5
1 Fa n phana nʋɔ kɔrɔa'. Fa n phana khə̃khə̃ a mɩɩ thɩmɩɩ Thãgbaa ƴɛra ga; gɩdonɩ Thãgba hale ƴũu sɩ fɛrɛ, dɩ fɩ ha kɛ thɩɩra. Gɛr gɩ fa n mɩɩ thɩmɩa tə̃tə̃ ga. 2 Gɩdonɩ mɔ̃kɛ dɛ jɔjʋɔ n ɩnanɩ dəəle, mɛ̃ dakha thɩmɩɩ jɔjʋɔ n pɛr tibilə də̃bəəl mɩɩrɛ.3 Ɔbɔɔkɛ fɩ sonɩ nʋɔ Thãgbara, fa n pʋɔr sa tə', gɩdonɩ də̃bələə cʋʋ pa na n daaraa ga. Gɛr gɩ dɔ fɩ ti nʋɔɔkɛra fɩ kɔɔ sonɩ. 4 A fɩ sɩrɔ nɔ sor, gɩ baar nʋɔɔkɛ fɩ sonɩ sɩ fa tə'. 5 Fa n do afɩ nɔ n tɔ fɩ a pɛ sopuu cʋʋrɛra ga. Dɩ fa n so Thãgbaa thɔ̃daara aa fa dʋrɔ bʋraa ga. Gɩdonɩ aɲera fa cʋʋ Thãgba n gbana fɩ nĩkhii pɔy, a kʋɛ afɩ ɲɛ̃ thɔ̃? 6 Gɩdonɩ mɔ̃kɛ dəəle jɔɔ donɩ thɩ̃ kananɛ, mɛna gɩ ha dakha na thɩmɩɩ jɔjʋɔ. Gɛr gɩ, na ma Thãgba.
Fãga hɩ̃daraa cʋʋ pa
7 Ado fɩ yɩ le dɩɩra bɔdaar dɩ wa hʋɔlɔ, a na kʋɛna tɩbɩlaa hʋ hana na fɩl sarʋ, fa n do nʋɔ n kpaa fa'. Jɛ tɩɩ kɔ̃tɩ̃ɩ hãale yʋɔ dɩ tee da n pɛ tɩɩ kɔ̃tɩ̃ bɩɛla. Dɩ wɛr yeɲɔɔ yʋɔ wo, jɛ gɩ do tɩɩ kɔ̃tɩ̃ kpɩɩ hale jɔ wɩnɩ a hale awɩ yʋɔ. 8 Thɩɩ dɩkookɛ n thɩɛraanɩ, n haanɛ tɩbɩla ɓibi. Ʋrɛraakɛ dʋɔnɩ jamana, thɩɩ dikora n haanɛɛ.
9 Ʋrɛɛkɛ naanɩ war jɔɔ na n hi war yuurəka'. Dɩ ʋrɛ naanɩ lẽle thɩ̃ɛ jɔɔ, lẽle thɩ̃ɛ na n daan kpɩɩraka'. Dɩ gele dakha wo, thɩ̃ kananɛna gɩ. 10 Ɔbɔɔkɛ tibil hananɩ thɩ̃ɛ jɔɔ ɔmɛ̃ khɔkhɔ n jɔr. Dɩ aɲe dʋɔnakɛ khorɩkɛ ntɛ n 'lɛrɔnɩ sɩ a ga do yi haara a hɩna gɩnɩ ga? 11 Thɔ̃don n daarɛ bɔɔbɔɔ, aa 'lɛ dikor gbe a kho, a jɔɔ a 'lɛ a kho yo sɩ a n daarɛ. Sɩ lẽlee thɩ̃ jɔ hana na n fagʋʋ dɩ daara'.
12 Thɩ̃ puu bɩɛl hale wo mɩ yɩnɩ kɛ thɩɩra : gɛr dʋɔn lẽle thɩ̃ɛɛkɛ tibil n thɩɩnɩ dɩɩ bir pɩɛraa thɩlkɩɩr. 13 Lẽle thɩ̃ɛɛlera n bũburone thɔ̃ puu dɩkhara, sɩ dɩ kɔ̃ bɩsaan aa n hana thɩ̃ɛ ɲɔ̃kɔɔ bã. 14 Mɔ̃kɛra a kɔɔ thenɩ na sãɓɔlɔ̃ ɔɔ nɩɩ bɩnɔ, mɛna a na kɛr na bir mɔna a kɔɔ ɩnɩ. A na gba thɩ̃ bɩɛllakɛ thɩɛnaakɛ a kɔɔ vɔɔrɔnɩ a na fʋrɔ ɲɔ̃kɔa'. 15 Gele dakha wo, thɩ̃ puu gɩ a kɔ̃tɩ̃ ka. Gɩdonɩ mɔna a kɔɔ ɩnɩ ɔmɛna a na kɛr na bir. Dɩ aɲe a 'lɛrɔrakɛ tɔr, sɩ ga do jɩɛ a vɔɔ a ha ga? 16 A kʋɛrɛ ɔɔ yi hana thale dabirəra pɔy, ha cɩɩrɛra na bɔ gaarɛra na nĩkhiirə.
17 Gɛr gɩ gɩrɛ mɩ jɩnɩ dʋɔn: gɩrɛ bʋɔnɔnɩ a bana tibilə, gɛr dʋɔn a khɔ a na ɲɔna, a na kãkanɛna gɩrɛraakɛ a n 'lɛnɩ ɔɔ thɔnaakɛ a n donɩ kɛ thɩɩra bɔɔraakɛ Thãgba haanɩ yire, gɩdonɩ gɛr dʋɔn ɔɔda. 18 Gɩdonɩ ado Thãgba ha tibil ler na ɲɛ̃ thɩ̃ɛ, a hanaa punone a na n khɔna, dɩ puno a 'lɛ ɔɔda, a na kãka ɔɔ thɔna, Thãgbaa khaarda gɩ. 19 Gɩdonɩ ɔbɔɔkɛ Thãgba hini ɔɔ ha na daw, a na kpɩɛrna mɔ̃ ɔɔ yi hana na pʋɔrnɩ yemɔ̃a'.