29
1 Tibilikɛ n 'lɛnɩ fɩl dɩɩrɛ thɩɛna sɩ dɩ bo dɩ khɩɩr haar,A na bũburone dapaara, thɩɩ na hale dɩ wa pɩɛraa ga.
2 A tɩɩ sara jɔr, tɩbɩla n kãkarɛ,
Sɩ a tɩɩ puu gba ƴɩɛ, tɩbɩla n ser.
3 Tibilikɛ naanɩ kpɛsɛrɛ, a n har ɔɔ thɩ daw,
Sɩ ʋrɛɛkɛ n tɔɔnɩ na khɛr bɔdɛla, a n kʋɛrɛ ɔɔ lẽle thɩ̃.
4 Jamanaakɛ n cʋɛnɩ dasarʋ n cʋʋrɛ dɩɩ dɩ 'li fãga,
Sɩ ʋrɛɛkɛ n pɩɛrnɩ lãpho ti hʋɔlɛ, a n kʋɛrɛ dɩɩ.
5 Tibilikɛ n fɩɩlɛnɩ ɔɔ alãkha tibil,
Ɔɔ thɛthɛ a n pher pheru.
6 Tɩɩ puu n jire pheruraakɛ dɔnɩ ɔɔ thɛthɛɛ cʋʋ pa puu,
Sɩ fɩl sardara n kãkarɛ na daw.
7 Tɩɩ sarʋ n kpɩɛrnanɛ wɩrɛ dɔnɩ yɔyɔa,
Sɩ tɩɩ puu na jɩ gela'.
8 Ɓoɓorodara n tor dɔɔ dɩɩra,
Sɩ tɩɩ kpɛsɛsɔ n cʋʋrɛ dɩdaraa nĩkhi dɩɩ ie.
9 A tɩɩ kpɛsɛ hana kɩɩlʋ na də̃bǝl,
A a gba nĩkhii yo, aa mã yo, sɩ ga n so də̃bəl thɩ̃a'.
10 Tɩɩ kɔ n laarɛ tɩɩ telẽe
Sɩ tɩɩ sara n teere dɩ wa n pɩɛraa.
11 Də̃bəl n nɩnanɛ ɔɔ kpɩɛrsɔ fɛw jɩɛra,
Sɩ tɩɩ kpɛsɛ n fʋrɔrɛ ɔɔ kpɩɛrsɔ ɔɔ bɩnɔ.
12 A kɔ̃tɩn na gba sõso thɩmɩa,
Thɔ̃daar puu haar a n hana.
13 Gɩrɛ bɔdaar na ʋrɛ n hʋɔlɛnɩ donanɩ bɩɛl dʋɔn:
Thãgba Kɔ̃tɩn bɩɛlla hana wɛr yeɲɔ yinə dɩ wɩ yɩna.
14 Jamanaakɛ n gʋrɛnɩ bɔdaraa so na fɩl telẽe,
Ɔɔ jamana do n pʋɔrɛ jɔɔ.
15 Cilǝmũu na phaanɛ n 'laarɛ kpɛsɛrɛ,
Sɩ bɩsaanɩkɛ wɩ faanɩ mɛ̃ ba, a n pɛr yicuru ɔɔ nɩra.
16 A tɩɩ puunə jɔr na dɛɛnɔ, puure n lerre,
Sɩ wa jiire dɩ tɩɩ sara na yɩ wɩ na yire.
17 Naarɛ afɩ bɩsã, fa 'lɩɛraarɛ ha faarɛ,
A na ha fɛr dakha daw haara.
18 Ado ƴɔɔ yɩr na hala', tɩbɩla n jaal mɔ̃ wɩ n ƴaalnɩ,
Gɩ da tibiləəkɛ n cʋɛnɩ gɩrɛ jɔfʋ n sonɩ.
19 Nɔ thɩmɩɩ haar na n dɩɩr dee kuuna',
A a jɩrakɛ kɩrʋ, sɩ a na nɩrɔ nũə'.
20 A fɩ yɩ tibilikɛ dɔnɩ kpɩɛr 'leedaar ɔɔ thɩmɩsɔɔra,
Də̃bəlləkɛ ka fire baa.
21 Thɔ̃daar kuunɩkɛ wɩ dʋʋrnɩa ɔɔ bɩsã bɔɔ dɩɩ kar,
Pɩpɩɩ paar a n kpɩɛrɛ bi kɔnanɛ ɩnɩ do.
22 Nĩkhi tibil n pɛr sʋʋ,
Dɩ ʋrɛ n cɩ̃cɩmanɛnɩ khə̃khə̃khə̃,
A n cʋʋrɛ dɩ paar ka.
23 I ƴaalɛ n wuri tibil,
Sɩ ʋrɛ n wuronɩ ɔɔbara a n 'lɛr i dʋbɩrɛ.
24 Tibilikɛ n theni yurə, ɔɔbara a n laar,
Gɩdonɩ a nɩɛrɛ sʋɔnɩkɛ wɩ sʋɔnɩ sa pɩrɔ aa so thɩ̃ɛa'.
25 Tibil maar n pɛr pheru,
Sɩ ʋrɛ n faanɩ ɔɔbara Thãgba Kɔ̃tɩnna,
Thãgba Kɔ̃tɩn n bɛrʋrɛ.
26 Tibil jɔjʋɔ n ƴaalɛ awɩ ƴɛkʋʋldaarɩ bɔna,
Sɩ Thãgba Kɔ̃tɩn dɩbara jɩ̃ɛ ntɛɛkɛ hananɩ hʋɛ.
27 Gõgolõ tibilida na n da fɩl sardarara ga,
Dɩ wɩrɛ n ɩrɛnɩ dasarʋra, awɩda na n da tɩɩ puurə ga.