Thɩrɛɛ fɩl dɩɩr ɔɔ bikũusɔɔra
4
1 Ɩ̃ bikũusɔ, na n pɛ thɩrɛɛ dɩɩr nũu,Nɩ gbarɔ nũu a jɛ gɩrɛ n dɔnɩ fɩl jɩɩr.
2 Gɩdonɩ jɩɩrɩkɛ bʋɔnɔnɩ mɩ n dɩɩr nɩ,
Na n bo ɩ̃ dɩɩra'.
3 Mɛr dakha mɩ kɔɔ dor bɩsãa bʋɔ ɩ̃ thɩra a yɩɛ,
Ɩ̃ nɩ n kɔɔ dʋʋr mɛr mɔ̃ wɩ n dʋʋrnɩ bi bɩɛl 'lẽ'lẽ'lẽ.
4 Dɩ ɩ̃ thɩ n kɔɔ dɩɩr mɛr dɩ so:
«Fɔrɔ ɩ̃ thɩmɩɩsɔ afɩ ha bɩnɔ,
Na kpa ɩ̃ jɔfʋsɔɔra, fa hananɛ yire.»
5 Ƴaalɛ kpɛsɛrɛ, a ƴaalɛ fɩlɛ,
Fa n diinə ɩ̃ nɔ thɩmɩɩsɔa', fa n hɛbɩ ga.
6 Fa n bo kpɛsɛra', a na bɛr fɛr,
Naanɛɛ, a na kɛɛ farɛ.
7 Kpɛsɛrɛɛ fʋ pa dʋɔn wɔɔ:
Ƴaalɛ kpɛsɛrɛ, a 'lɩɛ,
'Laanɛ afɩ lẽle thɩ̃sɔ fɛw sa 'lɛ fɩlɛ.
8 Fʋɔnɛɛ bɔɔbɔɔ a na khəi fer fɩ ɩɩr.
Ado fɩ palʋ kĩkĩkĩ, a na ha fɛr i dʋbɩrɛ.
9 A na ho farɛ bãfɩla ɓʋ̃ɔ fɩ subi,
A na ho farɛ jamana kpɩɛ yʋʋra.
10 Pɛ nũu ɩ̃ bikuun, jɩɛ fʋ ɩ̃ thɩmɩɩsɔ,
Ga cʋʋrɛ afɩ yɛ nɔ dɩ ga jɔr.
11 Mɩ dɩɩr fɛr kpɛsɛrɛɛ hʋ,
Mɩ thɔɔ fɛr a pɛr fɩl sar hʋɛra.
12 Ado fa ɩɩr, afɩ nɔ na tharsa',
A fa ca, fa be nɔɔ a na jə'.
13 Fɔ dɩɩrɛɛkɛ fɩ 'lɛnɩ kĩkĩkĩ, fa n dʋna gɩ faa ga;
Jɩɛ fʋrɔ gɩ bɔɔbɔɔ, gɩdonɩ gɛr dʋɔn afɩ yi.
14 Fa n gba tɩɩ puusɔɔ hʋa',
Fa n ɩɩr puu cʋʋdaraa hʋra ga.
15 Golone hʋɛraale, fa n gbaa ga;
Lɛna sa fagaa, kana hʋ kpɩɩ.
16 Gɩdonɩ tɩbɩla wɛ, a wa cʋʋ puurə', wa n daara',
A wa kpɛɛ tibilə', daan na n fʋ wa'.
17 Gɩdonɩ puu cʋʋrɛra wɩ n 'lɛ dikorɩkɛ wɩ n khonɩ,
Dɩ dɩvɛ̃ɛkɛ wɩ n ɲɔnɩ, fãga kho dɩvɛ̃ gɩ.
18 Sɩ fɩl sardaraa hʋʋkɛ wɩ n ɩɩrɔnɩ hor duur dahɩrɛɛkɛ
n dɛbarɔnɩ foo dɩ wire n ba ʋlkhana.
19 Tɩɩ puunəə hʋʋkɛ wɩ n ɩɩrɔnɩ birərə a ho dɩtɩnɛ,
Wa n jɩ thɩ̃ɛɛkɛ na tɔ wɩnɩ na kpɛa'.
20 Ɩ̃ bikuun, jɩɛ pɛ nũu ɩ̃ thɩmɩsɔɔra,
Gbarɔ nũu bɔɔbɔɔ ɩ̃ fɩl dɩɩrsɔɔra.
21 Na hɩnɛ gɩ bɔɔ fɛw,
Fɔrɔ gɩ le afɩ ha bɩnɔ.
22 Gɩdonɩ gɩ n 'laarɛ yire wɩrɛraakɛ tuon gɩnɩ,
Dɩ awɩ tomɩrakɛ koo n 'li kheu.
23 Na dɔ bʋrɛ afɩ hara a jɔ thɩ̃ɛ fɛw,
Gɩdonɩ haara yi hananɛ n the.
24 Fɔ afɩ nɔ gõgolõ thɩmɩara,
Hʋnɔnɛ na afɩ delẽbi fɩ̃fɩɩl thɩmɩara.
25 Dɔ afɩ yisɔ na n hɩɩn afɩ ƴɛbʋrɔ kirkirkir,
Dɔ afɩ hɩɩn pa na n sar dẽdẽdẽ.
26 Kpɩɛrɛ he sa gba hʋɛɛkɛ fɩ n ƴaalnɩ fɩ gba,
Na gba hʋɛɛkɛ dɩbara fɩ jɩrɔnɩ tue.
27 Fa n ɩɩr bʋla bʋla ga,
Golone puurera.