NEHEMƖ 1

NEHEMƖƖ SƐBƐ

Nehemɩɩ Thãgba bɩɛl Jerujalɛm thɩmɩɩra

1 Mɛr Nehemɩ, kɛ dʋɔnɩ Hakalɩaa bikuuni thɩmɩɩ ha gɩrɛ. Artajɛɛrsɛsɩ donɩ jamana, ɔɔ yɛna kpelena, Kisile^a sɩpora, mɩ kɔɔ hale Suuji dɩɩraakɛ dɔnɩ dɩ kɔ̃tɩ̃ɩ. 2 Dɩ ɩ̃ omɩsɔɔra, bɩɛlɩkɛ wɩ n weni Hananɩ, na ɩkhaa tibilsɔ ther Juda bǝǝnnǝ a pɔ; dɩ̃ bule wɩ Juifisɔɔda, kɛ dɔnɩ wɩrɛ kɔɔ thɛnɩ dee dʋʋra a kɛr bir, na mɔ̃ Jerujalɛm hanɩ. 3 Dɩ wɩ so marɛ aa: Wɩrɛ thɛnɩ dee dʋʋra a kɛr bir, wɩ hale bɔ kɔ̃tɩɩna, na yicurura. Gʋʋkɛ diǝni Jerujalɛm dɩɩra ɓɩɛlɛ, dɩ dɔɔ hɩ̃ lõosɔ.

4 Ɔbɔɔkɛ mɩ nɩɛnɩ thɩmɩɩr ca gele, mɩ toore a bɩ, dɩ haar kʋɛ mɩ a cʋʋna wi jɔjʋɔ. Mɩ lire nʋɔ a bɩɛlna Thãgbaakɛ hanɩ le ƴũu. 5 Dɩ mɩ sor mɩɩ: Pha! Thãgba Kɔ̃tɩn, Thãgbaakɛ hanɩ le ƴũu, Thãgba wabʋʋkɛ n kɔnɩ maar, fɛrɛɛkɛ teleneni afɩ ʋlfɛra, fɩ n fʋrɔrɛ afɩ ha bulo wɩrɛraakɛ naan fɩnɩ dɩ wa n hɩɩn afɩ jɔfʋsɔ. 6 Hɩnɛ sa pɛ nũu bɔɔbɔɔ a to mɛr afɩ thɔ̃daarɩ bɩɛl. Mɩ hakɛ afɩ ƴɛbʋrɔ nɛnɛ̃ dɩ ma n bɩɛl fɩ dɩwɩlʋ na dɩtɩnɔ dɩ ma n pɛ Ɩjɩrayɛl bɩsanana, kɛ dɔnɩ afɩ thɔ̃dara; dɩ ma n cana wɛr Ɩjɩrayɛl bɩsanaa sopuusɔ, kɛ dɔnɩ sopuusɔɔkɛ sɩ kɔɔ cʋʋ farnɩ. Mɛrɛ na ɩ̃ too, sɩ cʋʋrɛ sopuu. 7 Sɩ cʋʋ farɛ puure na sobɔr. Sa kɔɔ hɩɩn afɩ jɔfʋ na afɩ so na dɩɩrɛɛkɛ fɩ kɔɔ hanɩ afɩ thɔ̃daar Mʋɩja'. 8 Mɩ n bɩɛl fɛr, jɛna thɩmɩɩrɩkɛ fɩ kɔɔ sonɩ afɩ thɔ̃daar Mʋɩjɩra aa: Ado na jɩɩl sobɔra ga, ma bɩ̃bɩlã nɛr ca kpalaa thɩ̃thɩɩn na faa. 9 Sɩ ado nɩ bir a kɛr mɛrɛra, a na hɩɩn ɩ̃ jɔfʋsɔ, a na cʋʋ gɩ, adorakɛ wɩ kɔɔ ti nɩ faa ƴɔɔ fɩ̃ɩ, thɩ khu paar, sɩ ma bire na kpa nɩ lera a na jɛ, a na kɛrna nɩ na birnǝ paarɩkɛ mɩ phiirni ɩ̃ i n tɔɔrɔ. 10 Afɩ thɔ̃dara wɩ do, a dona afɩ tookɛ fɩ taanɩ na afɩ puno kɔ̃tɩ̃, na afɩ fãga. 11 Pha! Kɔ̃tɩn, mɩ n bɩɛl fɛr, pɛ mɛr afɩ thɔ̃daarɩ bɩɛl na afɩ thɔ̃daarsɔɔkɛ hananɩ yaalɛ wa n ma fɩ, awɩ bɩɛl nũu. Cʋɛ nĩikɛ thɩ̃ɛ n jal bɔɔ mɛr afɩ thɔ̃daara, a cʋɛ mɩ ɩ̃ 'lɛ bɔ jɩɩr kuunnaakɛ.

Dabɔɔle jamanaa ta sɛdaar mɩ kɔɔ do.