Mépansunam
(Moti 19.1-12; Luk 16.18)
10
Jisubí odokké gípagla Jordon Abuːdém gíkola Judia mongkédoːpé gíkang. Kéréngkopé taniyé lékoda bík kéraːdo gíkumsunammé, bík ibom-gíbomnam kísapé bí bulum luyírbito.2 Parosi ékké gíla bím ankaːpé émna tauto, "Ngoluk luroːdok atkamdémpé taniːkoné bík yamnédém mépakpaːdolang?"
3 Bí bulum lulatsuto, "Musiːbí nolum okko émna lulíktang?"
4 Bulu luto, “Musiːbí taniːkoném mépagnam adlígnamko adlílaːdopé odokké yamnédém mélígdokupé lulíktag."a
5 Jisubí bulum luto, "Noluk asinkídíːdok tornam légaːpé bí édém nolukképé adbitag. 6 Émpigeːla ruːlenpílendokkébo 'Ruːnébí bulum néːpélaː milboːpé ruːtag.'b 7 Édémpila sidok légaːpé taniːkoné bík anédémnaː abudém mépagyé odokké bík yamnédok lédílo lékoyé, 8 odokké annyidé amír akkongkopé iyé.' Édémpila bulu annyikopé iyarramaːbo, émpigeːla atérongkopé iye.c 9 Odok-léga:pé okkom Ru:nébí ruːpumsutagji, édém taniyé mopansupé lagimang.”
10 Odok lédupé édílo bulu lékoda okumdo dungngan, luyírsunékídíːdé odok agomdém Jisumé taukaku. 11 Bí bulum luto, “Sé:kobíi bík yamnédém mépaggeːla midaːmotendokuji, bí bík kekonpé benggonam agerém-gerdag.d 12 Odokké yamnédé bík milbo:dém mépagla akon milbongkolo midaːmotenkumílo, bí benggonam agerém-gerdag.”
Jisubí Ko:kangém Peyubinam
(Moti 19.13-15; Luk 18.15-17)
13 Taniːékké Jisubí bík alakki koːkangkídíːdém riːyidbidopé émna bulum gíabodo, émpigeːla luyírsunékídíːdé bulum morítto. 14 Édílo Jisubí édém ka:suton, bí aglíːla bulum luto, "Koːkangkídíːdém ngokkosoːpé gíamoto, bulum duːriyo; kapéné Ruːnék migomdokodé sémbulumpinékídíːdok légangé. 15 Ngo nolum arodém lubidung, sé:kobí Ruːnéké migomdokodém koːkang kísapé toríksuma:yéji bí odoːpé gíalaːmaːyé." 16 Odokké bí bulum bík alagdo bosanggeːla buluk tayéːlo bík alakki riːyidbigeːla bulum peyubito.
Mirémné Taniːdé
(Moti 19.16-30; Luk 18.18-30)
17 Odok lédupé Jisubí lékoda gírobdokudo, taniːko bíkkodoːpé duksaːla bím lébí:tumna kumna luto, "Ainé luyír-abu, turyarné turnamdém paːnam légaːpé ngo okkom ipaːyén?"
18 Jisubí bím luto, "No kapila ngom ainé émna ludun?” Ainé séːkosin kamang, Ruːnébí atéroːdéːmín ainén. 19 Lulígnamkídí:dém no kindag: ‘Tani:yém mokeyok, benggo:yok, dopso:yok, ammem aromaːném lubikunépé iyok, yadgoːyok, noluk ané-abbom ménggésulang.”e
20 Bí bím luto, “Luyír-abu, édé appíːdém ngo ko:kadokkébo ibomnadung.”
21 Jisubí bím kangge:la bím aya:pé-méːla luto, “Nokké abangko pí:ramduːda, gíkangku, odokké nokké okko duːji édé appíːdém kopaggeːla opanném bita, odo nokké tayéng-amoːto murkong-kumsungé kayéku; odokké gíla ngok lédílo gímínto." 22 Édé lunamdém tadla bík migmodé kémíkpakkang. Odokké bí mé:dírra gíkangku; kapéné bí kínggípé mirémnékkai.
23 Jisubí ngenggogeːla bíkkol luyírsunékídíːdém luto, "Mirémné taniːkídíːdokképé Ruːnék migomdokodoːpé gíanamdé, éddíko torné agerénǃ"
24 Édém tadla luyírsunékídíːdé méngaksukang. Émpige:la Jisubí lékoda luto, “Koːkangkídínga, Ru:nék migomdokodo:pé gíanamdé éddíko torné agerénǃ 25 Uːtkoné pési amiglok durkonamdé émmumé émpigeːla mirémné taniyé Ru:nék migomdokodoːpé gíanamdé airuːpé torné ageré."
26 Odo bulu aigampé méngaksugeːla bím tauto, "Émpém séːko turnamém paːyén?"
27 Jisubí bulum kangge:la luto, “Édé taniːképé pagnam agermang, émpigeːla Ruːnéképé pagnam ageré; kapéné Ruːnéképé pagmanammé okkosin kamang."
