Wɩ phiire Ɛsɩtɛɛr dɩ do jamanaa khɛr \ref 1Sam 2.7-8; Sokp15.33; Ef 6.1-3
2
1 Mɔ̃ thɩ̃ɛsɔɔle kanɩ pɩ, dɩ ga too gbe, Asierisii nĩkhi ier. Dɩ kpɩɛrna gɩrɛ Vasɩtɩ cʋʋnɩ na kpɩɛrɛkɛ wɩ gbanɩ ɔɔdara. 2 Dɩ daɓolminǝǝkɛ hanɩ ɔɔ thɔna sʋʋraa: Gɩ bɔrɛ wɩ ƴaal kheminǝǝkɛ na jɛnɩ kuun pa', kɛ bʋɔnɔnɩ waa vʋ̃ʋ, wɩ ha fɩ. 3 Dɔ fɛr jamana n phiir tɩbɩlaakɛ fa thɔnɩ, wɩ phiir dɩ gbulonasɔra fɛw afɩ jamana dɩra, kheminǝǝkɛ bʋɔnɔnɩ, kɛ na jɛnɩ dakha kuun pa', wɩ ɩna wɩ pɛr jamana khɛraa cɔra, kɛ hanɩ Suuji dɩ kɔ̃tɩɩna, Heguekɛ wɩ kʋɛnɩ kuun dʋʋr, kɛ n hɩnɛnɩ jamanaa khɛrsɔ, na n hɩɩn wɩ, a ha wɩ tomɩr gbɛbɩ thɩ̃ɛsɔ. 4 Khebirikɛ na danɩ fɛr jamanana, ɔr na deba Vasɩtɩ a na do fɛr jamanaa khɛr. Dɩ thɩmɩɩlera dar jamana haar dɩ tu.5 Juifi kuun bɩɛl kɔɔ hale Suuji, dɩ kɔ̃tɩɩna da n do Maardose. Bɛ̃jamɛ̃ɛ cara a the, a do Yayɩɩr bikuun. Yayɩɩr dor Sɩmeyɩɩ bikuun, dɩ Sɩmeyɩ do Kɩsɩɩ bikuun. 6 Ɔr dɔ bɩɛl wɩrɛraakɛ Babɩlɔn jamana Nebukadinejaar kɔɔ fʋlɛnɩ Jerujalɛm na Juda jamana Jekonɩa a jalna. 7 Dɩ Maardosera kɔɔ tɔɔna ɔɔ jẽe bikhɛrɩkɛ n dʋɔnɩ Hadasa, sɩ dɩ wa n wɩɩ Ɛsɩtɛɛr. Ɛsɩtɛɛr thɩ na ɔɔ nɩ kɔɔ khiire. Dɩ Maardose kpaa toona. Ɛsɩtɛɛra dor khebirikɛ bʋɔnɔnɩ ga do kpãkpalã ga.
8 Ɔbɔɔkɛ jamana 'laanɩ ɔɔ nɔ thɩmɩɩ dɩɩ kpaar dɩɩra fɛw, wɩ kpar kheminǝ a der dɩ kɔ̃tɩɩnaakɛ dɔnɩ, Suuji, dɩ Hegei na n hɩɩn wɩ. Dɩ wɩ pɔnanɛ dakha Ɛsɩtɛɛr jamanaa cɔra, dɩ Hegei, kɛ n hɩnɛnɩ khɛra na n hɩɩnʋ. 9 Dɩ Ɛsɩtɛɛr dar Hegeira dɩ mɛ̃ a 'lɛ ɔɔ bɔna. Dɩ Hegei kɔɔ phananɛ a haa biir gbɛbɩdaasɔ na dikorɩkɛ a na n khonɩ, a hanaa dakha thɔ̃do kheminǝ makoɲɔ, kɛ dɔnɩ thɔ̃ dona jamanaa cɔ. Dɩ a har Ɛsɩtɛɛr na ɔɔ thɔ̃do kheminǝ cɔ pa ɓʋ̃ɔ le jamana khɛraa cɔra. 10 Sɩ Ɛsɩtɛɛr na kɔɔ nɩna dɩ juifi haa dɩ ɔɔ the pa ga; gɩdonɩ Maardose kɔɔ pɩɛrʋrɛ a na n mɩa'. 11 Wire fɛw, Maardose n kar le jamana khɛraa cɔ lõfonɔɔ, dɩ jʋʋr da n hɩɩn ado a khɩɩrɛ da n hɩɩna dakha mɔ̃ wɩ n cʋgʋʋnɩ.
