Kpɛsɛrɛ dor lẽlẽ thɩ̃ kɔ̃tɩ̃ɩ
2
1 Ɩ̃ bikuun, ado fa tu ɩ̃ thɩmɩɩsɔ,Ado fa fʋrɔ ɩ̃ jɔfʋsɔ afɩ bɩnɔ,
2 Ado fa pɛ nũu bɔɔbɔɔ kpɛsɛrɛɛ dɩɩra,
ado fɩ gbuuro yʋʋ a jɩɩ jɩrɔ kɩrʋ,
3 Baalɛ na hala', ado fa ƴaal bule kpɛsɛrɛra,
Ado fɩ hulẽ kheu a wɛna fɩlɛ a bulo fɩ
4 Ado fa ƴaalʋʋ mɔ̃ wɩ n ƴaalnɩ dɛ bulo,
Ado fɩ gbuuro yʋʋ a ƴaalʋ, mɔ̃ wɩ n ƴaalnɩ lẽle thɩ̃ɛsɔɔkɛ keranɩ,
5 Liir fa jɩ gɩrɛ n dɔnɩ maar Thãgba Kɔ̃tɩnna,
Dɩ fa jɩrɛ Thãgba.
6 Gɩdonɩ Thãgba Kɔ̃tɩn n 'laanɛ kpɛsɛrɛ;
Ɔɔ nɔ thɩmɩɩsɔ n 'laanɛ jɩɩr na fɩlɛ.
7 Ɔr dʋɔn taa 'lɛ paar tɩɩ telẽesɔɔra,
Tomɩr phidaa a do wɩrɛraakɛ n ɩrɛnɩ fɩl teleena.
8 A n bɛrɛ wɩrɛ n ɩrɛnɩ hʋ sarʋra,
Da n hɩɩna wɩrɛ dʋɔraanɩ sobɔdara awɩ ɩɩr para.
9 Thale fa hana fɩl sarʋ na fɩl bʋɔ na fɩl telẽe na cʋʋ paar fɛʋʋkɛ n 'laanɛnɩ bɔnanɛ.
Kpɛsɛrɛ n taarɛ puu cʋʋrɛra
10 Kpɛsɛrɛ na lʋʋn afɩ hara,
Jɩɩr na n ha fɛr daw haara.
11 Fɩlɛ na n bɛr fɛr,
Bɩ̃ kuure na kɛɛ farɛ.
12 Ga taa fɛr puu cʋʋrɛra,
Na tɩbɩlalaakɛ n mɩanɩ gõgolõ thɩmɩa.
13 Na wɩrɛɛkɛ faanɩ hʋ telẽe,
Sɩ dɩ wa n ɩɩr dabirə hʋɛra.
14 Tɩbɩla wɛɛkɛ puu cʋʋrɛ n darɔnɩ,
Dɩ wa n kãka thɩ̃ puurə.
15 Tɩbɩla wɛɛkɛ awɩ cʋʋ pasɔ na telena',
Dɩ awɩ hʋsɔ gõgolõ.
16 Kpɛsɛrɛɛle na taa fɛr dakha khɛr bɔdɛlla,
Kɛ dɔnɩ khɛr kpakpalɩkɛ n fɩɩlɛnɩ na nɔ da thɩmɩa 'lã'lã'lã.
17 Khɛr gɩɩkɛ bɔnɩ ɔɔ khebiir kuun a faa,
A diinə ɔɔ nɔ bɩɛl ʋlfɛ nakha ɔɔ Thãgba.
18 Khirii hʋ nɔra ɔɔ cɔ ha dɔdɔdɔ,
Dɩ ɔɔ hʋsɔ na n gbũ khĩdidaraa pa dẽdẽdẽ.
19 Wɩrɛɛkɛ n jalanɩ ɔɔ pa, bɩɛllakɛ na n kɛr dɩ bir bã,
Bɩɛl wɛra na n bir yɩ yi hʋɛ a kɛr bã.
20 Gɛr gɩ na kpaanɛ tɩɩ bɔɩsɔɔ cʋʋ para,
Gba hʋɛɛkɛ dɔnɩ tɩɩ saraa hʋ.
21 Gɩdonɩ tɩɩ telẽesɔ na tɔɔ dɩɩra,
Tɩbɩlaakɛ saranɩ, wɛr na hanana yire dɩɩra.
22 Sɩ wa tiire tɩɩ puusɔ dɩɩra dɩ wa thero,
Wa weelele gõgolõdara dɩɩra a na faa.