Betaniːdo Jisumé Tulangki Írto
(Moti 26.6-13; Mark 14.3-9)
12
Gíboːla donam gíːdí:dok longkéng longé poːpéloːbo, Jisubí Betani:pé gíkang, okodé Lajarké doːlungé, séːkom Jisubí sikolokkém turmotoku. 2 Odo bulu bík légaːpé yumé-apiném kéːbi-réːbbito; Martaːbí apindém saglenbito, odokké Jisuké lédílo apin domínnékídíːdok araːdo Lajarbíːsin aːkai. 3 Odo Meriːbí airuːpé arékané yonsunammém bomaːla Jisuké alédo yonnígbito odokké bík dumítki Jisuké alédém notpu:bito. Odokké okumdo édé yonsunamdok nampodé nambungkang.4 Émpigeːla bíkkol luyírsunékídíːdok a:ko, Juda Iskortiaːbí, (séːko bím yadla-kopagyén), luto, 5 "Kapila sé: yonsunamsém kogeːla murkoːdém opanném bitoman? Odok murkong arédé dítag akolok gerra pa:nam murkongkíddíkai.'' 6 Bí opaném asinang-ola édé agomdém lumangai émpigeːla bí dopsongkai; odokké murkong sogéndém bí bomgabdagai, odok mékumsunamém bí méːsuméːsupé laːdungai.
7 Jisubí lulatsutoku, "Bím atéro:dém duːmoto, ngom agodo yusínam longédok légaːpé bí édé yonsunamdém mosídopé bitagai. 8 Opannékídíːdé noluk lédílo loːdém duːyaryé, émpigeːla ngo noluk lédílo loːdém duːmaːyé."
Lajarmé Mokepé émna Ruːsunam
9 Édílo bojégamko Jiudiyé Jisubí odo dung émna kinton, bulu odoːpé gído, Jisuké légangopémang Lajarmésin kangkaːpé gítéːdo, séːkom bí sikodokké turmotoku. 10 Édémpila abíné miríkídíːdé Lajarmésin mokepé émna ruːsuto.a 11 Kapilaːné bík légaːpé bojék Jiudiyé bulum mépagla Jisumé méngkésuto.
Jerusalemdo Jisuké Migom Kísapé Gíangkunam
(Mot 21.1-11; Mark 11.1-11; Luk 19.28-40)
12 Longkondo gíːdí:doːpé gíné bojékopé taniyé Jisubí Jerusalemdoːpé gído émna tatto. 13 Édémpila bulu kejur anném bomna bím ríksukolo réːbadlígla gílendo, "Osannaǃ" Írroi, Israelké migommé, séːkobí Ruːtumké aminno gíduːji, bí ayang-paːnéǃ"b
14 Kapé édém potindo adla léːtu:ji, odo Jisubí gadong-aoːko paːla odok tayéːdo saːto,
15 Jayonké omékídínga, pésoyok;
kaːtok, gadong-aoːkolok tayéːlo saːla,
noluk migomdé gído."c
16 Bíkkol luyírsunékídíːdé édém tatpoːdodo tatkintomang. Émpigeːla édílo Jisuké unjígnamdém kaːtoji, édémbulum bík légaːpé adla léːtagai odokké atkamdémpé bím ito émna odo bulu méːpaːtoku. d
17 Jisubí Lajarmé agodokkém goglen-gekula turmodokudodo bík lédílok duːmínné taniːkídíːdé édém ammem lukanbigoto. 18 Taniːkídíːdé bím ríksukolo gílennam légaːdé, bí édé méːpílaːmaːnam kanggodém léngkanto émna bulu tatto. 19 Odo Parosikídíːdé akoné akoném luto, "Nolu kangkítok, ngolu okkomsin ilaːmang, moːpísok appíngé bík lédulo gímínkaːboǃ''
Girik Tani:ékké Jisumé Manam
20 Odo séːkobulu gíːdí ayírdo kumkapé gísangkaji buluk araːdo Girik taniːékké dungngai.e 21 Bulu Pilipkoloːpé gído, séːkobí Galiliːdok Betsaidaːdokkai. Odokké bulu bím luto, "Ruːtuma, ngolu Jisumé kaːríksulíːdung."
22 Pilibbí gíla Andriuːmé lubito; odokké Andriubí Pilibmé gíjonsula Jisumé lubito. 23 Odokké Jisubí bulum lulatsutoku, "Taniːké Aoːmé unjígmonan ayírdé píngadobo. 24 Ngo nolum arodém lubidung, édíloːpé aːmko amoːbo oledla simaːyeji, édé atéroːpé ila duːyé; émpigeːla édé simílo, bojéruːngko aːyém eːyé.f 25 Séːkobí bík turnamdém aipé aipé-méːyéji bí édém yokpagmoyé, odokké séːkobí bík turnamdém sé: moːpíso aipé-méːmaːyéji, édém bí turyarné turnam légaːpé léːsíːdag.g 26 Séːkoi ngok agerém gerdoji bí ngok lédulo gímínruːpaːyé; odokké ngo okoloi duːji, odo ngok ager-gernédéːsin duːmínyé. Séːkoi ngok agerém gerdoji, Abubí bím ménggésuyé.
