SOKPAASƆ
FƖL DƖƖRƐ KPƐSƐ ƳAALƐLA
1
1 Davɩdɩɩ bikuun Salomɔ̃ɔkɛ dɔnɩ Ɩjɩrayɛl jamanaa sokpaasɔ gɩ dɩ so,2 gɩ puno gɩ ha tibil kpɛsɛrɛ na jɩɩr,
a puno a na n jɩ kɩrʋ kpɛsɛ thɩmɩɩsɔra,
3 a puno a 'lɛ dɩɩrɛɛkɛ n 'laanɛnɩ fɩl bʋɔ,
na fɩl sarʋ na fɩl telẽe na cʋʋ pa bʋɔ,
4 Gɩ puno gɩ 'laa bʋdʋr jɩ ɓɔrdarara,
gɩ 'laa jɩɩr na bɩ̃ kuure daɓolala.
5 Dɔ tɩɩ kpɛsɛ na n pɛ gɩ nũu,
Ga tɔr ɔɔ kpɛsɛ na dɛɛnɔ,
Dɩ ʋrɛ dʋɔnɩ fɩl jɩn
na 'lɛr dɩbara thɔɔ fɩlɛ a na dɛɛnɔ.
6 A na jɩrɛ sokpaasɔɔ kɩr,
A hanana jɩɩr thɩmɩɩr gʋʋrɛra,
A na jɩrɛ tɩɩ kpɛsɛsɔɔ thɩmɩ
na awɩ sokpa tiirnəsɔɔ kɩr.
7 A hana maar Thãgba Kɔ̃tɩnna gɛr dʋɔn jɩɩrɩ tɔ̃tʋ̃ɔ pa.
Sɩ də̃bələ n beesire kpɛsɛrɛ na dɩɩrɛ.
Fɩl dɩɩrɛ bikuunna
8 Ɩ̃ bikuun, na pɛ afɩ thɩɩ dɩɩr nũu,
na lẽbiikɛ wɩ n tonɩ fʋɔrɔ.
10 Ɩ̃ bikuun, ado puu cʋʋdara ƴaal wɩ fɩɩl fɩ,
Fa n tuə'.
11 Ado wɩ so far aa: «Ɩna sɩ jal kha
Sɩ nɔ a kɔ tibil,
Sɩ phera pheru gɩ fʋ dɩpa 'leedaar pɔy,
12 Sɩ dɩa wɩ na yire, mɔ̃ khĩdi dɩɩ n dɩɩnɩ tɩbɩla,
Sɩ dɩa wɩrakɛ biləni, mɔ̃ khir n gbanɩ khe dɩ gbunə kaw,
13 Sɩ khɩa thɩ̃ ɓɔ̃ caar dɩɩdɩɩ fɛw,
Sa hiri asɩ cɔsɔ na awɩ lẽle thɩ̃sɔɔkɛ sa taanɩ;
14 Sɩ jala kha, fa 'lɛr gɩrɛ dɔnɩ afɩda,
Sa tɩnɛnɛ a na mãkha phɛrɛ gɩrɛ sa hananɩ lokaara !»
15 Ɩ̃ bikuun, fa n kpa wara',
Fa n do afɩ nɛ n sa awɩ hʋa'.
16 Gɩdonɩ wɩ n car khə̃khə̃ dɩ wɩ cʋʋ puure,
Wɩ n phananɛ kɔrɔ tibil kʋra.
17 Sɩ a wɩ pher kẽkẽ wi pheru dɩ 'lominə yɩɛ,
mɔlɔ pheru gɩ.
18 Dɩ tɩbɩlaale, wɩrɛ wɩ n nɔnɩ wɩ kʋ, awɩ thɛthɛra wɩ n kʋ,
Awɩ thɛthɛɛ barara wɩ n pher pheru.
19 Mɛ̃ gɩ n ha tibil wo tibilləəkɛ n cʋɛnɩ yu cʋʋrɛ,
Yu cʋʋrɛra na kɔ ntɛ.
Kpɛsɛrɛ n wer də̃bələ.
20 Kpɛsɛrɛ n ber hulẽbire, hʋ kɔ̃tɩnasɔɔra,
A n hulene nɔ kheu, kpa jɛ paarsɔɔra.
21 A n ber hulẽbe hʋ leerosɔ, tɩɩ jɔ paar,
A n hulene dɩ lõfonʋɔsɔɔra da n so aa:
22 Nɛr fɩl 'leedara,
Ʋmɔ̃ɔ bɔɔ nɩ n na fɩl 'lee thɔmana nɩ dana?
Nɛr ɓoɓorodara,
Kana nɩ n na ɓoɓororera nɩ dana?
Dɩ nɛr də̃bələ,
Ʋmɔ̃ bɔɔ nɩ n bo jɩɩra nɩ dana?
23 Nɩ kɛra ɩna mar a to ɩ̃ phãasɔ,
Dɩ ma pɛ narɛ ɩ̃ thu,
Ɩ̃ dɩɩr nɩ nɩ jɩ ɩ̃ thɩmɩɩsɔ.
24 Gɩdonɩ mɩ we ner dɩ nɩ bʋʋr,
Dɩ mɩ 'laa ɲɔ̃ɔ dɩ tibil bɩɛllakɛ na therna ga,
25 Gɩdonɩ nɩ bʋʋrɛ ɩ̃ fɩl dɩɩrsɔ fɛw,
Na ƴaal nɩ tu ɩ̃ phaana',
26 Mɛrɛ dakha,
ma n mã nɛr ɔbɔɔkɛ na hanɩ nɩwɛra,
Ma n maan nɛr,
ɔbɔɔkɛ ha fuu thɩmɩɩr na dã nɩnɩ.
27 Ma n maan nɛr,
dawiikɛ ha fuu thɩmɩɩr na phã narnɩ jɛ kʋkʋʋl khaa,
Na dawiikɛ nɩwɛ na thʋ nɩnɩ a na ho jɛkhur,
Na dawiikɛ ha hele na gbobire na wɔɔ narnɩ.
28 Dabɔɔle na n we mer, sɩ ma tuə',
Na n ƴaal mɛr sɩ na yɩ ma'.
29 Mɛ̃ ga ha, gɩdonɩ nɩ bor jɩɩr,
Na phiirnɩ nɩ ma Thãgba Kɔ̃tɩnna'.
30 Gɩdonɩ na ƴaal ɩ̃ fɩl dɩɩrsɔa',
Nɩ beesire ɩ̃ phãasɔ fɛw.
31 Gɛra dɔ nɔɔ wa 'lɛr lɩmɩnɛɛkɛ thɛnɩ awɩ tuur cʋʋra,
Wa hire awɩ thɛthɛɛ dɩbara fɩl dɩɩrsɔɔra phi.
32 Gɩdonɩ jɩ 'leedaraa jɩ 'lee n kʋrɛ wɩ,
Dɩ də̃bələə də̃bəl n bũburone wɩ.
33 Sɩ ʋrɛɛkɛ n pɛ mɩnɩ nũu, a na toore na ha ɩɩ,
A na toore ba na ha faarɛ, maar na fʋʋ nɩwɛra ga.