Thãgba maar hananɛ bɔnanɛ
3
1 Ɩ̃ bikuun, fa n diinə ɩ̃ dɩɩra',Na fɔrɔ ɩ̃ jɔfʋsɔ afɩ hara.
2 Gɩdonɩ ga tɔr afɩ yɛ nɔ na dɛɛnɔ,
Gɩ cʋʋ fɩ dakha fɩ hana yire fɩ pʋɔr na ha ɩɩ.
3 Fa n bo fɩl bʋɔ na sobɔra'.
Tɔ gɩ fʋɔrɔ. Kherene gɩ afɩ hara.
4 Thale na dɔ nɔɔ dɩ fa 'lɛ bɔ jɩɩr na i bʋɔ
Thãgbaa ƴɛra na tɩbɩlaa ƴɛra.
5 Faa afɩbara na haar fɛw Thãgba Kɔ̃tɩnna,
Fa n barana afɩ thɛthɛɛ kpɛsa'.
6 Na hɩnɛ ɔr afɩ thɩ̃sɔɔra fɛʋʋkɛ fa n cʋʋnɩ,
Dɩ ɔr na thɔɔ fɩ na pɛ hʋ bʋɔra.
7 Fa n hɩɩn afɩbara mɔ̃ fɩ donɩ tɩɩ kpɛsɛ ka ga,
Sɩ na ma Thãgba Kɔ̃tɩn, a hʋnɔnɛ na puu cʋʋrɛ.
8 Ga dor thɩɩkɛ na hana fɩnɩ tomɩr kheu,
Gɩ ha fɩ fãga afɩ khubisɔɔra.
9 Na dʋba Thãgba Kɔ̃tɩn na afɩ lẽle thɩ̃sɔ,
Gba afɩ caca thɩ̃sɔ fɛw afɩ kokol thɩ̃sɔɔra a na dʋbanaa.
10 Thale na dɔ nɔɔ afɩ thʋ̃ʋsɔ n hi phi na dɩkɔ,
Afɩ dɩvɛ̃ pɛdasɔ n hinə dɩvɛ̃ phaa ga n deer.
11 Ɩ̃ bikuun, fa n beesɩ Thãgba Kɔ̃tɩnɩ naara',
Ado a na phaan fɩ, fa n do gɩ yaa fa'.
12 Gɩdonɩ ʋrɛ Thãgba Kɔ̃tɩn nanɩ, a n phaanʋnɛ,
Mɔ̃ thɩrɛ n phaanɩ bɩsaanɩkɛ a nanɩ.
Kpɛsɛrɛ dor lẽle thɩ̃ kɔ̃tɩ̃ɩ a jɔ dɛ
13 Gɩ da tibiləəkɛ 'lenɩ kpɛsɛrɛ,
Na ʋrɛraakɛ jɩɛnɩ fɩlɛ.
14 Gɩdonɩ kakorɩkɛ kpɛsɛrɛ n 'laanɩ baar gɩrɛ dɛ bulo n 'laanɩ,
Dɩ khorɩkɛ a n 'laanɩ ɓʋ̃ɔ a jɔ dɛ kilele fĩi.
15 Kpɛsɛrɛ dor thɩ̃ ɓʋ̃ɔ a jɔ lẽbi the nɔ khena fɛw,
Thɩ̃ bɩɛl na hale afɩ thɩ̃ ƴaalnasɔɔra fɛw a mãkhanaa ga.
16 Kpɛsɛrɛ n fʋrɔrɛ yi gbãa ɔɔ ɲɔ̃bɔra,
Dɩ fʋrɔ lẽle thɩ̃ɛ na i dʋbɩrɛ ɔɔ ɲɔ̃bɩlana.
17 Ɔɔ hʋsɔ fɛw, hʋ bɔy gɩ,
Ɔɔ ka pasɔ do ha ie haar.
18 Kpɛsɛrɛ dor yi thɩrʋ wɩrɛraakɛ 'lɩɛnɩ,
Wɩrɛɛkɛ jɛnɩ ɔɔ fʋrɔ, daw gɩ n do war.
19 Kpɛsɛrɛ Thãgba Kɔ̃tɩn tinə thɩɩ,
Fɩlɛ a cʋʋna thãgbara ƴũu dɩɩ tɩ.
20 Ɔɔ thɩ̃ jɩ dɔ nɔɔ dɩ kõkor hulõ kɔ̃tɩna n 'laa ɲʋɔn dɩɩ the,
Dɩ ndɔlɔ̃pana na n 'laa ɲʋɔn paar fɛw.
Thãgba n bɛrɛ te kpɛsɛ
21 Ɩ̃ bikuun, hanana fɩlɛ na bɩ̃ kuure; fa n do gɩ hʋnɔna fɩ yuuə'.
22 Gɩdonɩ ga 'laarɛ yire afɩ thɛthɛra,
Gɩ dona far ɓoldaar fʋɔrɔ.
23 Fa n ɩɩrɛ na tu jɩɩr afɩ hʋra,
Dɩ afɩ nɔ na bara thɩɛna ga.
24 A fɩ phɩ̃, ha jɩ̃ɩ na ha fara',
Ɔbɔɔkɛ fa phɩnɩ fa n daarɛ na ha ɩɩ.
25 Fa n dɛna mɔ̃ thɩmɩɩ puu na phuro fɩna',
Fa n dɛna mɔ̃ tɩɩ puunə na the farna'.
26 Gɩdonɩ Thãgba Kɔ̃tɩn na dʋɔn far tujɩ dɛ̃ɛ paar,
A na bɛr fɛr dɩ afɩ nɛ na golõ pherara fɛw.
27 Fa n bo bɔ cʋʋrɛ wɩrɛraakɛ gɩ teenanɩ,
Ɔbɔɔkɛ punone ha farna',
28 Fa n so afɩ 'walãkha tibilə ayɩ: «Kɔna sa ɩna cʋɔ ɩ̃ ha fɩ»,
Ɔbɔɔkɛ fɩ hananɩ thɩ̃doora nĩ a na haa ga.
29 Fa n hana puu cʋʋ kpɩɛrɛ afɩ 'walãkha tibiləəkɛ khonə fɩnɩ,
Sɩɩdorakɛ a toore ba a n kpɩɛrna fɩ puurəə ga.
30 Fa n ƴaal tibil sʋʋ pɔy
Ɔbɔɔkɛ aa cʋʋ fɩnɩ puurəə ga.
31 Fa n gbugi tibilikɛ n khɔnɩ fãga ga,
Fa n phɛl ɔɔ cʋʋ pa bɩɛllaka'.
32 Gɩdonɩ Thãgba Kɔ̃tɩn n laarɛ tɩɩ gõgolõsɔ,
Sɩ a n bɔnanɛ tɩɩ saraa cɔ pa.
34 Thãgba Kɔ̃tɩn n ɓoɓorore ɓoɓorodarara,
Sɩ a n jɩrɛ dɩbara wurdara bʋɔra.
35 Tɩɩ kpɛsɛsɔ na 'lɛr i dʋbɩrɛ a na hɩ̃,
Sɩ də̃bələ n 'lɛ yicuru gɩ do awɩda.