Jisubí Bík Sinamdém Lubinam
27 Suːpag ngok asinsé méngguméngamaːpé idung odokké ngo okko émna luyyan? 'Abu, ngom sé: ayírsokké mopíttei'. Ngo sé: ayírsok légaːpéi gítag, édémpila aiyé. 28 Abu nok aminé unjíkkaːlangkaǃ"
Odo tayéːtokké gomukko lulenkang, "Ngo édém unjígmotagbo, odokké ngo édém lékoda unjígmoyéku."h
29 Odok dagla duːné taniːkídíːdé édém tatto odokké bulu luto doːmíré mírkang. Akedé luto, "Tayéng-yaːmeko bím luposuto."
30 Jisubí luto, "Sé: gomuksé noluk légaːpé gídung, ngok légaːpémang. 31 Suːpag moːpísém kébaːbaːnan ayíré; suːpag sé: moːpísok migomdém ménpagyé.i 32 Émpigeːla édílo ngom mo:písokké gísaːboyékuji, odo appíng taniyém ngo ngokkodoːpé soa:yé." 33 Oko sinamki bí siyéji édém léngkanam légaːpé bí édé agomdém luto.
34 Taniːkídíːdé bím lulatsutoku, "Kiristobí loːdílongkípé duːyaryé émna ngoluk luroːdo attag. Émpém Taniːké Aoːmé gísaːruːboyéku émna no kapé lulangkan? Édé Taniːké Aoːdé séːkon?"j
35 Jisubí bulum luto, "Píaːdé noluk lédílo bojjarko duːmínmaːbo. Píaːla duːdodo nolu lambégílang; émmamílo kémmo nolum paːyé; séːkobí kémolo lambégídoji bí okoloːpé gídagji édém kinsumang.k 36 Édílo nolukkolo píaːdé duːji, píaːdém nolu méngkésulang, odo nolu píangké ommaːpé iyé." Édém lunam lédupé Jisubí odokké gípagla aíém bulukkolokké léːsisuto.
Taniːkídíːdok Méngkésumanam
37 Bí buluk kanggaːlo bojéruːngko méːpílaːmaːnam kanggodém léngkanto, émgom bulu bím méngkésutomang. 38 Édé lungor-luné Jisoyaké lunamdém ilet-gílednam légaːpé ikangː
"Ruːtuma, séːko ngoluk lubinamdém méngkésuton,
odokké séːkom Ruːtumké tornamdém léngkanton?"l
39 Odok-légaːpé, bulu méngkésulaːtomang. Kapéné Jisoyabí lékoda bulum luto,
40 "Bí buluk amigém miglumoto
odokké buluk asiném idmoto,
émmamílo bulu buluk amikki kaːbegyai,
odokké asinki méngkinyai,
odokké ngokkolo:pé gíladyaːkui,
odokké ngo bulum ésaːmoya:kui."m
41 Jisoyabí édém luto kapilaːné bí bík unjígém kaːto édémpila bí luto.n
42 Éddomang bojéru:ngkopé Jiudi migomésin bím méngkésuto, émpige:la bulum murong-okumdokké ménnenníkpéké émna Parosikídí:dém bulu pésola ludésutomang. 43 Kapéné bulu Ruːnéké luyitsunamdémyang tani:lok luyitsunamdém aipé-mé:ya:dag.
Jisuké Agomki Kéba:ba:nam
44 Odo Jisubí jé:la luto, "Sé:kobí ngom méngkésudagji, bí ngommo méngkésumang émpigeːla ngom mélígnédémsin méngkésudag. 45 Sé:kobí ngom ka:begduːji, bí ngom mélígnédémsin ka:begdag. 46 Ngo moːpísoːpé píang kísapé gídung, odo sé:koi ngom méngkésuyéji, bí kémolo du:yarma:yé. 47 Séːkoi ngok luyírnamém tadgeːla édémpé ikumaːmílo; ngo bím kébangém baːmang; kapéné ngo moːpísém kébang bangkolo gímang émpigeːla moːpísém turbokolo gídung. 48 Sé:kobí ngom lupagdagji bí ngok luyírém tadma; bím kébaːbaːnéko dung; ngok lunam agomkídíːdé gíngabdí longédo bík kébaːbaːbínépé iyé. 49 Kapéné ngo ngok aíké ilang-gílangki lusumang; émpigeːla ngom mélígné Abubí ngo okkom lupénamméji odokké kapé édém lupénammén ngom lulíktak. 50 Odokké ngo kindag bík lulígnamdé turyarné turnamdé. Odok-légaːpé ngo okkom luduːji, Abubí ngom lubidopé lunamdém ngo lubidung."