NEHEMƖƖ SƐBƐ
Gɩrɛ sɛbɛɛkɛ n mɩɩnɩ
Thɩmɩɩ nɔ ca bɩɛlɩkɛra Ɛsɩdɩrasɩɩ sɛbɛ mɩɩnɩ gɛr Nehemii sɛbɛ cooro. Cacara, sɛbɛ bɩɛlla Ɛsɩdɩrasɩɩ sɛbɛ na Nehemɩɩ sɛbɛ kɔɔ do. Sɩ Nehemi ɓanɔnɛ sɛbɛsɔɔkɛ wɩ n kpɩɛrnɩ dɩ ɔɔ thɛthɛɛ khere gɩ. Bɔ bɩɛl tɩbɩla Nehemi nakha Ɛsɩdɩrasɩ bonɩ jidaar kɔɔ do. Tɩɩ khɩɩ a do, aa do bonɩ jidaara’. Tɩɩ kɔ̃tɩ̃ɩ a do, da n do thɔma Artajɛɛrsɛsɩɩkɛ dɔnɩ Pɛrsɩ jamanaa cɔ. Ɔɔ kɔ̃tɩ̃ haarɛ hʋɛ a jala Jerujalɛm, a naarɛ thɩ̃ɛ fãgadaraa bilo, na mosũ ƴaaldaa bilo na tɩbɩla bilo, le ɔɔ caa dʋɔ, (1.1-2.10). Dɩ mɔ̃ a danɩ le, lãlaarda ɩkhasɔ ɩɩrnanɛ lãʋ, sɩ ɔɔ toosɔ jɔɔ buluule dɩ wɩ bir mɩ Jerujalɛm gʋʋsɔ, (2.11-7.72). Dɩ bɔɔkɛ kpaanɛnɩ, a jɩɩlɛ Ɛsɩdɩrasɩra, ɔbɔɔkɛ wɩ n kɔɔ cʋʋnɩ Thãgba fʋɔr kpa jɛ kɔ̃tɩ̃ɩ. Dɩ kpa jɛraalera, Ɛsɩdɩrasɩ sor Thãgbaa jɔfʋ sɛbɛ a ha tɩbɩla. Dɩ Levɩɩ məlsɔ n tire jɔfʋ kɩrʋ, dɩ wɩ finə thɩmɩa a na ha wɩrɛɛkɛ na n nɩɛnɛnɩ ebirə thɩmɩɩra’. Dɩ tɩbɩla bire jaa awɩ kpɩɛrɩkɛ wɩ kɔɔ tini nakha Thãgba dɩɩ do daphaa. (8.1-10.40). Ɔbɔɔkɛ Nehemi gbanɩ fɩl caar dɩɩdɩɩkɛ dɔnɩ fãgadaraa fɩl a thɔɔna thɩ̃ɛ pɩ, (11.1-12.26), a thɔɔrɛ go phʋɔl ɓoleekɛ wɩ cʋʋnɩ ɔbɔɔkɛ wɩ gbɛbɩnɩ gʋʋ pɩ, (12. 27-43). Agɩpɩ dɩ naa thɩ̃ɛ Thãgba fʋɔrdaa bilo. (12.44-13.31) Gɩrɛ n nɛrɔnɩ tibil ca ʋrɛ Nehemi donɩ sɛbɛraakɛra wɩ n wenanɩ ɔɔ i, gɩ n nɩ sarɛ casɩ dɩ a dor thɔ̃ do tibil na kpɩɛr tidaar thɩ̃ cʋʋrɛra na tɩɩ telẽe na ‘la’la. A n bɩɛlɛ Thãgba bɔɔ fɛʋ ɔɔ thɔ̃sɔraakɛ fɛʋ a n cʋʋnɩ.