Fɩl dɩɩrɛɛkɛ Lemʋɛl jamanaa nɩ haanɩ.
31
1 Lemʋɛl jamanaa thɩmɩɩsɔ ha gɩrɛ. Fɩl dɩɩrɛsɔ gɩɩkɛ ɔɔ nɩ haanɩ ayɩ:2 Ɩ̃ bikuun ya, aɲe ma so far ? Fɛr ɩ̃ bikuun bɩnɔ aɲe ma dɩɩr fɩ?
Pha! Fɛr ɩ̃ nɔ so bi, aɲe ma so far?
3 Fa n kʋɛ afɩ fãga khɛrara ga,
Fa n do khɛraakɛ n tɔnɩ jamanasɔ dɩ wɩ kpɛɛ na n thɔɔ fa'.
4 Lemʋɛl yaa, dɩvɛ̃ na bɔr na jamanasɔa'
Kpei! Dɩvɛ̃ ɲʋɔr na teena jamanasɔa',
Dɩ ta kha ɲʋɔr na teena nũfesɔa'.
5 Gɩdonɩ a wɩ ɲɔ pɩ, wɩ punone diinə jɔfʋ,
Wa jɩna bɔdara awɩ hʋ hanana bã.
6 Wɩ ka hana ta khaa ʋrɛɛkɛ n khenɩ,
A hana dɩvɛ̃ ʋrɛɛkɛ haar kʋɛnɩ.
7 A a ɲɔ, a diinə ɔɔ bɔ,
A na jɩna ɔɔ nɩwɛ 'lo bã.
8 Sɩ fe wer mɩa a na pɛ nɔ madarara,
Tea na pɛ wɩrɛraakɛ na hananɩ tetea ga.
9 Na gʋʋrɛ sor ga n telẽ kɩɩl paar,
Tea na pɛ ʋrɛraakɛ dɔnɩ gãgar na bɔdaara.
Mɔ̃ khɛr bʋɔ n hanɩ
10 Amɛ na 'lɛ khɛr bʋɔ?
A khɩɩrɛ the nʋɔ a jɔ lẽbi ɓɔnaa the nɔ fĩi.
11 Ɔɔ ko n hananɛ tu jɩɩr ɔra,
Thɩ̃ɛ na n 'lee ɔɔpa kpɩɩa'.
12 Bɔ haar a n cʋʋ ɔɔ ko wire fɛw ɔɔ yi hanana,
A n cʋgʋʋ puurə',
13 A n ƴaalɛ lɛn na lɛ̃ ɔɔbara,
Dɩ kpar kẽkẽ wiir na ɔɔ thɛthɛɛ ɲɛ̃ na daw.
14 Khɛr ca ole hor ƴaƴabɩdaraa bato,
A n thenanɛ dɩkɔ ƴɔɔ fĩi dɩ kɔna.
15 A n mãa ɩɩrɛ jilə jiləla dɩ gbɛbɩ ɔɔ cɔdaraa dɩko,
Dɩ mɩɛna ɔɔ thɔ̃daar khɛrsɔ thɔmaakɛ wa donɩ.
16 A n kpɩɛrnanɛ lɩɛ, dɩ the lɩɛra,
Dɩ a n gbaar mũsumookɛ a 'lɛnɩ ɔɔ thɛthɛɛ thɔmana dɩ diirnə dɩvɛ̃ thɩra.
17 A n gbɛ̃gbɛrɛnɛ thɔmana na fãga,
A n bo ɲɛɛna ga.
18 A yɩrɛ ɔɔ thɔma dɩ ga n jal bɔɔ,
Dɩ dɩtɩnɔnakɛ, a n pɛr dɔ carãa da n dona thɔma.
19 A n kparɛ lɛn kẽkẽ wiir,
Da n le kẽkena.
20 A n har bɔdara thɩ̃ɛ,
A n bule gãgara na bɩ̃ bʋɔ.
21 A n dɛna ɔɔ cɔdara ie kʋ bɔa',
Gɩdonɩ ɔɔ cɔdara fɛw bɩɛlbɩɛl hananɛ kẽkẽ sɛ bɔy dɩɩ dã wɩ.
22 A ler kẽkẽ nɩɩsɔ dɩɩ do ɔɔ thɛthɛɛda,
A hananɛ kẽkenaakɛ wɩ lenanɩ lɛ̃ bɔ kẽkẽ wiir, na kẽkẽ sɛ bɔy kpakpakpa.
23 Tɩbɩla n cʋrɛ ɔɔ ko,
Ɔbɔɔkɛ a toonanɩ dʋɔ kɔ̃tɩna dɩ lõfonʋɔra,
Ka wɩ n gʋʋrnɩ dʋɔ thɩmɩa.
24 A n bɛbɩrɛ kẽkena da n dolõ,
Dɩ le lophɛrɛsɔ da n dolõ ƴaƴabara.
25 Fãga na cʋʋrɩkɛ a hananɩ dʋɔn ɔɔ biir gbɛbɩda.
Gɩrɛ na dananɩ dɩkhõo na n kʋʋ maara'.
26 A n mɩɩrɛ thɩmɩɩr na kpɛsɛrɛ,
Dɩ dɩɩrɛɛkɛ n thɛnɩ ɔɔ nɔra, dɩɩr bɔ haar gɩ.
27 A n dʋrɛ bʋrɛ thɩ̃ɛ fɛʋraakɛ n kanɩ le ɔɔ cɔ,
A n kpala ɲɛ̃ɛ dɩ too sɩ dɩ khoa'.
28 Ɔɔ bɩsãsɔ n ɩɩrɛ dɩ wa n khɩsʋʋ,
Dɩ ɔɔ ko na n kpãgaa aa:
29 «Khɛra jɔɔ nɩnanɛ awɩ khɛr bɔ do,
Sɩ fɛrɛ, fɩ ka wɛr fɛw na khɛr bɔ dʋʋr fĩi».
30 Khɛrɩ bɔ ƴɩɛra n fɩɩlɛ tibil, dɩ bɔwɛ tomɩra do thɩ̃ kananɛ,
Sɩ khɛrɩkɛ n maanɩ Thãgba Kɔ̃tɩn, ɔr na 'lɛ kpãgarɛ.
31 Nɩ hanaa khorɩkɛ thɛnɩ ɔɔ thɔnana,
Dɔ wa n kpãgaa dɩ lõfonʋɔsɔɔra gɩ do ɔɔ thɔ̃ bɔsɔ dɔ nɔɔ.