Thɩmɩaakɛ Aguur mɩɩnɩ na ɔɔ sokpa ɩkhasɔ
30
1 Yakee bikuun Aguur thɩmɩsɔ ha gɩrɛ.Thɩmɩɩ gɩɩkɛ a mɩɩnɩ Ɩtɩɛl. Ɩtɩɛl na Ukal a mɩɩna ayɩ:
2 «Sobɔr gɩ, mɩ də̃bəəle a jɔ tɩbɩla fɛw,
Ma hana fɩlɛɛkɛ tibil n hanana'.
3 Ma dɩɩr a 'lɛ kpɛsɛra',
Dɩ ma puno a 'lɛ jɩɩrɩkɛ tɩɩ phuusɔ hanana'.
4 Amɛ jʋnɛ thãgbara ƴũu, sa bir the le a gbũ?
Amɛ fʋ̃ɔ jɩɛ a pɛ ɔɔ ɲɔ̃kɔɔ a yɩɛ?
Amɛ gbaan ɔɔ kẽkẽ a cɛna ɲʋɔn a li?
Amɛ kherene thɩɩ khu pasɔ a ti pɛl?
Mɔ̃ ntɛɛ i n do? Dɩ mɔ̃ ɔɔ bikuuni i n do?
Fɩ jɩ gɛr ya?
5 Thãgbaa thɩmɩɩ fɛw, sobɔ haar gɩ,
Bɛbɛr bʋɔ Thãgba do wɩrɛ fɛʋraakɛ faaraanɩ awɩbara.
6 Fa n ɓaan dɩkha ɔɔ thɩmɩsɔɔra ga,
A mɛ̃ ga, a na phaan fɛr, dɩ afɩ sõso na yɩr.
7 Mɩ n bɩɛl farɛ thɩ̃ɛ yeɲɔ ya ɩ̃ Thãgba,
Fa n tɔ̃ mɩ waa sɩ ɩ̃ khə':
8 Cʋɛ mɔlɔ thɩmɩa na sõso thɩmɩa n hʋnɔna mɩ,
Fa n ha mɩ bʋɔ dɩ ler ga,
Na hana mɩ gɩrɛ na mɩɛna mɩnɩ ɩ̃ yi hanana.
9 A mɛ̃ ga sɩ dɩ̃ le dɩɩ kar,
Ma ɓoɓoro farɛ ɩ̃ so: «Amɛ Thãgba Kɔ̃tɩn do?»
Dɩ a bʋɔ ka mar wo, dɩ̃ yu,
Ga kʋɛrɛ fɛr ɩ̃ Thãgbaa i.
10 Fa n kʋɛ thɔ̃daarɩ i ɔɔ kɔ̃tɩ̃ɩ ƴɛbʋrɔa',
A mɛ̃ ga a na sɔ̃ fɛr gɩ do fɛr ƴaalɛ gɩ.
11 Tibil ɩkha haleekɛ n nɩrɛnɩ awɩ thɩ,
Wa n mɩɩ bɔɔ awɩ nɩra ga.
12 Tibil ɩkha haleekɛ n kpɩɛrɛnɩ ɩnɩ 'leere dɩ paar,
Sɩrakɛ wa 'lee dɩ paara'.
13 Tibil ɩkha haleekɛ n khəyəni awɩbara,
Sɩ dɩ wa n beesɩ ɩkhasɔ.
14 Tibil ɩkha haleekɛ ɲɩma honɩ bajɩnasɔ,
Dɩ ɲɩ̃ gbana ho khala,
Wɩ n ƴaalɛ wɩ bũburone bɔkʋdara thɩɩraakɛ,
A cʋɛ bɔdara wɩ hɛllɔ tɩbɩlaa thɩ̃thɩɩn.
15 Mʋmʋrɛ hananɛ bikhɛna yeɲɔ, kɛ n sɔnɩ bɔɔ fɛw: «Ha mɩ! Ha mɩ!»
Thɩ̃ɛ yẽther haleekɛ na n hienɩ kpɩɩa'.
