شاستر جاڻڻ واۯان آن فرِيسِي پنٿ ري ماڙھُوئان سين ھُوشيار
23
1 پَڇي پرڀُو يسُوع آپري چيلان آن ماڙھوان ري ميڙ نا ڪھيو تہ، 2 ”شاستر جاڻڻ واۯا آن فرِيسِي پنٿ واۯان سنت مُوسيٰ را قانون اوھان نا تو سمجاسين۔ 3 پڻ جين اِيشوَر را حُڪم اوھان نا سيکاۯي ، اُوئان سجا حڪمان نا مڃيا آن اُوئان واتيان تي هليا۔ پڻ اُوئان ري ڪريل ڪم تي متان هليا، ڪِي تہ جين او سيکاۯي تا اين او ڪري ڪوتا۔ 4 او ڀاري ڀار ٻڌي ماڙھوان ري کوئان تي تو رکي تا پَڻ آپ اُوئي ڀار نا ھٿ ئي ڪو تا ڇٻائين۔ 5 او آپرا سجا ڪم ماڙھوان نا ڏيکاۯڻ سارُون ڪرين تا، اِيئي ري ڪري او آپري شاستر ري آيتان سين ڀرل پٽين وڏين تا ڪري آن وڏا ڪُرتا پيهرين تا۔ 6 او دعوت ۾ اُونچي جگھا تي ٻيسين تا آن مندران ۾ خاص جگھا تي ٻيسڻ پسند ڪرين تا ۔ 7 اُوئان رو خيال اَھي تہ ماڙھُو اَسان نا بازار ۾ نمي هَٿ ڏئين، آن اَسان نا ’ گروجي‘ ڪھين۔ 8 پڻ اَوهين گرُو متان ڪھرايا، ڪِي تہ اَوهين سجا ئي هيڪي ٻيجي را ڀائي اَھو، آن اوھانجو رگو ھيڪ گرُو ھُون اَھان۔ 9 اَوھان نا اِيئي دُنيا ۾ ڪھسي نا بہ آپرو پتا ڪھڻ نہ کپي، ڪِي تہ اوهانجو ھيڪ ئي پتا اَھي، جڪو سُرگ ۾ اَھي۔ 10 آن نڪو وۯي اَوھان نا گرُو سڏائڻ کپي ڪِي تہ اَوھان رو ھيڪ ئي گرُو اَھي جڪو مسيح اَھي۔ 11 اَوھان ۾ جڪو سجان سين وڏو اَھي اُوئي نا ننڍيو ٿي ٻيجان ري شيوا ڪرڻ کپي ۔ 12 جڪو آپرو آپ نا وڌِيڪ سمجھي تو، اُوئي نا اِيشوَر گھٽ سمجھسي۔ پڻ جڪو آپ نا گھٽ سمجھي تو، اِيشوَر اُوئي نا گھڻي عزت ڏيسي۔پرڀُو يسُوع رو رياڪاران نا جانٺڻ
۔ 13 اي رياڪاران، شاستر جاڻڻ واۯا آن فرِيسِي پنٿ واۯا، اَوھان تي ڏُک اَھي ڪي تہ اَوھين سُرگ ري راج رو دروازو ماڙھُوئان سارُون بند ڪري تا ڇڏو نہ تو اَوھِين اُوئي ۾ جائو تا نہ وۯي جڪو جاڻ ري ڪوشِش ڪري تا اُوئان نا جاڻ ڏيو تا۔ 14 ڪِتي نہ مصيبت اَھي اَوھان سارُون، شاستر جاڻڻ واۯا آن فرِيسِي پنٿ واۯا،اي رياڪاران اَوھِين رنڏولان را گھر ڦُوۯو تا آن آپ نا ٺاهُوڪا ڏيکاۯڻ سارُون وڏين وڏين دُعائين ڪرو تا، اوھان نا تہ آپو گھڻي سزا جُڙسي۔ 15 ڪِتي نہ گھڻي مصيبت اَھي اَوھان سارُون، شاستر جاڻڻ واۯا آن فرِيسِي پنٿ واۯا۔ اي رياڪارو، اَوھِين ڪِي ھيڪي ماڙھُو نا ڌرم تي لي آڻ سارُون سُڪي ڌرتِي آن سمُندر تو لتاڙي تا جائو، پڻ جڏھين او اوهانجي ڌرم ۾ آئي تو، تڏھين اُوئي نا اَوهين آپ سين وڌِيڪ خراب ڪرو تا جين او اوهانجي جين نرگ ۾ جائي۔ 