Maardose na Hamãa thʋ̃kha \ref Sokp 29.16, 26-27; 27.3-4; Khɩ 10.
3
1 Mɔ̃ ga pʋɔrnɩ gbe, Asierisi jamana khǝire kuun bɩɛlɩkɛ wɩ n wenɩ Hamã, kɛ dɔnɩ Hamedataa bikuun, Agagɩɩ mǝl. A pɩɛraarɛ dɩ do minisisɔɔ kɔ̃tɩ̃. 2 Dɩ wɩrɛ fɛʋʋkɛ dɔnɩ thɔ̃ dodara le jamanaa cɔ, fɛw n gburõkhure Hamãa ƴɛra gɩdonɩ mɛ̃ jamana yɩ wa n cʋɛ. Sɩ Maardose wer bor. A n gburõkhu Hamãa ƴɛra ga. 3 Dɩ thɔ̃ dodaraale bule Maardose mɔ̃ dɔnɩ nɔɔ dɩ aa n cʋ gɩrɛ jamana sona'. 4 Dɩ wire fɛw, mɛna wɩ n 'lororaa, sɩ aa n pɛ wɩ nũǝ'. Maardose kɔɔ mɩɛ wɛr ayɩ juifi hanɩ. Dɩ mɔna a n bonɩ gburõkhure Hamãa ƴɛra, wɩ gbaar jalna mɩɩ Hamã wɩ hɩɩn ado a na bor na fʋrɔ ɔɔ cʋʋ para.5 Dɩ mɔ̃ Hamã jʋʋrnɩ a yɩɛ dɩɩ do Maardose na n gburõkhu ɔɔ ƴɛra gera', nĩkhii fʋʋrɛ. 6 Wɩ kɔɔ mɩgʋʋrɛ aa juifi Maardose do. Dɩ hɩɩn a ɩnɩ kʋ Maardose bɩɛl dɩbara, ga do thɩ̃ɛ ɩnɩ cʋʋa'; dɩ ƴaal hʋɛ sɩ a kʋʋr ɔɔ too juifisɔ, kɛ hanɩ paar fɛw Asierisi jamanaa dʋɔ. 7 Asierisi na cʋʋnɩ yɛna yʋɔr yeɲɔ ɔɔ jamana dora, yɩɛrɩ caca sɩpora, kɛ dɔnɩ Nɩsã sɩpor, wɩ lɩrɛ lɩɩ, kɛ wɩ n wenɩ puur, Hamãa ƴɛra wɩ puno wɩ jɩ ʋmɔ̃ɔ wi na bʋɔnɔnɩ juifisɔ kʋʋrra. Dɩ lɩɩra jinǝne sɩpora yʋɔr yeɲɔdaa, kɛ dɔnɩ Adaar sɩpor.
Hamã ƴaalɛ a kʋʋr juifisɔ \ref Sokp 29.16-27; 27. 3-4; Khɩ 10
8 Dɩ Hamã so Asierisi jamanana: «Ca kpɩɩ hakɛ a ɲaɲaana tɩbɩla paar fɛw afɩ dʋɔ. Awɩ jɔfʋsɔ har kpɩɩ ga khunǝ asɩda ga. Wa n cʋ fɛr jamanaa nɔ thɩmɩa'. Aɲera fa faa tibil ca wele dɩɩra a na 'lɛrɔ. 9 Ado fɩ ture, dɔ wɩ kherẽ sɛbɛɛkɛ na 'laanɛnɩ hʋɛ wɩ kʋrɛ wɩ, sɩ ɩ̃ ti mũsumo, kilǝ gbɩlanɩ der paar tãather, ɩ̃ ha afɩ thɔ̃dara wɩ pɛr dɩ khɛɛsʋʋra. 10 Dɩ jamana for ɔɔ ɲɔ̃bi to a haa Hamãakɛ dɔnɩ Hamedataa bikuun, juifisɔɔ lãlaarda, kɛ dɔnɩ Agagɩɩ mǝl, 11 sa sʋʋraa, a sɛrɔ ɔɔ war, sɩ ɩnɩ haarɛ tɩbɩlaale a cʋɛ wɩ mɔ̃ a n ƴaalnɩ. 12 Dɩ wɩ wer jamanaa sɛbɛ kherẽdara, caca sɩporɩ wire yʋɔr yẽtherra, dɩ wɩ kherẽ gɩrɛ Hamã sonɩ fɛw na jamanaa i a thɔna ha jamanaa mɩmɩɩsɔ, a ha dɩ gbulõ kɔ̃tɩna, a ha wɩrɛ dɔnɩ kɔ̃tɩna caarra fɛw bɩɛlbɩɛl. Wɩ kherere sɛbɛsɔra na ca thɩmɩɩ dɩɩdɩɩ mɔ̃ dɩɩsɔ hanɩ na awɩ ca thɩmɩɩsɔ na awɩ kherẽ ƴɛ a gba jamanaa ɲɔ̃bi tokɛ a n pɛnanɩ jɩɩn ɔɔ sɛbɛsɔra, a pɛrna. 13 Dɩ wɩ kɔɔ pɛrɛ tɩbɩla dɩ wɩ gba sɛbɛsɔra a kpaarna jamana dɩ gbulonasɔra fɛw a tɩnɛ. Gɩ sor sɛbɛsɔrara ayɩ: Nɩ kʋrɛ Juifisɔ fɛw, nɩ bũburone wɩ, nɩ te wɩ: daɓola, kɔ̃tɩna, khɛra na be; nɩ kʋrɛ wɩ wi bɩɛlla fɛw, yɩɛrɩ ɲẽbe yʋɔr yeɲɔ sɩporɩ wire yʋɔr yẽther wirǝ, kɛ dɔnɩ Adaar sɩpor. Wɩ kʋrɛ wɩ sa khɩa awɩ thɩ̃sɔ fɛw a hɩna. 14 Dɩ dɩ gbulonǝsɔra fɛw, a wɩ 'lɛ sɛbɛɛle wɩ n mɩɛrɛ dɩdara fɛw dɩ wɩ nɩɛr gɩ do nɔɔ fɛw n puno wɩ gbɛbɩ wɩ pɩ, wa n pɩɛr wireele. 15 Dɩ thɔ̃thɔnaale ther na phananɛ a jal mɔ̃ jamana thɔ̃ wɩnɩ. Dɩ wɩ hulene ga thɩmɩɩ le Suuji dɩɩra. Dɩ dɩdara har ha kʋɛrɛra. Sɩ jamana na Hamã too wa n ɲɔ taan.