Jisuké Jikigel Gíangkunam
(Moti 21.1-11; Luk 19.28-40; Jon 12.12-19)
11
Bulu Jerusalempé gípíngkíramdodo, Olib adiké Betpajpélaː Betani doːluːpé gíto. Jisubí bíkkol luyírsuné annyikoném sémpé lula mélíkto, 2 “Noluk kaːpangko do:lungolo:pé gíkang, nolu odoːpé gíaːdodoi édíloːsin taniː sangkímaːnam gadong-aoːko rínna léːdopé paːyé, édém tanggeːla so:pé bomnangku. 3 Sé:kai 'Nolu kapila édém taːdun'? émna taumílo, lulang, 'Ruːtumbí sidém lagiladung, odokké sidém lomdanna méladlígbiyéku.'"4 Bulu gíla lambé ru:yi mo:rongkolok yabgo kérangkolo gadong-aoːko rínna léːdopé paːto odokké édém bulu taːto. 5 Odok dagla duːné taniːékké bulum tauto, "Nolu okkom idun, gadong-aoːdémnei taːdun?"
6 Bulu Jisuk lukamardémpé bulum lubito, odokké taniːkídíːdé bulum mélíktoku. 7 Édílo bulu gadong-aoːdém Jisukodoːpé bomatokun; bulu odok tayéːdo buluk génamkídíːdém uːlíkto, odokké Jisubí odok tayéːdo tetto. 8 Bojéruːngkopé taniyé buluk génamém lambédo pulíkto, akedé annékané réngkéngém uːlíkto okodém bulu aríglok paka. 9 Bík kéraːpélang lamkupé gíné taniːkídíːdé jéːropkang, "Osannaǃa Ruːtumké aminnok séːko gíduːji bí ayang-paːné."b 10 Ngoluk abu Debitké gíaːné migomdokodé ayang-paːnéǃ Tayéngaryaːto Osannaǃ"
11 Jisubí Jerusalempé gía:la kumli:pé gíkang. Bí appíngém gígola kaːto, odokké yummayírnammé, yíːlaːnyidém gíjonsula bí Betaniːpé gílenkang.
Tajík Amíːdém Jisuké Pelignam
( Moti 21.18,19)
12 Longkondo édílo bulu Betaniːdokké gítokuji, Jisubí kénongkang. 13 Mo:té:pé tajík amíngko anné:kadopé ka:la, bí odok aːyém paːyenei émna gíto. Édílo bí odoːpé gípíːtoji, bí okkomsin paːtoma émpigeːla annéyaːyaːdopé paːto, kapéné édé tajík aːyé eːnan ayírmangngai. 14 Odo bí ísíːdém luto, “Nokkolok lékoda sé:kosin a:yém dopaːpé lagimang.”
Bíkkol luyírsunékídí:dé bík lunamdém tatto.
Jisubí Kumliːdoːpé Gíaːnam
(Moti 21.12-17; Luk 19.45-48; Jon 2.13-22)
15 Jerusalempé gípíːnammé, Jisubí kumli:do:pé gíanggeːla odok réla-kola duːnékídíːdém ménnenamto. Bí murkongém anírmobinékídíːdok tebulkídíːdémnaː séːkobulu parong kola dungngaji buluk tedgéngkídíːdém níngkulubamníkto.c 16 Odokké bí sé:komsin kumli:dok okkomsin rénam-konam attarém joːpadmotomang. 17 Odokké bí bulum luyírra lubito, “Sidém adla lé:maːnei, ‘Ngok okumdém takam réngamsok kumko-okumé émyé? Émpigeːla nolu sidém rodgonélok diːrumpé imopakto.”d
18 Abíné miríkídí:déːla luro luyírnékídí:dé édém tadla bím mokenan lambéko maropkang, kapéné bulu bím pésokang, kapila:né taniːappíːdé bík luyírém tadngaksula taddagai.
19 Odokké édílo yummayírka:ji, bulu nogordok ruːyipé gílenkang.
Tajik Amíːdok Sannam
(Moti 21.20-22)
20 Rokondo bulu odok gípadla gídodo, bulu édé tajík amíːdém léppírbokkébo sandopé kaːto. 21 Pitorbí mé:pa:la bím luto, “Rabbi, kangkítok! Nok pelígnam tajík amíːdé sanpakkang!”
22 Jisubí bím luto, “Ru:némé mé:jíksulang. 23 Ngo nolum arodém lubidung, sé:koi séː adi:sém, 'Sokké ngursaːla gaːnélo géjísuːta émna lumílo, odokké bík asindo méːmo kamang émpigeːla bík lunamdémpé iyérung émna méngkésumílo, édém bíkképé ibiruːyé. 24 Odok-légaːpé ngo nolum lubidung, nolu okkoméi kumna koyéji, édém paːtagbo émna méngkésumílo, odo édé nokkéruːbo. 25 Édíloi nolu dagla kumdoji, nolukké séːkkaiké kekonpé oːkaiko kamílo; bím méːyinsulang, édémpimílo, noluk Abubí séːko tayéng-amoːto duːji bíːsin noluk imurém mé:yinsubiyé."e 26 f Odokké no mé:yinsumaːmílo, tayéng-amoːtok duːné noluk Abubí:sin noluk pa:bém méːyinsubimaːyé.”
Jisuké Ilang-gílanam Tayéːdo Taunam
(Moti 21.23-27; Luk 20.1-8)
27 Bulu lékoda Jerusalempé gípíːtoku, odokké édílo Jisubí kumli lottaːdo gígo:la dungngan, abíné miríkídí:dé, luro luyírnékídí:déːla midumkídí:dé bíkkodo:pé gído. 28 Odokké bulu bím tauto, "No oko ilang-gílangki sémbulum idun odokké sé:ko nom sém ilaːdopé ilang-gílangém bitang?”
29 Jisubí lulatsutoku, “Ngo nolum taupénamko tauyé. Ngom lulatsubilangku, odo ngo oko ilang-gílangki sémbulum idoji édém lubipé. 30 Jonké baptis binamdé tayéng-amo:tokkaːnei, tani:lokkan? Ngom lukíteiǃ”
31 Bulu buluk araːdo édém luposugeːla luto, "Tayéːtokké émna ngolu lumílo, bí tauyé, 'Nolu kapila méngkésutoman?' 32 Émpigeːla ngolu, 'Taniːlokké émna lumílo....' Kapilaːné bulu taniːkídíːdém pésodaggai, kapéné Jonbí aron lungor-lunékai émna bulu appíngé méngkésudagai. 33 Édémpila bulu Jisumé lulatsuto, “Ngolu kinmang.”
Jisubí bulum luto, “Ngo:sin oko ilang-gílangki sémbulum idoji nolum lubige:mang.”