28 Pitorbí bím luto, “Kangkítok, ngolu appíngém mépaggeːla nok lédulo gímíndung!”
29 Jisubí luto, "Ngo nolum arodém lubidung, séːkobulu ngok légaːpélaː tatpon lutaddok légaːpé okumém, bírrangém, bírmangém, anném, abbom, ommangém odokké amongém mépagla gíduːji, 30 bí suːpakké séː ayírsoːsin odogbuluk légaːpé língkoko paːbadla paːyé. Ipusirém paːdaggom séː moːpíso bulu língkoko bojéyaːpé okumém, bírrangém, anném, ommangém odokké amongém paːyéku; odokké a:péné ayírdo bulu turyarné turnamdém paːyé. 31 Émpigeːla gíponékídíːdok bojéruːngko léduyé odokké lédunékídíːdok bojéruːngko gípoyaːyé."
Jisubí Lékoda Bík Sinamdém Lunobinam
(Moti 20.17-19; Luk 18.31-34)
32 Odok lédupé bulu Jerusalempé gísanan lambédok gíladuːdodo; Jisubí bulum gígéto. Luyírsunékídíːdé méngaksukang odokké buluk lédulo gímínné taniːkídíːdé péssamkang. Odokké bí yíːlaːnyidém lékoda gíyodbogeːla bíkkolo okko kapiyéji édémbulum lubito. 33 “Kangkíto, ngolu Jerusalempé gísa:dag, odokké Taniːké Ao:mé abíné miríkídí:doglaː luro luyírnékídí:dok alaglo yadla-kolígyé. Odokké bulu bím imurnép-sappagla Jiudiman taniːkídí:dok alaglo tolígyé. 34 Bulu bím lukaːyé, takirém sugrumyé, sabukki dínggeːla bím mokeyé. Odokké loum lédupé bí turyéku."
Jemskéla: Jonké Kumna-lunam
(Moti 20.20-28)
35 Odo Jibediːké aoːkumsudé, Jemsbí:la Jonbí bíkkodoːpé gíla bím luto, "Luyír-abu, ngolu okkoméi koyéji édém ngoluk légaːpé itei émna ngolu méːdag."
36 Bí bulum luto, "Nolu ngom okkom iteika émna méːdang?"
37 Odo bulu bím luto, “Ngoyikolok aːkom nok lagbíkpé odokké akoném nok lakkepé nok unjígné migomdokodo tedmolang."
38 Émpigeːla Jisubí bulum luto, "Nolu okkom koduji édém nolu kinmang. Ngo oko duːgémf doyéji édé duːgdém nolu dolayélang, émmamílo ngo kapé siyejig édé sinamdémpé nolu silayélang?”
39 Bulu bím lulatsutoku, “Ngolu pagyé.”
Jisubí bulum luto, “Ngok donam duːgdém nolu dola:yé odokké ngok sinamdémpé nolu silaːyé,h 40 émpigeːla ngok lagbíkpélaː lakkepé tedmonamdé ngokkolo kamang. Édé tetkodém sék légaːpé moninsutuji édé bulukké."
41 Édílo íyí:dé édém tadbektoji, bulu Jémskélaː Jonké tayéːlo aglíng sangkang. 42 Édémpila Jisubí bulum lékopé gokkumsugeːla luto, "Nolu kindag, moːpísok taniː séːkom réngam tayéːlo migompé tolíktagji, bí buluk tayéːlo ruːtumpé idag; odokké buluk bottén-taniːkídíːdé buluk tayéːlo ilíngém idag." 43 Émpigeːla noluk araːlo édémpé imaːyé; noluk araːdo séːkobí bottaryaːnép ilíːdang bí noluk pagboruːpé ipaːyé. 44 Odokké noluk araːdo sé:kobíi miropé ilíːdang, bí appíngké pagbopé ipaːruːyé. 45 Kapéné Tani:ké Ao:bí bíkképé agerém-germokolo gímang émpigeːla agergerbikolo gítag, odokké bojékom dorpídbikunam légaːpé bík turnamdém bito."
Miglun Bartimiubí Ka:pangkangku
(Moti 20.29-34; Luk 18.35-43)
46 Odok lédupé bulu Jeriko:pé gído. Jisubíːla bíkkol luyírsunékídí:dé, lékopé bojéruːngko taniː lédílo édé nogordokké gílenkang, odo lambé ruːyido Timauské ao Bartimius émnam miglun kogonéko tedla dungngai. 47 Édílo bí Najareddok Jisubí odok gípaddag émna tatpaːsutoji, odo bí jé:ropkang, “Debitké ao, Jisu, ngom aya:teipén!”
48 Bojéru:ngko taniyé bím morídla asoːpé duːdopé luto, émpigeːla bí jéːyangoːkang, "Deditké aoːa, ngom ayaːteipénǃ"
49 Jisubí dakkang odokké luto, “Bím gokta.”
Édémpila bulu miglunédém gogla luto, "Méːpola dagroptok, bí nom gogdag." 50 Bík gasordém érpaksudange:la, bí sumsaːdanna Jisuké kéraːdo:pé gído.
51 Jisubí bím tauto “Ngo nok léga:pé okkom iteika émna no méːdang?”
Miglun taniːdé bím luto, "Rabbi, ngom kaːbegmoteikui."
52 Jisubí bím luto, “Gíkangku, nok mé:jíksunamdé nom aimo:toku.” Oddar bí kaːbekkangku odokké bík lédulo lambédo gímínto.