3
Yẹ́sụ̃ ijá mãꞌdị́ dí ẹꞌbwẹre rá rĩ Sãbátũ sĩ.
1 Ọꞌdụ́ zị̃ sĩ, Yẹ́sụ̃ ọmụ jó lemú dî ní ꞌa. Ẹsụ́ ágó zị̃ dí ẹꞌbwẹre rá rĩ láka. 2 Farịzẹị́ã zị̃tị orĩ ani ụrwẹ̃re ꞌdị́ ká ágó ꞌdĩ ijá Sãbátũ sĩ rá yã sĩ, áwusĩ ní ãꞌi kịsịkị̃ dú ani. 3 Yẹ́sụ̃ ọꞌjọ ágó ꞌdĩ ní, “Nyẹmụ́ nyĩmba ꞌbá ꞌdĩ andagá.” 4 Yẹ́sụ̃ oko ọzị ãꞌi, “Cárá Mũzê dí olẽ íidé ãꞌdu áwu Sãbátũ sĩ? Íidé tã losó rĩi kusâ tã ũnzí rĩ, ári lidĩ ọ̃lẹ̃ ộꞌdị ꞌbá áu?” Kí ꞌbá ꞌdĩ olú ecĩ. 5 Onde ãꞌi mbgí angalã trõ, ãꞌdusĩku ásị́ na orĩ káazá ꞌbá ꞌdĩ ã ásị́ olúka okpo sĩ. Oko ọꞌjọ ágó ꞌdĩ ní, “Nyijũ nyâ dí.” Ijũ ꞌdĩ, dí na o’e losó. 6 ꞌDĩ ã vúgá, Farịzẹị́ã ꞌdĩtị oyíkî ãngwé, ovũkî oko iꞌdókî tã tị amáka lemúꞌbá ópí Ẹ̃rọ́dẹ̃ dí ã vú okoka rĩ trõ Yẹ́sụ̃ ni ꞌdịjó.
Laki ovũ Yẹ́sụ̃ ã vúgá mẽri tị
7-8 Yẹ́sụ̃ tị ꞌbá anâ vú okoka rĩ trõ ovũ mẽri tị, laki ãmgbụ́ engákî okokî ãꞌiã vú Gãlĩléã gá sĩ, oko Yụ̃dẹ́ị̃ gá sĩ zị̃ꞌbâ engá Yẹ̃rụ́sãlẹ́mẹ̃ gá sĩ, lọgọ zị̃ꞌbâ Yụ̃dẹ́ị̃ ꞌa rĩ ní gá sĩ, Ị̃dụ́mịã gá sĩ vúa lọgọ Jọ̃rọ̃dánọ̃ dí gá sĩ oko kãré ĩré-ĩré Táyã tị Sĩdónẽ trõ rĩ ní gá sĩ. ꞌBá ꞌdĩꞌbâ evũ anídí ãmãlã erikî tã anâ idélé rĩ rá. 9 Laki ꞌdĩ ã olúka nzá sĩ, Yẹ́sụ̃ ọꞌjọ ꞌbá anâ vú okoka rĩ ní kõꞌbãkî ị́ꞌbọ́ gãgã rĩ bábá óca ani cere mgbí ku. 10 Anâ ꞌbá ijáka ũꞌbí sĩ, ꞌbá rụ unzi rĩ kákî ꞌbá umwĩ dúdu ãꞌi keló Yẹ́sụ̃ ni trõ. 11 Jõ ꞌbá orí ũnzí trõ rĩ onde ani nĩ, mgbesâ kákî zọ̃ anda arụ́ vụ̃rụ́ ũzũza trõ, “Nyi Rũbãngã ã Ngwâ ꞌi.” 12 Kí Yẹ́sụ̃ icarã ãꞌi kĩlí-kĩlí kwá kọ̃ꞌjọkî laki ní ku ani ãꞌdi ꞌi yã ꞌi.
Mãju mụdị́lị́mbị́ ẹ̃rị̃ rĩ upẽka
13 Yẹ́sụ̃ ọtụ ꞌbẹ́ õmvo gá, ụngwẹ ꞌbá anâ lẽlé rĩ oko evũkî anídí. 14 Ongo upẽ ꞌbá mụdị́lị́mbị́ ẹ̃rị̃ ụngwẹ ãꞌi mãju, kolúkî dú aní trõ oko ani kụzẹ dú ãꞌi lẹꞌjọ́ Rũbãngã dí njere, 15 oko dúdu kolúkî mọ́rị́ orí ũnzí udójó wã rĩ trõ. 16 ꞌBá mụdị́lị́mbị́ ẹ̃rị̃ anâ upẽlé rĩ ãꞌi: Sị̃mọ́nẹ̃ ni (Yẹ́sụ̃ ã rụ ꞌdalé Péturũ rĩ ꞌi.), 17 Yãkọ́ꞌbọ̃ ọ́rị Zẹ̃bẹ̃dẹ́ọ̃ tị adụ́pị̂ ni Yõánã trõ (Yẹ́sụ̃ oꞌda ãꞌiã rụ́ cókí Bọ̃nãjẹ́sị̃ (ékwí na ‘Ẹ̃yị́lõvi ã ꞌbõrõnzi’ ꞌi).), 18 Ãndẽréã ꞌi, Pị̃lị́pọ̃ ꞌi, Bãtọ̃lọ̃mẹ́ọ̃ ꞌi Mãtẹ́ọ̃ ꞌi, Tọ́masị̃ ꞌi, Yãkọ́ꞌbọ̃ ọ́rị Ãlẹ̃fẹ́ọ̃ ꞌi, Tãdẹ́ọ̃, Sị̃mọ́nẹ̃ ni rĩre olúre ávọ́rọ dú rĩ ꞌi, 19 oko Yụ́dã Ị̃sịkãrị̃ọ́tẹ̃ ni mãꞌdị́ Yẹ́sụ̃ ni azịre rĩ ꞌi.
