ƐSƖTƐƐR THƖMƖ
Asierisia jamana gbɛbɩrɛ fɛtɩ kɔ̃tɩ̃ɩ. \ref Dan 5.1-4; Mark 6.21-23
1
1 Kuun bɩɛl kɔɔ gɩ da n do Asierisi. A dor jamana a fʋna Ɛ̃dɩ dɩɩ a jalna dana Etiopi dɩɩra, dɩ hɩɩn dɩ gbulona tamaa na kpelẽ makoɲɔ, ɔɔ bɔɔ thɩ̃ɛsɔɔkɛ ka. 2 Ɔbɔɔkɛ a gbanɩ dɩɩ, a too ɔɔ fãga too pa jamana cʋɔra le Suuji awɩ dɩ kɔ̃tɩna, 3 ɔɔ balãther yɛra, a gbɛbɩrɛ fɛtɩ kɔ̃tɩ̃ɩ, a wena ɔɔ minisisɔ, na ɔɔ thɔ̃ dodara: Pɛrsɩ na Mɛɛdɩ sɔrasɩ kɔ̃tɩna ɓibi, na tɩɩ kɔ̃tɩna, na wɩrɛ dɔnɩ kɔ̃tɩna dɩ gbulonesɔra. 4 Jamanaale nɩna wɛr ɔɔ lẽlẽ thɩ̃ ɓɔ̃sɔ, na ɔɔ i dʋbɩɩkɛ ɓɔnanɩ ka. Dɩ fɛtɩɩle gbaar bɔɔ. Gɩ cʋʋrɛ sɩpora maadõ. 5 Ɔbɔɔkɛ wiresɔɔle kanɩ pɩ, jamana bire gbɛbɩ fɛtɩ kpɩɩ wo a wena Suuji dɩdara fɛw: lɛ̃lɛ na bɔdara fɛw a pɔna ɔɔ jɛ phʋ̃ pa. Dɩ fɛtɩra cʋʋrɛ wire makoɲɔ. 6 Faramũ bulona na dasɛna kpakpakpa kɔɔ hale dɩ wɩ linǝ pɛ̃ bulona na pɛ̃ sɛ birǝ himǝ himǝ a jalna linǝ ɓalãɓɔnaakɛ wɩ cʋʋnanɩ dɛ bulona, a puu. Wɩ kɔɔ thɩɩnɛ dɛ na dɛ bulo too pa gbana, kɛ hɔnɩ phɩ̃ paar, paarɩkɛ wɩ kpanɩ kpõkorõo, a maarɔ boka ɓɔnaakɛ n hɩlanɩ a do dadʋ̃ʋsɔ, na dabulona na dabirǝ. 7 Ɲɔ ɲɔda, caar dɩɩdɩɩkɛ wɩ cʋʋnanɩ dɛ, gɛr wɩ n sɛna taan. Jamana kɔɔ ber dɩvɛ̃ na bɩ̃ bulole a faa thɩɩra, dɩɩ ƴɔ. 8 Ntɛ n ɲɔr mɔ̃ a nanɩ, gɩdonɩ jamana sor ɔɔ thɔ̃darara wɩ hana ntɛ mɔ̃ a n ƴaalnɩ. Aa wɩ cʋɛ ga n da wɩrɛra ɩnɩ wenɩ. 9 Dɩ jamanaa khɛr Vasɩtɩ gbɛbɩrɛ dakha fɛtɩ a wena ɔɔ alãkha khɛra, dɩ wɩ toole ɔɔ koo gbasara.Jamana weere ɔɔ khɛr Vasɩtɩ a faa. \ref Jǝn 3.16; 1Pɩ 3.1-7
10 Wire makoɲɔ wirera, jamana hire taan, dɩ daw hii haarra na sobɔr. Dɩ a wer kona makoɲɔɔkɛ wɩ tini kpɔ, dɩ wɩ ha ɔɔ thɔna, dɩ wa n hɩɩn ɔɔ khɛrsɔ, awɩ isɔ ha gɩrɛ: Mehumã, Bɩjɩta, Haarbona, Bɩgɩta, Abagɩta, Jetaar na Karakasɩ. 