Thɩ̃ɛ fɛʋ hananɛ agɩ bɔ
3
1 Thɩ̃ɛ fɛw hananɛ agɩ cʋʋ bɔ. Dɩ thɩ̃ɛ fɛw hana agɩ cʋʋ bɔ kɛ thɩɩra.2 Tibili kɔ̃ bɔ hale, dɩ tibili khi bɔ hale dakha;
Thɩrʋʋ ther bɔ hale, dɩ thɩrʋʋ phe bɔ hale dakha.
3 Tibil kʋ bɔɔ hale, dɩ tibil kho kpɛɛ bɔɔ hale dakha;
Cɔ wɩɛr bɔɔ hale, dɩ cɔ mɩ bɔɔ hale dakha.
4 Khɩɩ bɔɔ hale, dɩ mãthɩ̃ bɔɔ hale dakha;
Bɔ waal bɔɔ hale, dɩ bɩ̃ sa bɔɔ hale dakha.
5 Boka dʋʋrna bɔɔ hale, dɩ boka khɩɩ bɔɔ hale dakha;
Tibil pal bɔ hale, dɩ bɔɔkɛ wa n palnɩ tibilə hale dakha.
6 Thɩɛnɩ ƴaal bɔ hale, dɩ thɩɛnɩ bu bɔ hale dakha;
Thɩɛnɩ fʋrɔ bɔ hale, dɩ thɩɛnɩ dʋna bɔ hale dakha.
7 Thɩɛnɩ ɓəər bɔ hale, dɩ thɩɛnɩ bɛbɩ bɔ hale dakha;
Thɩmɩɩr mɩɩ bɔɔ hale, dɩ nɔ pɩr bɔɔ hale dakha.
8 Tibili na bɔ hale, dɩ tibili laar bɔ hale dakha;
Koke bɔɔ hale, dɩ ha ie bɔɔ hale dakha.
9 Aɲe dʋɔnakɛ khorɩkɛ tibil n 'lɛnɩ tɔr vɔɔrɛraakɛ a n vɔɔnɩ ɔɔ thɔna? 10 Mɩ yɩrɛ thɔmaakɛ Thãgba pɛnɩ tɩbɩlala dɩ wa n do dɩɩ do vɔɔrɛ gɩ dɩbara. 11 Thɩ̃ɛ fɛʋʋkɛ Thãgba n cʋʋnɩ agɩ bɔsɔɔra bɔrɛ ka. A pɛrɛrakɛ tibili ha bɩnɔ kpɩɛrɛɛkɛ dɔnɩ bɔɔ khorrɩda, sɩ ga do wo tibil na punone na jɩ thɔmaakɛra Thãgba cʋʋnɩ tɔ̃tʋ̃ɔ paar foo a dana khu paara'. 12 Mɩ jɩrɛ dɩ thɩ̃ɛɛkɛ baanɩ tibilə gɛr dʋɔn a na n kãkanɛ nɔ bɔɔraakɛ a hananɩ ɔɔ yi hana bɔɔ. 13 Dɩ dakha, ado tibil na kho dikor a na ɲɔna, a 'lɛna nɔbɔɔ ɔɔ thɔmana fɛw, Thãgbaa khaarda gɩ. 14 Mɩ jɩrɛ dɩ thɩ̃ɛ fɛʋʋkɛ Thãgba n cʋʋnɩ n toore khorr, thɩ̃ɛ na hale dɩ tibil na ɓanɔa', thɩ̃ɛ na hale dɩ tibil na tiroə'. Thãgba cʋʋrɛ mɛ̃ gɩ do nɔɔ tɩbɩla na n maa.
15 Thĩɛɛkɛ hanɩle gɩrɛ, gɩ kɔɔ maan hale, dɩ thɩ̃ɛɛkɛ na ɩnanɩ dɩkhõo, gɩ 'lire hale gɩrɛ pɩ. Thãgba n kɛrnanɛ thɩ̃ɛɛkɛ phɔnɩ ka dɩ birnə dɩ ɩna.
Khir dʋɔn thɩ̃ɛ fɛʋʋ khu pa
16 Thɩ̃ kpɩɩkɛ mɩ yɩnɩ kɛ thɩɩra wo dʋɔn: Paarɩkɛ teananɩ kɩɩl telẽe na n kɩlɛ, le puu cʋʋrɛ ka ha; dɩ paarɩkɛ teananɩ fɩl sarʋ na n cʋɛ, le puu cʋʋrɛ ka ha. 17 Dɩ mɩ sor ɩ̃ hara ayɩ: «Thãgba na kɩɩlnanɛ tɩɩ sarʋ na tɩɩ puu. Gɩdonɩ thɩ̃ɛ wo thɩ̃ɛ hananɛ ɔɔ bɔ, dɩ kɩɩl bɔɔ hale na dananɩ thɔma wo thɔmanaakɛ n dʋɔnɩ.
18 Mɩ sor ɩ̃ hara tɩbɩlaadara mɩɩ, Thãgba n be wer bɩnɛ, gɩ do nɔɔ wɛr thɛthɛ n jɩ dɩ bɩɛlla wɩ do na nʋma. 19 Gɩdonɩ tibili khu pa na nʋmaa khu pa na ha dɩɩdɩa'. Tibil n khire dɩ nʋmɩ n khi dakha. Fesu ca bɩɛla haan wɛr fɛʋra. Tibil na ba nʋma', gɩdonɩ thɩ̃ kananɛ ha thɩ̃ɛ fɛw. 20 Pa bɩɛlla wɛr fɛw n jal. Thɩlãkobera wɛr fɛw the, dɩ thɩlãkoberara wɛr fɛw n bir. 21 Amɛ jɩɛn ado ƴũu tɩbɩlaa fesu n jʋʋn, sɩ nʋmaa fesu wer na n gbũ thɩɩra tɩɛr? 22 Dɩ mɩ yɩɛrɛ dɩ gɩrɛ baanɩ tibilə, gɛr dʋɔn a na n kãkanɛ gɩrɛraakɛ a n 'lɛnɩ ɔɔ thɔmana, gɩdonɩ gɛr dʋɔn ɔɔda. Ado mɛ̃ ga amɛ na birənəə da yɩ thɩ̃ɛɛkɛ na dananɩ ɔɔ khiro ɔbɔɔkɛ a karɔnɩ pɩ?