Mɔ̃ də̃bəl n hanɩ
26
1 Mɔ̃kɛ nɛɛjɩa na teenɩ kha na obuloa',dɩ thãgba ɲʋɔn na tee kha na jʋ kha bɔa',
Mɛ̃ gɩ dakha, i dʋbɩrɛ na teena də̃bələ'.
2 Mɔ̃kɛ 'lomin na thãgba sikukubir n dɛnɩ ƴũu pɔy,
Wa n ji thɩrʋra ga.
Mɛ̃ gɩ ha na sʋɔnɩkɛ na hananɩ kɩrʋa',
Gɩ n kar pɔy ga n 'li tibilə'.
3 Mɔ̃kɛ nɔ kpala ther teenɩ kha na gãgʋʋ,
Dɩ ciləmũu tee kha na kũkə̃ə,
Mɛ̃ nanaar gbolbir tee kha na də̃bəli gɔr.
4 Fa n birse də̃bǝl mɔ̃kɛ ɔɔ də̃bǝǝl hana',
A mɛ̃ ga fɛrɛ dakha fa hʋʋrɛ.
5 Birsene də̃bǝl, mɔ̃kɛ ɔɔ də̃bǝǝl hanɩ,
A mɛ̃ ga a na kpɩɛrɛ ɩnɩ kpɛsɛrɛ.
6 Tibilikɛ n thɔnananɩ də̃bəl thɩmɩɩ,
Gɩ hor mɔ̃ tibil n kuurni ɔɔ thɛthɛɛ nɛsɔ dɩbara,
dɩ ga nɩɩrɛ na sobɔr.
7 Mɔ̃kɛ gbãgbar nɛɛ n 'leenɩ fãga,
Mɛ̃ də̃bələə sokpaakɛ wɩ n sonɩ awɩ nɔra, n 'lee fãga.
8 Ʋrɛɛkɛ n kpãganɛnɩ də̃bəl,
Gɩ hor bokaar a gba da n pɛ bãbʋʋra ɩnɩ n bã.
9 Mɔ̃ takʋ n janɩ kpãkpo uu dɩɩ puuro,
Mɛ̃ sokpaakɛ n thɛnɩ də̃bəli nɔra n puuro.
10 Tibilikɛ gbaanɩ də̃bəl na tõtol thɔma,
A hor sẽdaarɩkɛ n thaarɛnɩ tɩbɩla bababa.
11 Mɔ̃ bɩɩn n birnɩ dɩ kɛr dɩ kho gɩrɛ a kɔɔ kpeenɩ,
Mɛ̃ də̃bəl n bir dɩ kɛr dɩ fʋ ɔɔ də̃bəəl cʋʋ wo.
12 A fɩ yɩ tibil, kɛ n gbaanɩ ɔɔbara tɩɩ kpɛsɛ,
Jɛ gɩ do də̃bəlləkɛ ka fire baa.
Mɔ̃ khãkhal n hanɩ
13 Khãkhal n sor aa: "Hɔ̃ nʋ̃ puu hale hʋɛra,
Sidũ'ũu hale a jɩɩl hʋɛra".
14 Mɔ̃ loo n khɛrnɩ da n fi ɔɔ kpolobirə,
Mɛ̃ khãkhal n fi ɔɔ phɩ̃ para.
15 Khãkhal n 'lɔɔrɛ ɲɔ̃ɔ dikora,
Sɩ dɩ hɩɩn mɔ̃ a na kɛrnanɩ ɲɔ̃ɔ na dana ɔɔ nɔ, nɩwɛ gɩ.
16 Khãkhal n kpɩɛrɛ ɩnɩ kpɛsɛrɛ,
A jɔrakɛ tɩbɩla makoɲɔɔkɛ jɩɛnɩ dɩ wɩ 'laa tuur na fɩl bʋɔ.
17 Tibilikɛ n kananɩ hʋɛ
Dɩ 'lɔɔ sʋʋraakɛ na teleneena',
A hor tibilikɛ fɔnɩ be kpãkpar nuunə.
18 Mɔ̃ kpãkpũdaar n dʋʋrnanɩ dɔkhãbe,
Sɩ agɩpɩ dɩ so ɩnɩ n kɔɔ ɓole lee!
20 A dɛɛ na ha dɔɔra ga, dɔɔ n khiire,
Dɩ mɛna gɩ, a lĩlir na hala', sʋʋ n pɩrɛ.
21 Mɔ̃ dɔkhãbe n cʋʋnɩ khana dɩɩ ma dɔɔ,
Dɩ dɛɛ n cʋʋ dɔɔ dɩɩ lɩ,
Mɛ̃ dakha kɩl ƴaaldaar n tɔ sʋʋ dɩ pɛr.
22 Lĩliri thɩmɩɩsɔ n daarɛ a ho dikor daw,
Gɩ n gbune bɩnɔ a dã thu.
23 Bɩ̃ puudaarɩkɛ n mɩanɩ 'lã'lã'lã,
A hor ja bʋlaakɛ wɩ gbanɩ dɛ bulo pɩɩn a cal.
24 Tibilikɛ n laarɛnɩ tɩbɩla, delẽbire a n fɩɩlna
Sɩ le ɔɔ bɩnɔ puure hale a hi.
25 Ado a na mɩɩ nʋɔ hɛlɛ hɛlɛ mɔnakɛ,
Sɩ fa n pɩɛ haara', gɩdonɩ kpɩɛr puu hire le ɔɔ hara a dɛ̃dɛ̃ɛ.
26 A punone kero ɔɔ laar dɩɩ the ɔɔ fɩɩla,
Sɩ ɔɔ puu na yɩrrɛ dɩkhõo jɩɛra phubi tɩbɩla fɛʋʋ ƴɛra.
27 Tibilikɛ n kpɩɛnɩ koru, ɔr thɛthɛra n jero,
Dɩ ʋrɛɛkɛ n kpuronenɩ bokaar, ɔrra gɩ n kɛr a ɓɛrɛ.
28 Tibilikɛ n kuroni sõsor dɩ pɛ tibillǝ
Dɩ haar na n heluu, a n laarʋʋrɛ,
Dɩ ʋrɛɛkɛ n mɩanɩ fɩ̃fɩɩl thɩmɩa,
a n pɛr tɩbɩla kʋɛrɛra.