EKILEJƖASƖ
Thɩ̃ɛ wo thɩ̃ɛ fɛʋ, thɩ̃ kananɛ gɩ
1
1 Ekilejɩasɩɩkɛ dɔnɩ Davɩdɩɩ bikuun, a dona Jerujalɛm jamana, ɔɔ thɩmɩɩsɔ ha gɩrɛ.2 Ekilejɩasɩ sor aa: «Thɩ̃ɛ wo thɩ̃ɛ dor thɩ̃ kananɛ; thɩ̃ kananɛ ha thɩ̃ɛ fɛw. Thɩ̃ɛ fɛw, thɩ̃ pho kananɛ gɩ»
3 Thɔmaakɛ tibil n donɩ kɛ thɩɩra dɩ vɔɔ vɔɔ, aɲe dɔ khorɩkɛ a n 'lɛrɔnɩ tɔr? 4 Bɔ bɩɛl tɩbɩla n phor dɩ wɩ ka, dɩ wɩ̃ bɔdara na n kpaan, sɩ thɩɩ hale 'lo a too mɔnanakɛ a hanɩ wire fɛw. 5 Wire n phaan dɩ jal dɩ lõ, dɩ bir dɩ kɛr ka a n phanɩ wo. 6 Jɩɛ n phʋnɛ dɩ jal ka wire na n jalnɩ dɩ pɛr ɲɔ̃bɩlã, dɩ kɛr dɩ jal ka wire na n jalnɩ dɩ pɛr ɲɔ̃bɔɔ. A n fire, dɩ fi fi fi, sɩ dɩ bir dɩ gba ɔɔ hʋ wo. 7 Mɩɩr ɲʋ̃ɔsɔ fɛw n cele dɩ ga n gbũ laɲʋɔnɔ, sɩ laɲʋɔn na n hi kpɩa'. Kãkɛra gɩ n celnɩ dɩ ga n jal, lera gɩ n jal bɔɔ wo bɔɔ. 8 Thɩ̃ɛ fɛw dor vɔɔrɛ, dɩɩ pho mɩɩrɛra. Yire na n hi hɩɩnɛna ga, nũu na n hi nɩɛrɛra ga. 9 Thɩ̃ɛɛkɛ kɔɔ hanɩle, gɛra na birə na ɩ̃ wo. Dɩ Thɩ̃ɛɛkɛ kɔɔ cʋɛnɩ a kpãasɛ, gɛrra na birə na cʋʋ wo. Thɩ̃ phaa na hakɛ thɩɩra ga. 10 Aɲee thɩ̃ haanle wa sonɩ: «Ɔɔ, ʋrɛ wer waa, thɩ̃ phaa gɩ ?» Thɩ̃doole kɔɔ hale yɛnasɔraakɛ kɔɔ kanɩ sɩ sɩ pɩɩrɔ. 11 Sa n jɩna thɩ̃ɛsɔɔkɛ kɔɔ kana'. Dɩ thɩ̃ɛɛkɛ na dananɩ bɔɔraakɛ na ɩnanɩ na faa jɩnanɛ dakha wɩrɛraakɛ na kpaanɛnɩ khiroə'.
Thɔ̃ dʋʋr dor mɔlɔ vɔɔrɛ
12 Mɛr Ekilejɩasɩ, Ɩjɩrayɛl jamana mɩ kɔɔ do Jerujalɛm dɩɩra. 13 Mɩ tire kpɩɛrɛ a jʋʋr, a 'lo na kpɛsɛrɛ thɩ̃ɛ fɛʋʋkɛ n cʋɛnɩ kɛ thɩɩra a hɩɩn, dɩɩ do vɔɔ thɔma Thãgba pɛ tɩbɩlala dɩ wa n do. 14 Mɩ yɩrɛ thɔma fɛʋʋkɛ n dʋɔnɩ kɛ thɩɩra dɩɩ do thɩ̃ kananɛ gɩ, a ho mɔ̃ tibil n weenɩ jɩɛ da n kpaan. 15 Thɩ̃ɛɛkɛ goranɩ na mar na telã', dɩ thɩ̃ɛɛkɛ na hanɩle dɩɩra ga, wa puno na therʋa'. 16 Dɩ mɩ sor ɩ̃ hara ayɩ: «Mɛrɛ, mɩ ƴaalɛ a 'lɛr kpɛsɛrɛ jɔɔ a jɔ wɩrɛ fɛʋʋkɛ kɔɔ kʋlɛ mɩnɩ ƴɩɛ a do jamanasɔ Jerujalɛm dɩɩra. Mɩ hananɛ kpɛsɛrɛ na jɩɩr jɔɔ.» 17 Mɩ kɔɔ gbuurore yʋʋ jɔɔ, gɩ do nɔɔ ɩ̃ 'lɛ kpɛsɛrɛ, ɩ̃ jɩ gɩrɛ dɔnɩ gə̃gəlle na də̃bəəle. Dɩ mɩ yɩɛrɛ dɩ gele dakha hor mɔ̃ tibil na n weenɩ jɩɛ. 18 Gɩdonɩ kpɛsɛ jɔ hananɛ n 'laarɛ ha hele jɔɔ ka, dɩ jɩ jɔ hananɛ n 'laa bɔ gaarɛ jɔɔ ka.