Ọꞌjọkî Bẹ̃lị̃zẹ̃bụ́lị̃ ni Yẹ́sụ̃ ꞌa rụ gá
20 Nã ã vúgá, Yẹ́sụ̃ okwi jó zị̃ gá, ị̃dị́ laki otaru anâ lãgagá eꞌbedú omãkî tã nyalé kpé ꞌbá anâ vú okoka rĩ trõ. 21 ꞌBá anídí jótị gá rĩ eri tã ꞌdĩi ꞌdĩ, ovũkî ani ekóre, ãꞌdusĩku ꞌbá ꞌdĩ ọꞌjọ, “Imalĩ rá.”
22 Oko lãpõnyiã cárá Mũzê dí ịnị̃ka ngaka Yẹ̃rụ́sãlẹ́mẹ̃ ꞌa sĩ rĩ ọꞌjọ, “Ãnyĩnde Bẹ̃lị̃zẹ̃bụ́lị̃ a ni rụ arụ́! Ká orí udó mọ́rị́ orí ũnzí ãmbá rĩ ã kẽlé láka rĩ sĩ.” 23 ꞌDĩsĩdú Yẹ́sụ̃ ụngwẹ ãꞌi onze tã ãꞌiní lẹꞌjọ́ ékwí sĩ oko ọzị, “Sĩtánĩ ká Sĩtánĩ do wã yã?” 24 Jõ sụ́rụ́ ãlu rĩ anzuru rá, sụ́rụ́ nã olú ku. 25 Oko jõ ꞌbá jótị ãlu gá rĩ anzuru rá, jótị nã omba ku. 26 Jõ Sĩtánĩ ká óꞌjá ꞌdị orí ũnzí zị̃ꞌbâ anâ aselé rĩ trõ, kị́tẹꞌdẹ̃a atĩ ꞌa rá, anâ opĩ olú ku. 27 Ãnyeri! Sĩtánĩ oviru mãꞌdị́ mọ́rị́ trõ rĩ trõ vĩ. Ãlusâ mãꞌdị́ zị̃ kwire ágó mọ́rị́ trõ rĩ dí jó gá tã anídí eráre na ị̃yọ jõ umbé ani kpá kurũ ꞌi. Ká ani umbé kpá kádi tã jó gá rĩ ra.
28 “Mãꞌjọ ãnyiní tã ándá rĩi, enzĩ ãnyidí kwící oko lãꞌdá Rũbãngã ã rụ gá rĩ ká reꞌbe ãnyiní wã, 29 kí jõ mãꞌdị́ oꞌda Éndí Ọlẹ rĩ áwu, enzĩ anídí kwá ká reꞌbe kpé, kọ̃ꞌjọru idé enzĩ olúre tádu rĩi.” 30 Yẹ́sụ̃ ọꞌjọ tã ꞌdĩ ẹsụ́ ꞌbá zị̃tị ọꞌjọ, ani orí ũnzí trõ.
ꞌBá ẹꞌbụ̃ Rũbãngã dí idéka rĩ Yẹ́sụ̃ ã kaka ꞌi
31 Nã ã vúgá, Yẹ́sụ̃ ã adụ̂nzị tị ãꞌiã endẽ tị trõ ecákî ꞌdĩ, umbákî ãngwé oko ọzẹkî mãꞌdị́ zị̃ ani ụngwẹre. 32 Ẹsụ́ laki urĩ oce Yẹ́sụ̃ ã bara mgbí oko ọꞌjọkî láka, “Nyéndẽ tị nyâ adụ̂nzị trõ umbá ãngwé kákî nyị̃ndụ̃.” 33 Ọzị ãꞌi, “Méndẽ tị mâ adụ̂nzị tị trõ ãꞌi ãꞌdu ꞌbá yã?” 34 Oko onde ꞌbá urĩka ani ceka mgbí rĩ ꞌdĩ, ọꞌjọ ãꞌiní, “ꞌDĩꞌbâ méndẽ tị mâ adụ̂nzị trõ. 35 Mãꞌdị́ Rũbãngã ã ẹꞌbụ̃ idére rĩ ani mâ adụ́pị̂ ꞌi, mâ amvọ́tị̂ ꞌi, oko méndẽ ꞌi.”