12 Kheminǝsɔɔle wɩ pɔnanɩ pɛr jamana khɛraa cɔra, teenanɛ wɩ gba sɩpora yʋɔr yeɲɔ wɩ gbɛbɩna awɩbara. Wɩ gba sɩpora maadõ wɩ thirnǝ mɩɩr niin, sɩ wɩ gba sɩpora maadõole sɛnɩ wɩ bena paarfɛ̃ na gɩ̃ɩ tomɩ gbɛbɩdasɔ. Agɩpɩ wɩ jal bɩɛlbɩɛl jamanaa ƴɛra a hɩɩn wɩ. 13 A khebir dɔɔ na jal jamanaa pa, gɩrɛ fɛʋʋkɛ a n ƴaalnɩ wɩ n haarɛ dɩ jalna. 14 Dʋɔrɔ ntɛ n jal, sɩ duuro dɩ wɩ thɔgʋʋ jalna jamana khɛraa balaɲɔ cɔra, ka ɔɔ khɛr ɩkhasɔ hanɩ, dɩ Sagaajɩ, kɛ wɩ kʋɛnɩ kuun dʋʋr, kɛ n hɩnɛnɩ jamanaa wɛdaarsɔ, na n hɩɩn wɩ. Khebi dɔɔ na n kɛr dɩ jal jamanaa pa, saagado jamana n ƴaalɛɛ a wɩaa ga.
15 Ɔbɔɔkɛ, Maardosee jẽ Abɩhayɩlɩ bikhɛr Ɛsɩtɛɛr, kɛ a gbanɩ haan, ɔɔ wi danɩ da lõ jamanaa pa, aa ƴaal thɩ̃ kpɩɩ a pɛr gɩrɛraakɛ Hegei, jamana khɛraa hɩ̃ɩdaarɩle kɔɔ haana'. Ɛsɩtɛɛrɩda kɔɔ dar tɩbɩla fɛʋra. 16 Yɩɛrɩ ɲɛ̃be yʋɔr sɩpora, kɛ dɔnɩ Tebɛtɩ sɩpor Asierisi donɩ jamana dɩɩ cʋʋ yɛna makoɲɔ, gɛr wɩ lona Ɛsɩtɛɛr jamanaa pa. 17 Dɩ jamana nar Ɛsɩtɛɛr a jɔ wɩ̃ɩ khɛrsɔɔle fɛw. Dɩ mɛ̃ Ɛsɩtɛɛr 'lɛ jamanaa bɔna, na ɔɔ naw a jɔ ɔɔ alãkha khebisɔɔle. Dɩ jamana gba jamana kpɩɛ a subuu sa pɩɛraa dɩ gba ɔɔ khɛr Vasɩtɩɩ too pa. 18 Dɩ jamana gbɛbɩ fɛtɩ kɔ̃tɩ̃ɩ Ɛsɩtɛɛr irǝ, a wena ɔɔ minisisɔ na ɔɔ thɔ̃ dodara fɛw. A wurre thɔmaa ga wiile sa tɩnɛ khaardaa jɔɔ tɩbɩla. 19 Ɔbɔɔkɛ wɩ birni kpa kheminǝǝkɛ na jɛnɩ kuun pa' a na der, ga bɔɔle Maardose 'lire thɔma jamanaa cɔ. 20 Sɩ Ɛsɩtɛɛr na nɩnanakɛ ɔɔ the pa, dɩ ɔɔ too ga, mɔna Maardose kɔɔ sʋʋraanɩ. A n nɩrɛ Maardose nũu mɔna a n kɔɔ nɩɩnɩ nũu ɔbɔɔkɛ a kɔɔ hanɩ ɔɔ cɔ.
21 Wi bɩɛl, Maardose kɔɔ hale ɔɔ thɔna le jamanaa cɔ. Dɩ kona yeɲɔ haleekɛ wɩ kʋɛnɩ kuun dʋʋr, kɛ dɔnɩ bɛbɛra, kɛ wɩ n wenɩ Bɩgɩtã na Terɛsɩ, dɩ wa n mɩɩ na nĩkhii mɔ̃ wa cʋʋnɩ sɩ wɩ kʋ jamana. 22 Dɩ Maardose nɩɛrɛ a gba mɩɛ jamanaa khɛr Ɛsɩtɛɛr, dɩ gba mɩɛ ɔɔ ko Maardosee irǝ. 23 Dɩ wɩ 'lor thɩmɩɩra a hɩɩn dɩɩ do sobɔr gɩ. Dɩ wɩ fʋlɛlɛ kona yeɲɔɔle a ju tɩɩ kʋ thɩrʋra, sa kherẽ thɩ̃ɛlera jamanaa ƴɛra a pɛr dɩ sɛbɛ kɔ̃tɩɩna.