11 Jamana we wer a so war, wɩ kpa ɩnɩɩ khɛr Vasɩtɩ, a subi jamana kpɩɛ, wɩ pɔnaa ɩnɩɩ ƴɛra. A ƴaalɛ a nɩna ɔɔ minisisɔ na tɩbɩla fɛʋʋkɛ thɛnɩ paar dɩɩdɩɩsɔra a pɔ, mɔ̃ ɔɔ khɛr bɔrnɩ; sobɔr gɩ wer, khɛr gɩɩkɛ bʋɔnɔnɩ ka. 12 Dɩ konaale jaal mɩɛ jamanaa khɛr Vasɩtɩ gɩrɛ ɔɔ ko sonɩ. Dɩ bo ɩna n jala'. Dɩ jamana ɩɩrna nĩkhi khɩɩ. 13 Agɩpɩ dɩ mɩɩna ɔɔ fɩl 'laardaraakɛ jɛnɩ thɩ̃ɛ tibili hʋ hanana, na cʋʋ paar dɩɩdɩɩsɔɔra; gɩdonɩ a thɩ̃ɛ na ka jamanaa bilo, wɛr n hɩnɛ. 14 Ɔɔ fɩl 'laadarasɔraale, wɩrɛ wɔrɔnaanɩ jɔɔ ha wɩrɛ: Kaarsena, na Setaar, na Adɩmata, na Taarsɩsɩ, na Merɛsɩ, na Maarsena, na Memukã. Pɛrsɩ na Mɛɛdɩ minisisɔ gɩɩkɛ jamana hananɔnɩ ha pɛrɛ, a ha wɩ to pa bʋɔ jamana dɩɩra dɩ wa n do kha thɔma. 15 Dɩ jamana bule wɩ ayɩ: «Ado sɩ yɩ sɩ hɩnɛ asɩ jɔfʋra, aɲe teena sɩ cʋɛ Vasɩtɩ, werakɛra mɩ wɩɩnɩ dɩ bo?»
16 Dɩ Memukã so jamanana na ɔɔ thɔ̃ dodaraa ƴɛra: «Vasɩtɩɩ cʋʋ caakɛra a cʋʋnɩ ga do fɛr jamanana gɩ thar dɩbara ga, sɩ gɩ thar dakha minisisɔra na konana fɛʋʋkɛ hanɩ afɩ jamana dɩra. 17 Khɛra fɛw na nɩɛrɛ gɩrɛ a cʋʋnɩ, dɩ ga thɔɔ wɛr na pɛr wa n 'lũ awɩ ko. Dɩ wa sorakɛ a na yɩ: "sɩ Asierisi jamanaa khɛrakɛ ɔɔ ko thɔnɩ a pɔ ɩnɩɩ ƴɛra, aa boaa'? 18 Dɩ nĩnakɛ Pɛrsɩ na Mɛɛdɩ minisisɔɔ khɛrsɔ na nɩɛrɛ, mɔ̃ jamanaa khɛr cʋʋnɩ ɔɔ kora, dɩ wa khɩɩrɛ ga cʋʋ caalera fɛw. Dɩ mɔ̃ wa n buni awɩ kosɔa', ga thɔɔrɛ awɩ kosɔ dɩ wa gba nĩkhii. 19 Jamana, ado fa ture, dɔ wɩ cʋʋ sɛbɛ gɩ the gɩ pɩɛr Vasɩtɩ, a na n dǝdi sa jɩɩl fɛr jamanaa ƴɛkʋʋlɔa', sɩ fɩ gba ɔɔ too pa fɩ ha tɩɩ kpɩɩkɛ baanɛɛnɩ; sɩ wɩ kherẽ thɩmɩɩlera wɩ pɛr Mɛɛdɩ na Pɛrsɩsɔɔ jɔfʋra, kɛ wa punoni na birnǝ khiru bã. 20 Ado sɛbɛɛlera ther, dɩ khɛra fɛw, afɩ jamana dɩ kʋkʋʋraakɛ nɩɛr, wa hananɛ cʋrɛ awɩ kosɔra, a kuun dɔɔ harakɛ mɔ̃». 21 Dɩ kpɩɛrɛɛle dar jamana na ɔɔ thɔ̃ dodarara. Dɩ kpa gɩrɛraakɛra Memukã sonɩ. 22 Dɩ a pɛrɛ dɩ wɩ thɔna sɛbɛ dɩ gbulonasɔra fɛw, na ca thɩmɩɩr dɩɩdɩɩ, dɩ gbulõ dɔɔ na ɔɔ ca thɩmɩɩr na ɔɔ kherẽ ƴɛ. Wɩ sor le sɛbɛrara ayɩ: "kuun wo kuun n dɔ yʋʋ ɔɔ cɔkara, sa pɩɛr wa n mɩɩ ɔɔ ca thɩmɩɩ cʋɔrɔ".