27
1 Fa n be kũkune cʋɔdaara ga,Gɩdonɩ fa jɩ gɩrɛ na dananɩ nə̃'.
2 Dɔ tɩɩ kpɩɩsɔ na n khɩɩ fɩ, fa n khɩɩ afɩbara ga,
Sɛrɔ tɩɩ kpɩɩ na n khɩɩ fɩ, ga n do fɛrɛ thɛthɛɛ n khɩa dɩbara ga.
3 Bokaar n dʋbɩrɔrɛ, dɩ gbalãkothɩn dakha n dʋbɔ
Sɩ də̃bəli nĩkhi dʋbɩrɔrɛ a jɔ gɛr yeɲɔ fɛw.
4 Cɩ̃cɩmanɛ puurore ka, dɩ nĩkhii hor ɲʋɔnɩkɛ wɩ varnɩ dɩɩ ɓɛl,
Sɩ amɛ na punone na pɩɛr gbugi ?
5 A so tibilə sobɔr casɩ,
gɩ baar naʋʋkɛ keranɩ.
6 A afɩ kuun phaan fɩ, sobɔr a n nɩna fɩ,
Sɩ a afɩ lãlaardaar pal fɩ a na fʋɔr, a n fɩɩl fɛr.
7 Tibilikɛ hieni a n borakɛ thʋʋr,
Sɩ kɔmɛdaar wer, thɩ̃ɛ fɛʋʋkɛrakɛ kharanɩ, a n yɩ gɩ daarɛ.
8 Tibilikɛ n kpaarɛnɩ dɩ hʋnɔna ɔɔ dɩ
A hʋrɛ 'lominɩkɛ n thenɩ ɔɔ tɛlla dɩ kpaar dɩ jal ƴɔɔ fĩi,
9 Mɔ̃ nĩ thirnəne na latɩkolo niin n 'laanɩ daw haara,
Mɛ̃ tibil n 'lɛ daw ɔɔ kuunɩ hɛlɛlɛ fɩl dɩɩra a jɔ ɔɔ thɛthɛɛ fɩl dɩɩr.
10 Fa n bo afɩ kuun, dɩ afɩ thɩɩ kuun ga,
Fa n jal afɩ õkuuna bɔɔkɛ fɩ hanɩ nɩwɛra ga,
Cɔ khudaarɩkɛ wɔrɔna fɩnɩ, a baar õkuunɩkɛ hʋnɔnɛnɩ.
11 Ɩ̃ bikuun wei, hanana kpɛsɛrɛ gɩ ha mɩ daw,
Dɩ ma punone na birse wɩrɛ n mɩa marnɩ puure.
12 Bʋdʋ tibil n yɩrɛ puureekɛ n ɩnanɩ ƴɛkʋʋlɔ dɩ golono,
Sɩ fɩl 'leedaar n jaal dɩ lono dɩ 'lɛ sor.
13 A tibil 'laa ɔɔbara ɩnɩ n do hel todaar thɩɛnaakɛ tɩɩ kpɩɩ n pemɩ farnɩ, tea ɔɔ kẽkẽ gɩ do barãdaa,
Ado kpakpalɩkɛ fa jɩnaa hel todaar a ƴaal ɩnɩ n do, ɩaraa a hana fɩ barãdaa.
14 A tibil fʋɔr ɔɔ cɔ khudaar na nɔ kheu duuro phiphiphi,
Gɩ n debire ho nɩɩrɛ.
15 Mɔ̃ ɲɔ celʋ n celnɩ thãgba dã wire a n kurə'
Mɛ̃ khɛr kɩl ƴaaldaarɩ thɩmɩsɔ ha, ga n pa'.
16 Tibilikɛ na maaraanɩ, ntɛ na mar jɩɛra dakha,
Dɩ ntɛ na marɛ na puro nĩ kilele dakha ɔɔ ɲɔ̃kɔɔ.
17 Mɔ̃ ther n leenɩ ther,
Mɛ̃ tɩbɩla yeɲɔɔkɛ n tɔɔnɩ kha n 'laa kha fɩlɛ.
18 Tibilikɛ n kʋlɛnɩ da n pɛ fɩgɩ thɩrʋra, a n khor ɔɔ bi,
Dɩ ʋrɛ n jɩɛnɩ hɩɩn ɔɔ kɔ̃tɩ̃ bɔɔbɔɔ, a na 'lɛr cʋʋr.
19 Mɔ̃ tibil n yɩnɩ ɔɔ thɛthɛɛ ƴɛ yʋɔnɔ gbelẽ gbelẽ,
Mɛ̃ dakha tibili tɩɩ do n yɩr tɩɩ kpɩɩ ƴɛra gbelẽ gbelẽ.
20 Mɔ̃ khĩdi dɩɩ na thɛrɛ 'lee kõkorʋ na n hini khĩdidara kpɩɩraka',
Mɛ̃ tibili yisɔ ha, ga n hi thɩ̃ hɩɩna'.
21 Dɔɔ wɩ n mɩɛna dɛ bulo na dɛ dɩ wɩ jɩ dabʋɔ,
Sɩ gɩrɛ n nɛnanɩ tibili bɔ dʋɔn i bʋɔɔkɛ a hananɩ.
22 A fɩ cɔrɔ də̃bəlləkɛ gboona na gbõsiri,
Mɔ̃ wɩ n cɔrɔnɩ thɩ̃ɛ,
Sɩ ɔɔ də̃bəəl na hɛllaa ga.
23 Jɛ afɩ banasɔ bɩɛlbɩɛl bɔɔbɔɔ mɔ̃ wɩ hanɩ,
Na jɩɛ dʋ bʋrɛ afɩ nʋ̃sɔɔra ga n dã.
24 Gɩdonɩ lẽle thɩ̃ɛ na n pʋɔr khorra',
Dɩ jamana kpɩɛ na n too vʋ̃ʋ məle wo məlela ga.
25 Bɔɔkɛ fɩ khabɩnɩ hʋɔn, dɩ hɔ̃ ƴolo bir na thɔɔ,
Khɩa gɔ̃gɔ̃ hʋ̃ɔsɔ a haana banaa.
26 Dɩ fa haananɛ banaa fɩ 'lɛ kẽkena fa n tɔ,
Fa haananɛ bʋkena fɩ thena lɩɛ.
27 Dɩ afɩ bʋ khɛrsɔ na hananɛ ɩlɛ̃ jɔɔ ga n haan fɩ,
na afɩ cɔdara,
Dɩ mɛ̃ fa n hɩɩna dakha thɔ̃daar khɛrsɔ.