji bí ngom mélígnédém boríksudag.''
Jisubí Bím Yadla-kopénédém Lulennoːbinam
(Moti 26.20-25; Mark 14.17-21; Luk 22.21-23)
21 Jisubí édémbulum lunam lédupé, bík asindé dunggu-dungama:pé ila luto, ''Ngo nolum arodém lubidung, nolukkolok aːko ngom yadla-kopagyé.''
22 Luyírsunékídíːdé akoné akoném ngengkaːmínsuto, bí séːkom lutosong émna bulu murkang. 23 Bíkkol luyírsunékídíːdok aːko, séːkom Jisubí aipé-méːdagaːji, bí Jisumé kégabdanna dungngai; 24 édémpila Simon Pitorbí pédyabla bím taukaːmoto, "Ngolum lukítei séːkon bí, sék légaːpé bí luton."
25 Édémpila bí édémíːpé Jisumé kérasula dunggeːla luto, "Ruːtuma, édé séːkon?"
26 Jisubí lulatsuto, ''Ngo séːkoméi séː batiːso pitaːdém jíːbudgeːla biyéji, édéi bí.'' Odo bí pitaːdém jíːbudgeːla Simonké ao Juda Iskortiamé bito. 27 Juda:bí pitaːdém laːríksudannaméi, Uiːbí bíkkolo angkang. Odokké Jisubí bím luto, ''No okkarém iyen édém lomdanna igorto." 28 Émpigeːla kapila Jisubí édém lutoji apin dola duːnékídíːdok aːkosin édém tatkintomang. 29 Kapéné Juda:bí murko-nébínammé, akke méngkang Gíːdíːdok légangé okkom lagidagji édémbulum rédopé ludung émna, émmamílo opannékídíːdém oːkaiko bitoka émna.
30 Juda:bí pitaːdém dodangeːla gílenpakkang. Odo yumedaggaboi.
Anu Lulígdé
31 Édílo bí gílenkaːji, Jisubí luto, "Suːpag Taniːké Aoːmé unjígmoyé, odokké bíkkolo Ruːnémé unjígmoyé; 32 Ruːnémé bíkkolo unjígmomílo, Ruːnébíːsin bím bík aíkolo unjígmoyé, odokké oddar bím unjígmoyé. 33 Ko:kangkídínga, ngo noluk lédílo bojéko duːmaːbo. Nolu ngom magoyé; ngo kapé Jiudikídíːdém ludungaji édémíːpé ngo suːpag nolum ludung, 'Ngo okoloːpé gíyéji odoːpé nolu gíalaːmang.' 34 Ngo nolum anu lulígnamko bidung, nolu akoné akoném ayangkaːmínsulang; ngo kapé nolum ayaːtoji, édémíːpé nolu akoné akoném ayaːlang.f 35 Nolukké akoné akonké légaːpé ayangé kamínsumílo, odokokki nolum ngokkol luyírsuné émna appíng taniyé kinyépé."
Pitorké Lupaksunamdém Jisubí Lunoːbito
(Moti 26.31-35; Mk.14.27-31; Luk 22.31-34)
36 Simon Pitorbí bím tauto, ''Ruːtuma, no okoloːpé gíyén?''
Jisubí lulatsutoku, ''Ngo okoloːpé gídagji nolu odoːpé suːpag gímínnaːmang, émpigeːla nolu lédupé gímínnaːyéku.''g
37 Pitorbí bím luto, ''Ru:tuma, kapila ngo suːpag nok lédulo gímínnaːman? Ngo nok légangé sibilaːdoːsin.''
38 Odo Jisubí lulatsuto, ''No ngok légangé aropéi sibilaːyén? Ngo nom arodém lubidung, no ngom léumkopé lupaksuma:dopé; porogé kikirikokpomaːyé."