2
1 Mɩ sor ɩ̃ hara ayɩwɔɔ: «Sɩ jala' ! Ma jʋʋr fɛr na thɩɩkɛ daw, fɩ 'lɛ nɔ bɔɔ fɩ hɩɩn.» Dɩ mɩ yɩɛrɛ dɩɩ do gelelakɛ thɩ̃ kananɛna gɩ. 2 Mɩ sor ayɩ: «Mãthɩɩn dor də̃bəəle. Dɩ daw na do bɔ taa thɩ̃ɛa'.» 3 Mɩ tire kpɩɛrɛ ɩ̃ faa ɩ̃bara dɩvɛ̃ yʋɔra ɩ̃ nɩ daw, sɩ ma n cʋʋrɛ na kpɛsɛrɛ, ma n cʋʋrɛ də̃bəəl khaa, gɩ do nɔɔ ɩ̃ jɩ thɩ̃ɛɛkɛ bʋɔnɔnɩ cʋʋrɛra tɩbɩlala kɛ thɩɩra awɩ yi hanana.4 Dɩ mɩ cʋʋrɛ thɔ̃ kɔ̃tɩna: Mɩ mɩrɛ cɔna, a kʋʋl dɩvɛ̃ thɩr lɩɛsɔ; 5 mɩ baan nãkʋɔrsɔ, a ther thɩr caar fɛʋʋkɛ n sɩɛnɩ be, 6 Mɩ kper baalsɔ, ɩ̃ 'lɛ ɲʋɔn ma n sɛna thɩr ɓolaakɛra mɩ diirni. 7 Mɩ ther dee kona a thena dee khɛra, dɩ wɩ kʋɔn awɩ bɩsãsɔ ɩ̃ cɔkara a ɓã wɩrɛraakɛ mɩ thenɩ. Mɩ hananɛ nʋ̃ kɔ̃tɩna na nʋ̃ yɩra jɔɔ, a jɔ wɩrɛ fɛʋʋkɛ kɔɔ kʋlɛ mɩnɩ ƴɩɛ a do jamanasɔ Jerujalɛm dɩɩra. 8 Mɩ 'lɛr dakha mũsumo, a 'lɛ dɛ, a hana lẽlẽ thɩ̃ ɓɔnasɔɔkɛ mɩ 'lɛnɩ jamanasɔɔra na dɩ gbulonesɔɔra dɩɩ və̃vĩə. Mɩ hananɛ nɩ khɩ̃ kona, a hana nɩ khɩ̃ khɛra. Gɩrɛɛkɛ kona n ƴaalnɩ jɔɔ, kɛ dʋɔnɩ khɛra, mɩ hana wɛr tə̃tə̃tə̃. 9 Dɩ mɩ 'lire kɔ̃tɩɩnɛ na sobɔr, mɩ jɔr wɩrɛ fɛʋʋkɛ kɔɔ kʋlɛ mɩnɩ ƴɩɛ a do jamanasɔ Jerujalɛm dɩɩra. Sɩ gelela fɛw ɩ̃ kpɛsɛ bulo mɩ. 10 Thɩ̃ɛ wo thɩ̃ɛ fɛʋʋkɛ ɩ̃ yi yɩnɩ dɩ̃ hana ƴaalɛ, ma tɔ̃ ɩ̃ ha ga. Ma tɔ̃ ɩ̃ ha daw fɩɩʋraka', sɩ mɩ n kãkarɛ ɩ̃ ɲɛ̃ thɔna fɛw. Gɩdonɩ gɛr dʋɔn ɩ̃ kho thɔmanaakɛra mɩ n donɩ. 11 Agɩpɩ, mɩ kpɩɛrnanɛ thɔma fɛʋʋkɛra mɩ kɔɔ cʋʋnɩ na ɩ̃ ɲɛ̃ a hɩɩn, na vɔɔrɛɛkɛ mɩ kɔɔ vɔɔ garnɩ, a yɩɛ dɩɩ do thɩ̃ kananɛ gɩ a ho mɔ̃ tibil n weelenɩ jɩɛ. Khorr na hale thɔmanaakɛ tibil n cʋʋnɩ thɩɩra.