Thɩ̃ɛ yenã gɩrakɛ, kɛ na n sɔnɩ : «Ɔɔ, gɩ daan mã'!» Gɛr ha gɩrɛ:
16 Khĩdi dɩɩ, na khɛr kɔ̃bʋʋ,
Na thɩɩkɛ na n hieni thãgba ɲʋɔn kpɩɩa',
Na dɔɔkɛ na n sɔnɩ kpɩɩrakɛ dɩ yɩ: «Ɔɔ, gɩ daan mã'!»
17 Bɩsaanɩkɛ na n therananɩ ɔɔ tha',
Kɛ n beesinenɩ ɔɔ nɩ,
Po khã sɩkpaasɔ na tiirure yinǝ,
Dɩ dunə na khʋʋ.
18 Thɩ̃ɛ yẽther haleekɛ kəənenɩ ɩ̃ jɩra,
Thɩ̃ɛ yenã gɩrakɛ, ma n jɩrɔnɩ kɩrʋ kpɩɩa', gɛr ha gɩrɛ:
19 Sɩgbʋraa ka pa ƴũu,
Sii ka pa bokaara ƴũu,
Batoo ka pa laɲʋɔna ƴũu,
Na kuunɩ ka pa khebirə.
20 Thale khɛr bɔdɛl n cʋʋ:
A n khor, sɩ dɩ khakharana nʋɔ thɩɩ, aa ɩna cʋʋ thɩ̃ puuə'.
21 Thɩ̃ɛ yẽther hale, kɛ n kɔnɩ thɩɩ maar,
Thɩ̃ɛ yenã gɩrakɛ, kɛ thɩɩ fini thʋnɔ, gɛr ha gɩrɛ:
22 Dee kuunɩkɛ ɩnanɩ do jamana,
Də̃bəlikɛ hananɩ dɩkɔ dɩɩ ƴɔ.
23 Khɛr puukɛ yɛnɩ kuun a he,
Na thɔ̃daar khɛrɩkɛ fienɩ tee ɔɔ cɔ khɛrɩ ko.
24 Nʋ̃ caar yenã hakɛ thɩɩra a yɩra ka,
Sɩ wo a hana kpɛsɛrɛ ga do kpãkpalã ga; wɛr ha wɩrɛ:
25 Ɔsãbeekɛ na hananɩ fãga ga,
Sɩ dɩ wɩ ƴaal awɩ dɩko jʋ kha bɔɔ a thɩɩn.
26 Na gɔ̃gɔ̃ suburə, kɛ na hananɩ fãga ga,
Sɩ dɩ wɩ cɔ boka kanana.
27 Na toosõosɔ, wa hana jamana ga,
Sɩ dɩ wɩ kpa kha gbulonə gbulonə a na jal.
28 Na thũfee, kɛ wɩ punonɩ a fʋna ɲɔ̃ɔ,
Sɩ a n lʋʋn jamanasɔɔ cɔ.
29 Thɩ̃ ye yẽther hale a bɔr ɩɩr paar dɩɩ ka,
Thɩ̃ ye yenã gɩrakɛ a ɓɔ̃ jal paar ga do kpãkpalã ga; wɛr ha wɩrɛ:
30 Sidũ'ũukɛ n 'lanɩ a jɔ nʋma fɛw,
A n ca thɩ̃ bɩɛlɩ ƴɛra ga.
31 Yɔlkʋʋkɛ hananɩ nɛɛ dɩɩ tɩ, agɩbo bʋkɩɩr,
Na jamana, ɔbɔɔkɛ a n gbananɩ ɔɔ sɔrasɩsɔ ƴɩɛ.
32 Ado də̃bəəle kɔɔ thɔɔ fɛr a pɛ i ƴaalɛla,
Ado nɛnɛ̃ fɩ kpɩɛrɛ, sɛrɔ thɩmɩɩ mɩɩrɛ.
33 Gɩdonɩ a fa pho na ɩlɩ̃ cʋɔ a n phãa niin,
A fɩ be tibil mɩ̃kaara, tɔmɩn n ther,
Mɛ̃ gɩ, a fɩ cʋʋ gɩrɛ n kɔnɩ nĩkhii, gɩ n ɩnanɛ sʋʋ.