16 مصيبت اَھي اَوھان سارُون اي اَنڌا اگواڻان اَوھِين ڪھو تا تہ ’جڪو مندر رو قسم کڻسي تہ او ٻڌل ڪو اَھي پڻ جڪو مندر ۾ پيل سون رو قسم تو کڻي او ٻڌل اَھي‘ 17 اي مُورک انڌان اِيئان ٻيهان ۾ ڪيھڙو وڌِيڪ اَھي ،سون يا مندر جِڪي سون نا پويتر ڪريو اَھي؟ 18 اَوھِين اين پڻ ڪھو تا تہ، ’جڪو ٻليدان ڪرڻ واۯي جگھا رو قسم کڻي تو تہ اُوئي رو ڪئين ڪونهي، پڻ جڪو ٻليدان ڪرڻ واۯي جگھا تي ڏنل شئي رو قسم کڻي تو تہ او اُوئي نا ضرور پورو ڪرسي۔‘ 19 اَوھِين ڪتا انڌا اَھو؟ اِيئان ٻيهان ۾ ڪيھڙي شئي وڌِيڪ اَھي، ٻليدان ڪرڻ واۯي شئي يا او جگھا، جڪو ٻليدان ڪرڻ واۯي شئي نا پويتر ڪري تِي؟ 20 اوھان ۾ ڪوئِي ٻليدان ڪرڻ واۯي جگھا رو قسم کڻي تو، او نہ رگو ٻليدان ڪرڻ واۯي جگھا رو قسم کڻي تو، اِيئان سجيان شئيان رو پڻ قسم کڻي تو جڪو اُوئي تي رکَل اَھين ۔ 21 جڏھين ڪو اِيشوَر ري وڏي مندر رو قسم کڻي تو، تڏھين او نہ رگو وڏي مندر رو قسم کڻي تو، پڻ او اِيشوَر رو قسم کڻي تو جڪو اُوئي ۾ رھي تو۔ 22 جڏھين ڪو ماڙھُو آڪاس رو قسم کڻي تو، او اِيشوَر ري گادي رو قسم کڻي تو آن اُوئي رو قسم کڻي تو جڪو اُوئي گادي تي ٻيٺل اَھي۔ 23 اي رياڪارو، شاستر جاڻڻ واۯا آن فرِيسِي پنٿ واۯا اَوھان تي اَفسوس! تہ اَوهين ڦُودني، وڏف، جيري تي تہ ڏسون حصو اِيشوَر ري نان تي ڏيو تا، پڻ اوھان سنت مُوسيٰ ري لِکيل حُڪمان ري وڏين وڏين واتيان نا ڇڏي ڏنين اَھين، جين اِنصاف آن رحم آن اِيمان نا ڇڏي ڏنو اَھي۔ لازمي ھتو تہ اي پڻ ڪرنت آن او پَڻ نہ ڇڏنت۔ 24 اَوهين ٻيجان ري اگواڻِي تو ڪرو تا، پڻ اَوهين آپ انڌا اَھو، اَوھِين پاڻِي ۾ پيل مکي نا ڏيکي ڪڍو تا پڻ سجو سارو اُٺ ريڙهي جائو تا۔ 25 مصيبت اَھي اَوھان سارُون اي فرِيسِي پنٿ واۯا آن شاستر جاڻڻ واۯا، اَوهين اندر را پلِيت اَھو، اوهانجو جيھڙو حال ٿيسي، ڪِي تہ اَوهين گلاس آن پليٽ رو ٻاھرلو پاسو ڌوئي اڇو تا ڪرو پڻ اُوئي رو مهينلو پاسو ٻاهرلي پاسي ري جين ڌوئي اڇو ڪوتا ڪرو۔ جين کاڌي پيتي ري شئيان سين او ڀريل اَھين، اين اوهانجو مَن لوڀ لالچ آن ٺگي سين ڀريل اَھي۔ 26 اي فريسي پنٿ واۯا اَوهين موۯگا انڌا اَھو، پھلڪا اَوهين آپ آپري مَن نا صاف ڪرو، آن پَڇي اُوئي رو ٻاھرلو پاسو صاف ٿي جاسي ۔ 27 مصيبت اَھي اَوھان سارُون فرِيسِي پنٿ واۯا آن شاستر جاڻڻ واۯا! اَوهين اَڇيان قبران ري جين اَھو جڪو ٻاھرلي پاسي ٺاهوڪين ڏيکڻ ۾ آئين تين، پڻ اُوئان مهيِن مُڙدان رين ھڏين آن ھر نمُوني ري گندگي سين ڀريل اَھي ۔ 28 بلڪل ايھڙي نمُوني اَوھِين پڻ ماڙھُوئان نا ظاھري تو ڌرمِي ڏيکڻ ۾ آئو تا، پڻ اوھانجو مَن رگو رياڪاري آن ڀُونڏائي سين ڀريل اَھي۔
