Thɩɩkɛ hinəne puu cʋʋrɛ
4
1 Mɩ yɩrɛ dakha wo hʋɔl caar fɛʋʋkɛ hanɩ kɛ thɩɩra.Wɩrɛɛkɛ wɩ n hʋɔlɔnɩ n bɩrɛ yilẽbe, sɩrakɛ tibil na hale na ƴɔl wɩ haara'! Gɩdonɩ wɩrɛɛkɛ n kpoone warnɩ, wɛr hɩna fãga, dɩ tibil na hale na ƴɔl wɩ haara'. 2 Dɩ mɩ yɩɛrɛ dɩɩ do wɩrɛɛkɛ 'leni khiire pɩ, ka hananɛ daw a jɔ wɩrɛɛkɛ hananɩ yire. 3 Sɩ ʋrɛɛkɛ hananɩ daw wɛr fɛʋra a jɔrakɛ, ɔr dʋɔn ʋrɛ na kɔɔ thɛnɩ dɩɩra yuurəkɛ a yɩ thɔ̃ puukɛ n dʋɔnɩ kɛ thɩɩra ga.
4 Mɩ yɩɛrɛ a jɩ dɩ vɔɔrɛ fɛʋʋkɛ tɩbɩla n vɔɔnɩ sɩ awɩ thɔ̃ n bɔr, gbugikɛ wɩ hananɩ awɩ alãkha tibilə dɔ kɩrʋ. Dɩ gele dakha wo, thɩ̃ kananɛna gɩ a ho mɔ̃ tibil n weelenɩ jɩɛ.
5 Də̃bəl n kpalalɛ ɲɛ̃ɛ dɩ too dɩɩ do ɔɔbara a kʋ. 6 Hɩɩrɛ gbe fɩɩʋkɛ mãkhananɩ ɲɔ̃kor bɩɛl thɩ̃ɛ baar mɔlɔ thɔ̃ jɔjʋɔɔkɛ hɔnɩ mɔ̃ wa n weenɩ jɩɛ.
7 Mɩ yɩrɛ dakha thɩ̃ kana kpɩɩ wo kɛ thɩɩra. 8 Tibil gɩ aa hana tibilə'; aa hana bɩsaan dɩ õkuun ga, sɩ ɔɔ thɔma na n pɩ woa'. A n hi dakha lẽle thɩ̃ ƴaalɛla kpɩɩa'. Sɩ a n bule ɔɔbara amɛ werrakɛ ɩnɩ n do thɔmana ɩnɩ n ha a ba bonanakɛ nɔbɔɔ yaa ga. Gele dakha wo thɩ̃ kananɛna gɩ; cʋʋ pa bʋɔ ga.
9 Tɩbɩla yeɲɔ har baar tɩɩ bɩɛl har, gɩdonɩ wɩ n 'lɛr khor awɩ thɔna bɔɔbɔɔ a jɔ. 10 Gɩdonɩ a bɩɛl wɛra ji, ɔɔ alãkha na fʋʋrɛ a ɩɩr. Sɩ gɩ puurore ʋrɛraakɛ hanɩ dɩbara sa ji dɩ bubul na haaraa a fʋʋ a ɩɩra'! 11 Mɛna gɩ ha, a tɩbɩla yeɲɔ phɩ̃ kha, gɩ n kpor warɛ, sɩ ado tɩɩ bɩɛl gɩ, mɔ̃ ga fʋ sɩ na kporaa? 12 Ado tibil hana fãga a na puno tɩɩ bɩɛl, sɩ tɩbɩla yeɲɔ wer na thʋnɛ na maaraa. Dɩ pɛ̃ be yẽtherɩkɛ wɩ kperenɩ a le na n kur yɔɔyɔa'.
13 Bɩsã bɔdaarɩkɛ hananɩ kpɛsɛrɛ, a baar jamana kũu kɔ̃tɩ̃ də̃bəlikɛ na n punonenɩ dɩ gba fɩl dɩɩrɛ bã. 14 Gɩdonɩ bɩsã ca ole punone the khaɩra a do jamana, adorakɛ bɔdaar wɩ kɔɔ kʋ̃ɔ dɩ do le ɔɔ dʋɔ. 15 Mɩ yɩrɛ yidara fɛʋʋkɛ n kpaarɛnɩ kɛ thɩɩra dɩ wa n kpa bɩsaanaalera na deanɩ jamana ole a na gba ɔɔ toopa. 16 Tɩbɩlaalera a doronɩ kɔ̃tɩn thʋnɛ jɔr a və̃vĩə wa hana khu paara'. Sɩrakɛ wɩrɛ na kpaanɛnɩ khiro, ɔɔda na da wara'. Dɩ gele dakha wo, thɩ̃ kananɛna gɩ a ho mɔ̃ tibil n weelenɩ jɩɛ.
A phana so nʋɔ na bɔra'
17 Ɔbɔɔkɛ fɩ n jalnɩ Thãgbaa cɔ, dɔ bʋrɛ afɩbarara. Tɔ dana a na pɛ nũu gɩ do nɔɔ, fa n ji də̃bələə bonɩ jə'. Gɩdonɩ wa n jɩ puure wɩ n cʋa'.