28
1 Tɩɩ puu n car mɔlɔ sɩ ga n do tibil n weaa ga,Sɩ tɩɩ sarʋ n faarɛ haar ba sidũ'ũ ɓolʋʋ kha.
2 Ɔbɔɔkɛ lãʋ ɩɩrnɩ dɩɩra, kɔ̃tɩna n jɔrɛ ka,
Sɩ a tibil hale a hana kpɛsɛrɛ, a jɩ fɩlɛ,
Dɩɩ n jaal ƴɔɔ.
3 Bɔdaarɩkɛ n hʋɔlɛnɩ fãga 'leedarara,
A hor thɩ̃ kʋɛ thãgbaakɛ n dananɩ dɩ pɛ kɔmɛr dɩɩra.
4 Wɩrɛ n bɔnɩ gɩrɛ jɔfʋ sonɩ, tɩɩ puu wɩ n dʋbɩ,
Wɩrɛɛkɛ n cʋɛnɩ gɩrɛ jɔfʋ sonɩ, tɩɩ puu wɩ hana sʋʋ.
5 Puu cʋʋ tɩbɩla na n jɩ kɩrʋ hʋ hana thɩmɩɩra ga,
Sɩ wɩrɛɛkɛ n ƴaalɛnɩ Thãgba Kɔ̃tɩn, wɩ n jɩrɛ thɩ̃ɛ fɛʋʋ kɩr.
6 Bɔdaarɩkɛ n cʋɛnɩ datelẽe,
A baar lẽledaarɩkɛ dɔnɩ gõgolõdaar.
7 Bɩsaanɩkɛ cʋɛnɩ gɩrɛ jɔfʋ n sonɩ bɩsã fɩl jɩn gɩ,
Sɩ bɩsaanɩkɛ n tɔɔnanɩ tɩɩ khabaasɔ a n pɛr ɔɔ thɩra yicuru.
8 Tibilikɛ n pemanɩ tɩbɩla thɩ̃ɛ dɩ dɛɛnɔ khor dɩɩ kãasɩ ɩnɩ n lena,
Ɔɔ lẽle thɩ̃ n fire jal ʋrɛraakɛ n jɩɛnɩ bɔdara bʋɔra.
9 Tibilikɛ n bɔnɩ ɩna n pɛ jɔfʋ nũə',
Ntɛɛ bɩɛllakɛ dor kpɔ̃kpɔrɔ̃ thɩ̃ɛ Thãgbara.
10 Tibilikɛ n fɩɩlɛnɩ tɩɩ sarasɔ dɩ pɛ hʋ puurə,
Ɔr na je korʋraakɛra ɔɔ thɛthɛ kpenɩ,
Sɩ tɩɩ telẽesɔ na 'lɛr nɔbɔɔ.
11 Lẽle n kpɩɛrɛ ɩnɩ kpɛsɛrɛ,
Sɩ bɔdaar fɩl jɩn punone jʋʋrʋʋ a jɩ mɔ̃ a hanɩ.
12 A tɩɩ sara gba fãga, kãkar n har paar fɛw,
Sɩ a tɩɩ puusɔ 'li kəəre, tɩbɩla fɛw bɩɛlbɩɛl n ƴaalɛ wʋ̃ɔ paar.
13 Tibilikɛ n keranɩ ɔɔ dɩpasɔ, a n 'li ɔɔbara ga,
Sɩ ʋrɛɛkɛ n cana gɩnɩ dɩ bona gɩ, a n 'lɛr bɔ jɩɩr.
14 Gɩ da tibiləəkɛ maar n fʋnɩ bɔɔ fɛw puu cʋʋrɛra,
Sɩ ʋrɛɛkɛ n bɔnɩ sɩ dɩ khɩɩr haar, a n lʋʋn thɩlkɩɩra.
15 Mɔ̃ sidũ'ũu na n oornɩ dɩ ha,
na mɔ̃ kɔmɛr n fʋnɩ ursɩ dɩ ha,
Mɛ̃ kɔ̃tɩ̃ puukɛ n thɔɔnɩ tɩbɩlaakɛ dɔnɩ bɔdara ha.
16 Kɔ̃tɩnɩkɛ 'leanɩ fɩlɛ, a n ʋʋnɛ tɩbɩlala jɔɔ ka,
Ʋrɛɛkɛ na naanɩ mɔlɔ khora', a na hananɛ yiri na pʋɔr.
17 Tibilikɛ ɔɔ thɛthɛɛ kpɩɛr nɔ n phaanɩ tɩɩ kʋdaar dʋʋra,
A n car foo dɩ lõ kaw ɔɔbara.
Tibil na n fʋaa dɛ !
18 Ʋrɛɛkɛ n ɩrɛnɩ na fɩl telẽe, a na 'lɛr taarɛ,
Sɩ bɩnɛ yeɲɔdaarɩkɛ gbaanɩ hʋɛ yeɲɔ,
a na bũburone hʋ bɩɛlla phubi.
19 Tibilikɛ n kʋlɛnɩ ɔɔ lɛ a na yɩrɛ dɩkɔ,
Sɩ ʋrɛɛkɛ n cʋɛnɩ khaba khaba a na hire bʋɔ.
20 Sobɔ cʋʋ tibil na 'lɛr bɔnanɛ jɔɔ,
Sɩ ʋrɛɛkɛ n phananɛnɩ ɩnɩ n le na puno na 'lee dɩ paara'.
21 Tibil hɩɩnɛ dɩɩdɩɩ na bɔra',
Sɩrakɛ tibil ɩkha n cʋʋ gɛr dɩɩ do babɩɛl dikor dɔ nɔɔ.
22 Ha pɩɛrdaar n gbɛ̃gbɛrɛnɛ le ƴaalɛla,
Sɩ a n jɩ bʋɔ na jiirəərə'.
23 Tibilikɛ n sɔnɩ sobɔr ɔɔ alãkhara,
A n 'lɛr khɩɩrɛ pɩpɩɩ paar,
Dɩ jɔ ʋrɛɛkɛ n kɔɔ mɩanɩ fɩ̃fɩɩl thɩmɩa.
24 Tibilikɛ n yuoni ɔɔ thɩ na ɔɔ nɩ,
Sɩ dɩ yɩ ga do puure ga,
Aa ha kpɩɩ na thɩ̃ kʋɛdaara'.
25 Tibilikɛ hananɩ thɩ̃ jɔ ƴaalɛ, a n pɛr kɩla,
Sɩ ʋrɛɛkɛ n faanɩ ɔɔbara Thãgba Kɔ̃tɩnna, a n 'lɛr thɩ̃ɛ jɔɔ.
26 Tibilikɛ n cʋɛnɩ mɔ̃ ɔɔ ha n dɩɩrʋnɩ, a də̃bəəle,
Sɩ ʋrɛɛkɛ n ɩrɛnɩ na kpɛsɛrɛ, a na 'lɛr taarɛ.
27 Tibilikɛ n hananɩ bɔdara thɩ̃ɛ, a n 'lee thɩ̃ɛa',
Sɩ ʋrɛɛkɛ na n kheranɩ dɩ hɩɩn wa', sʋɔn n wɔɔraarɛ.
28 A tɩɩ puunə 'li fãga, tɩbɩla ɓibi n ƴaalɛ wʋ̃ɔ paar,
Sɩ bɔɔkɛ wɩ n bũburonɩ, tɩɩ sara n lere dɩ wa n pɛr.