2
Yẹ́sụ̃ ijá ágó azare rá rĩi
1 Ọꞌdụ́ ũꞌbí ku ã vúgá, Yẹ́sụ̃ ongwi Kãpẹ̃rẹ̃nẹ́ọ̃ gá ꞌdĩ, õfú na acá ẹ́’ị́ ꞌa sĩ rá. 2 ꞌDĩsĩdú laki evũ láka orĩkî jó sĩ dẹ́, jótị gá sâ kãré pá tị̃jó o’e ị̃yọ, oko onze ãꞌiní õfú losó rĩi. 3 ꞌBá sụ evũ ẹnzị̃kî ágó azare rá rĩ trõ. 4 Kí ãꞌiã mãka caka Yẹ́sụ̃ dí kpé, ꞌbá ã rũtaka jótị gá dẹ́ sĩ, ọtụkî ọrụ jó dị, olũkî jódị̃ lụ̃ asõ gbọ kãré Yẹ́sụ̃ ã mbãrẽe gá rĩ ní gá. Oko ịsị́kî lĩsírã ágó ꞌdĩ ã rũlare gá rĩ Yẹ́sụ̃ ã andagá. 5 Yẹ́sụ̃ onde ãꞌiã a’ị̃ ni ꞌdĩ, ọꞌjọ ágó azare rá rĩ ní, “Mâ ꞌbarâ, nyâ enzĩ eꞌberu rá.”
6 Ẹsụ́ sáã nã sĩ, lãpõnyiã zị̃tị cárá Mũzê dí ịnị̃ka rĩ urĩkî laki lélé, iꞌdókî tã urãlé ãꞌiã ásị́ gá ꞌdíni, 7 “Kí mãꞌdị́ ꞌdĩ ká tã ꞌjọ ꞌdíni ãꞌdu sĩ yã? Mãꞌdị́ ꞌdĩ ká Rũbãngã ni uꞌdá! Mãꞌdị́ enzĩ eꞌbere wã rĩ tẽ Rũbãngã ꞌi ku yã?” 8 Mgbesâ Yẹ́sụ̃ ọnị̃ tã ãꞌiã ásị́ gá rĩ ọ̃tẹ, oko ọꞌjọ ãꞌiní, “Ãnyí tã urã ꞌdíni ãꞌdusĩ? 9 Ẽpé rĩ íngõ ꞌi, ꞌjọka ágó azare rá ꞌdĩ ní, ‘Enzĩ nyídí eꞌberu rá ꞌi’, kusâ ꞌjọka, ‘Nyĩnga ọrụ, nyĩꞌdụ nyâ lĩsírã nyĩmụ’? 10 Kí ãnyiní nị̃jó Ọ́rị Mãꞌdị́ a dí ní mọ́rị́ a’ã vũ dị gá enzĩ eꞌbejó wã,” Yẹ́sụ̃ ọꞌjọ ágó azare rá rĩ ní, 11 “Máꞌjọ nyíní, nyĩnga ọrụ, nyĩꞌdụ nyâ lĩsírã, nyĩmụ ꞌbãrụ́.” 12 Ágó ꞌdĩ onga ọrụ, ọꞌdụ anâ lĩsírã, oko ọmụ laki andagá sĩ. Tã ridére ꞌdĩ oꞌbã ꞌbá ꞌdĩꞌbâ a’ụ̃ cí, oko ịcụ́kî Rũbãngã ni ọꞌjọkî, “Gbụ̃sâ ãmãnde tã ridére ꞌdíni ꞌdĩ kurũ.
Lẹ́vị̃ ni ụngwẹka
13 Yẹ́sụ̃ ongwi mẽri tị ị̃dị́, laki evũ anídí, oko iꞌdó ãꞌi ịnị̃ka. 14 Anâ mụre rĩi, onde Lẹ́vị̃ ni ọ́rị Ãlẹ̃fẹ́ọ̃ orĩ vụ̃rụ́ kãré mụ̃sọ́rọ́ tare gá rĩ ní gá. Yẹ́sụ̃ ọꞌjọ láka, “Nyekó mâ vú,” Mgbesâ Lẹ́vị̃ onga ọrụ oko Yẹ́sụ̃ ã vú.