رياڪاري رِي سزا
29 مصيبت اَھي اَوھان سارُون اي فرِيسِي پنٿ واۯا آن شاستر جاڻڻ واۯا! اي رياڪارا! اَوهين اِيشوَر ري نياپو ڏيڻ واۯان را قُٻا ٺهرائو تا آن سنتان رين قبران نا سڻگارو تا۔ 30 اَوھِين اين پڻ ڪھو تا ، جي اَسِين ٻاپ ڏاڏان ري ڏِينھان ۾ هونت ، تو اَسِين اِيشوَر ري نياپو ڏيڻ واۯا سنتان ري خون ڪرڻ ۾ اُوئان ڀيۯا ڪو ٿيا هونت۔ 31 اين ڪھي اَوهين آپ ثابتي ڏيو تا تہ، اَوھِين اُوئان رو اولاد اَھو، جڪان اِيشوَر ري نياپو ڏيڻ واۯان نا ماري ڇڏيا۔ 32 تو پَڇي جائي، جين خُون ڪرڻ رو ڪم اَوھانجي ٻاپ ڏاڏان شُروع ڪريو ھتو، او اَوهين ڀلين پورو ڪرو۔ 33 اي سرَپو آن سرپان را ٻچا! اوھان نا هميشہ ري سزا جُڙسي، اَوھِين نرگ ۾ ضرور جاسو؟ 34 ايئي ري ڪري ھُون اوھان وٽ ايشوَر رو نياپو ڏيڻ واۯا نا، آن عقل واۯا نا، آن شاستر جاڻڻ واۯا ماڙھُوئان نا ميلھيس، پڻ اوھان ڪينهڪ نا سولي تي چاڙھي ڪوڪا ھڻائي مارئي ڇَڏسو، آن ڪينهڪ نا آپري مندران ۾ چاٻَڪ هڻسو، آن ھر شھر شھر آن ھر گان گان جائي اُوئان ري وانسي پڙي تنگ ڪرسو۔ 35 ايئي ري ڪري دُنيا ۾ جڪو اِيشوَر ري وات تي هلڻ واۯان را خُون ٿيسي ،اُوئان سجان ري خُون ري سزا اِيشوَر اوھان نا ڏيسي، اِيشوَر ري وات تي هلڻ واۯي هابل سين لي ، برڪيا رِي ڏِڪري زڪرياہ ري خُون تائين جڪي نا اِيشوَر ري مندر ۾ پويتر جگھا تي آن ٻليدان چاڙهڻ واۯي ري وچ ۾ اَوھان ماريو ھتو۔ 36 ھُون اَوھان نا سچ ڪھان تو تہ اُوئان سجان ماڙھُوئان ري خُون ري سزا اِيشوَر ايئي زماني ري ماڙھُوئان نا ڏيسي۔“
پرڀُو يسُوع رو يرُوشلم شھر واۯان سارُون ڏُک ڪرڻ
37 ”يرُوشلم واۯان اي يرُوشلم واۯان اَوھين اِيشوَر رو نياپو ڏيڻ واۯان را خُوني اَھو ڪي تہ جڪان نا اِيشوَر اَوھان وٽ ميلھي تو اُوئان نا اَوھِين پٿران سين ماري ڇڏو تا، جيھڙي نمُوني ڪُڪڙي آپري ٻچيان نا آپري پنکان ھيٺا ڀيۯا ڪري تي ايھڙي نمُوني ھُون پڻ اَوھان نا ڪِتا ئي دفعا ڀيۯا ڪرڻ سارُون سڪيو پڻ اَوھان ڪو مڃيو۔ 38 جوئو اِيشوَر اوهانجو گھر ڇڏي ڏنو اَھي۔ وڏو مندر تباھ آن برباد ٿي گيو اَھي ۔ 39 ھُون اَوھان نا سنڀۯائون تو تہ اَوھِين اج سين لي پَڇي مِنا اِتي تائين ڪِنهِي ڏيکو جِتي تائين ائين نا ڪهاسو تہ سڀاگو او اَھي جڪو اِيشوَر ري نان سين آئي تو۔“