12 Mɩ ƴaalɛ ɩ̃ jɩ aɲee bɔ ca kpɛsɛrɛ na fɩl 'leere agɩbo də̃bəəle hananɩ. Dɩ mɩ so wɔɔ : «Tibilikɛ na deanɩ jamana jamana dʋʋra, aɲe a na cʋʋ dɩ ga ha kpɩɩ na gɩrɛ cacadara kɔɔ cʋʋnɩ?» 13 Dɩ mɩ yɩɛrɛ dɩɩ do: «Kpɛsɛrɛ baar də̃bəəle mɔ̃ɔkɛ dahɩrɛ banɩ dabirə.» 14 Gɩdonɩ tɩɩ kpɛsɛ n yɩrɛ ka a n jalnɩ, sɩ də̃bəl wer dabirəra a n ɩɩr. Sɩ mɩ jɩrɛrakɛ dɩ thɩ̃ bɩɛlla n pɩɛrɛ wɛr yeɲɔ fɛw. 15 Dɩ mɩ sor ɩ̃ hara ayɩ: «Gɩrɛɛkɛ n 'leni də̃bəl, gɛrra na 'le mɩ dakha. Dɩ aɲeraakɛ ma thʋ̃ na ƴaal kpɛsɛrɛra waa gɩ karɔ?» Mɩɩ: «Gele dakha wo, thɩ̃ kananɛna gɩ.» 16 Gɩdonɩ wa n jɩna tɩɩ kpɛsɛ bɔɔ khorr a jɔ də̃bələ'. A ga pʋɔr gbe, wɩ n diinə wer fɛw. Tɩɩ kpɛsɛ n khire dɩ də̃bəl dakha n khi ! 17 Gɛr gɩ yi hananɛ na da mara', gɩdonɩ thɔmaakɛ n dʋɔnɩ kɛ thɩɩra na bɔra'. Gɩdonɩ thɩ̃ kananɛ gɩ fɛw, a hona mɔ̃ tibil na n weelenɩ jɩɛ. 18 Thɔma fɛʋʋkɛ mɩ kɔɔ vɔɔrɔnɩ kɛ thɩɩra na da mara'. Gɩdonɩ ma faarɛ ʋrɛraakɛ na dea mɩnɩ dɩkhõo. 19 Dɩ amɛ na jɩɛn ado tɩɩ kpɛsɛ a na do, agɩbo də̃bəl? Sɩrakɛ ɔr na gbaan ɩ̃ kpɛsɛ thɔ̃ɔkɛ mɩ vɔɔrɔnɩ thɩɩra ga do kpãkpalã ga a na doro kɔ̃tɩn! Gele dakha wo, thɩ̃ kananɛna gɩ. 20 Gɛr gɩ dɩ ɲɛ̃ɛ khiir mɩ thɔma fɛʋraakɛ mɩ kɔɔ vɔɔnɩ kɛ thɩɩra. 21 Tibil ʋkha n vɔɔrɛ thɔmana na kpɛsɛrɛ na jɩɩr na yʋ gbuure sɩ dɩ faa tɩɩ kpɩɩraakɛ na kɔɔ vɔɔrɔnɩnaka'. Gele dakha wo, thɩ̃ kananɛna gɩ a puuro ka. 22 Dɩ aɲe dʋɔnakɛ khorɩkɛ tibil n 'lɛnɩ ɔɔ vɔɔra fɛw na ɔɔ bɔ dora kɛ thɩɩra? 23 Ɔɔ yi hanana fɛw gaarɛra gɩ dɩbara; dɛrara a n too waa, ɔɔ ha na n hɩɩra', dɩtɩnɔnakɛ a n hɩɩra'. Gele dakha, thɩ̃ kananɛna gɩ wo.
24 Thɩ̃ɛɛkɛ baanɩ tibilə gɛr dʋɔn a khɔ a na ɲɔna, a na kãkanɛna gɩrɛraakɛ a n 'lɛnɩ ɔɔ vɔɔra. Sɩ mɩ yɩɛrɛ dɩ gele dakha wo Thãgba n 'laanɛ. 25 Gɩdonɩ tibil ʋmɔ̃ na punone na kho na kãkana sɩ a ga do Thãgba hanaa ga? 26 Sɩ tibilikɛ lonanɩ Thãgba haar, a n haarɛ kpɛsɛrɛ na jɩɩr na daw. Sɩ a n pɛr sopuudaara thɔma dɩ khɩɩ lẽle thɩ̃ɛ dɩ kpalmã dɩ ha ʋrɛ lonanɩ Thãgba haar. Gele dakha wo, thɩ̃ kananɛna gɩ wo a ho mɔ̃ tibil n weelenɩ jɩɛ.