Bʋdʋr, khɛr bɔdɛlɩ fifiləla
5
1 Ɩ̃ bikuun, na pɛ nũu bɔɔbɔɔ ɩ̃ kpɛsɛ thɩmɩɩra,Jɩɛ gba nũu ɩ̃ fɩl dɩɩra.
2 Ga dor nɔɔ fɩ hana bɩ̃ kuure,
Gɩ cʋʋ afɩ delẽbi n puno a na n mɩɩ gɩrɛ thɛnɩ jɩɩra.
3 Gɩdonɩ khɛr bɔdɛlɩ thɩmɩɩsɔ n mɩlalɛ a ho thʋʋr,
Ɔɔ delẽbi thɩmɩɩsɔ har jɔl jɔl jɔl a jɔ niin;
4 Sɩ pɩpɩɩr paar gɩ n kharɛ a ho kpalʋ,
Gɩ n kure mɔ̃ bajɩna ƴɩɛ yeɲɔdaar n kurnɩ.
5 Khirii pa ɔɔ nɛ telẽ dɩ ga n jal,
Ɔɔ nɛsɔ daanakɛ khĩdidaraa dʋɔ pɩ.
6 A n therna hʋɛɛkɛ n jalanɩ yirera ga,
Bu paar ɔɔ hʋsɔ n jal sɩ aa ja'.
7 Gɛr gɩ nɛnɛ̃, ɩ̃ bikũusɔ, nɩ pɛ mɩ nũu,
Na n bo ɩ̃ nɔ thɩmɩɩsɔa'.
8 Hʋnɔnɛ na khɛr caarɩle fĩi,
Fa n wɔrɔnakɛ ɔɔ cɔ lõfonɔa'.
9 A mɛ̃ ga, fa cʋʋrɛ dɩ ʋkha na tee far cʋʋr,
Dɩ kuun bɔjɩ 'leedaar na ɓɔr afɩ yɛ nɔ.
10 Dɩ kpakpala na gbaar afɩ lẽle thɩ̃sɔ wa n kho pɔy,
Tɩɩ kpɩɩsɔ n fi wɩ tee khorɩkɛ thɛnɩ afɩ vɔɔra mɔlɔ wɩ kɔna awɩ cɔsɔ.
11 Dɩ pɩpɩɩ paar,
Ɔbɔɔkɛ fa vɔɔnɩ, dɩ fãga na pɩ fɩ tomɩra, fa n ɩɩrɛ,
12 Ga bɔɔle fa n sor: «Pha! Aɲe gɩ dɩ̃ bo dɩɩrɛ ya nɛ ?
Aɲe cãa mɩ dɩ̃ beesɩ phaanɛ ya fɛ?
13 Aɲe dɔ nɔɔ dɩ ma kɔɔ pɛ ɩ̃ dɩɩrdara nũə',
Mɔ̃ dɔ nɔɔ dɩ ma kɔɔ pər wɩrɛraakɛ n kɔɔ dɩɩrɛ mɩna'?
14 Gbe fɩɩʋ kɔɔ sɛ sɩɩ do thɩlke caar fɛw kɔɔ 'li mer,
Tɩbɩlaakɛ kpanɩ jɛɛ thɩ̃thɩɩn.»
Na afɩ daɓolbir khɛr
15 Na ɲɔ ɲʋɔnɩkɛ hanɩ afɩ thɛthɛɛ ɲɔ tɛ korro,
na ɲʋɔnɩkɛ n buoni afɩ bir bɩnɔ.
16 Aɲeraakɛ afɩ ɲɔ bu ka ɲɔ̃sɔ na cel ga n the jɩɛra, hʋɛsɔɔra,
Dɩ afɩ ɲɔ kɔlɔ̃ ɲɔ̃ gɩ a na cel ga n bɩ̃bɩlã kpa jɛ paarsɔ?
17 Dɔ gɩ do afɩda dɩbara,
Na n gbɛbɩ kha na kpakpala ga.
18 Bɔnanɛ n hana ɲɔ bu kaaraakɛ fɩ hɩnɩ,
Dɔ khɛrɩkɛ fɩ ɩɩrnanɩ afɩ daɓol bɔɔ na n da far.
19 Naʋra, a hor nʋ̃ta khɛr, hɛlɛlɛ fɩlɛla, a hor jʋwala khɛr,
Dɔ ɔɔ bɔ na n hal fɩ wire wo wire,
Dɔ ɔɔ naw na n ha far bɔɔ fɛw.
20 Ɩ̃ bikuun, aɲera khɛr bɔdɛl na n hal fɩ?
Aɲera fa n bəər khɛr kpɩɩ ɩlɛ̃sɔ?
21 Gɩdonɩ Thãgba Kɔ̃tɩn n yɩrɛ tibili cʋʋ pasɔ,
A jɩrɛ ɔɔ fɩl.
22 Tɩɩ puu dɩpasɔɔra n lie a fʋrɔ,
Ɔɔ thɛthɛɛ sopuu n fʋɔnɛɛ mɔ̃ pheru n fʋnɩ.
23 A na khiri gɩ the dɩɩr 'leerera,
Ɔɔ də̃bəəl jɔ cʋʋ na cʋgɛɛ a bu.