15 Sáã Yẹ́sụ̃ ã tã nyare Lẹ́vị̃ dí jó gá rĩ sĩ, ẹsụ́ ꞌbá ũꞌbí mụ̃sọ́rọ́ taka rĩi, enzĩꞌbá zị̃tị trõ, orĩkî ãlu Yẹ́sụ̃ tị ꞌbá anâ vú okoka rĩ tị trõ kákî tã nya. 16 Lãpõnyiã cárá Mũzê dí ịnị̃ka ụngwẹlé Farịzẹị́ã b rĩ ondekî Yẹ́sụ̃ ká tã nya enzĩꞌbá trõ oko ꞌbá mụ̃sọ́rọ́ taka rĩ tị trõ ꞌdĩ, ọzịkî ꞌbá Yẹ́sụ̃ ã vú okoka rĩ tị, “Ká tã nya enzĩꞌbá trõ oko ꞌbá mụ̃sọ́rọ́ taka rĩ trõ ãꞌdu sĩ yã?” 17 Yẹ́sụ̃ eri tã ꞌdĩi ꞌdĩ, ọꞌjọ ãꞌiní, “ꞌBá rụ ẹꞌbwẹ rĩ olẽ ãkímũ ku, kí rárĩ ꞌbá rụ lọ’ụ rĩi. Mẹ́ẹmụ́ ꞌbá anda rĩ ụngwẹre áwu ku, kí enzĩꞌbá ụngwẹre áwu.”
Ọzịkî Yẹ́sụ̃ ni ãbị́rị́ taka dị.
18 Ẹsụ́ ꞌbá Yõánã Bãtị́sịtã ã vú okoka rĩ Farịzẹị́ã zị̃tị trõ orĩ ãbị́rị́ tare. ꞌBá zị̃tị tị evũ ọzịkî Yẹ́sụ̃ ni, “ꞌBá Yõánã ã vú okoka rĩ tị Farịzẹị́ã trõ ká ãbị́rị́ ta, kí ꞌbá nyâ vú okoka rĩ uta ãbị́rị́ ku ãꞌdusĩ yã?” 19 Yẹ́sụ̃ oko a’ị̃, “ꞌDị́ amụ mãꞌdị́ ị́zị́-átá dí kãrámã lãꞌdụ́ dí gá rĩ kákî ãbị́rị́ ta kẹ́ẹsụ́a ani olú ãꞌi trõ yã? Kákî idéa kpé jõ ãdĩ ani ãꞌi trõ ꞌi.c 20 Kí sáã ị́zị́-átá ni ꞌdụjó pí rĩ kẹ́ẹmụ́ rá oko ọꞌdụ́ na nã sĩ, kákî ãbị́rị́ ta rá.”d
Yẹ́sụ̃ ã lịnị̃ kéendé tã úꞌdí rĩi
21 “Mãꞌdị́ zị̃ ãlusâ bõngú ọ̃kụ rĩ ã lị́rị́ oꞌbwĩre bõngú úꞌdí rĩ sĩ na ị̃yọ. Jõ kidé rá, bõngú úꞌdí rĩ ká ọ̃kụ rĩ sĩ rá oko kóꞌbãa lị́rị́ na ká rinzá rá. 22 Ongo mãꞌdị́ ãlusâ vị́nọ̃ úꞌdí rĩ tõre kụ́ꞌdọ̃ ọ̃kụ pi ũnzí rĩ ní ꞌa na ị̃yọ. Jõ otõ rá, vị́nọ̃ ꞌdĩ ká kụ́ꞌdọ̃ nã idã rá, kôko ká osú vụ̃rụ́, oko kụ́ꞌdọ̃ ni sâ kô’e kónyí ãkó. Kâ, ká vị́nọ̃ úꞌdí rĩ tõ kụ́ꞌdọ̃ úꞌdí rĩ ní ꞌa áwu. ”
Ópí Sãbátũ dî ꞌi
23 Sãbátũ zị̃ sĩ, Yẹ́sụ̃ tị anâ mãju trõ ã vũre gá ámvụ́ ãnyá dí tị sĩ, anâ mãju iꞌdókî ãnyá lẹ́tị mị rĩ ã dị̃ ni unyõka. 24 Farịzẹị́ã ꞌdĩ ọꞌjọkî aníní, “Nyĩnde, kákî tã cárá ã lẽlé ku rĩ idé Sãbátũ sĩ ãꞌdusĩ yã?” 25 Yẹ́sụ̃ oko a’ị̃, “Ãnyĩlã tã Dãvị́dẹ̃ ã idélé sáã ãbị́rị́ ãꞌi zajó ꞌbá anídí trõ rĩ kurũ yã? 26 Kĩnyã Ãbĩátã ã olúre ãmbá azĩꞌbá dí ꞌi rĩ, Dãvị́dẹ̃ okwi jó Rũbãngã dî ní ꞌa, oko onya mũgãtĩ azĩlé Rũbãngã ní rá rĩ rá oko okẽ zị̃tị ꞌbá aní trõ rĩ ní. Kí ẹsụ́ cárá sĩ mũgãtĩ ꞌdĩ olẽru tẽ azĩꞌbá tã azĩka Rũbãngã ní rĩ kunya nĩ.” 27 ꞌDĩ ã vúgá, Yẹ́sụ̃ ọꞌjọ ãꞌiní, “Sãbátũ oꞌbãru ꞌbá ní, óꞌbã ꞌbá Sãbátũ ní ku. 28 ꞌDĩsĩdú Ọ́rị Mãꞌdị́ dí ni ópí Sãbátũ dî ꞌi.