Juifisɔ har ha kʋɛrɛra a li nʋɔ. \ref 2Fã 19.1-4; 2Kur 20.3-4, Ɛsɩ 8. 21-23
4
1 Ɔbɔɔkɛ Maardose nɩɛrnɩ gɩrɛ fɛʋʋkɛ n kanɩ, a ɓǝǝre ɔɔ kẽkẽ, a bʋl thoo, sa gba bɔrɔ kẽkɩɩn a to, a the a bɩ dɩɩra da n kpaarna. 2 Mɔ̃ a danɩ jamanaa cɔ lõfonʋɔra, aa 'la na lõa'; gɩdonɩ tibil na hana hʋɛ a na lõ liir na bɩbɩ kẽkɩɩna'.3 Dɩ gbulonǝsɔra fɛw, kãakɛ jamanaa nɔ thɩmɩɩle danɩ, gɩ n hor bɩɩ kɔ juifisɔɔ pa. Dɩ mɛ̃ wɩ li nʋɔ, dɩ wa n bɩna, dɩ wa n hulena; jɔɔjɔɔ n to bɔrɔ kẽkena, a na gbʋrna thoora.
4 Dɩ Ɛsɩtɛɛr thɔ̃do kheminǝ na konaakɛ wɩ kʋɛnɩ kuun dʋʋr, kɛ n hɩnɛɛnɩ jaal a mɩgʋʋ, dɩ ɔɔ kpɩɛr ɲaɲaan koo. Dɩ thɔna kẽkena wɩ hana Maardose a to sɩ a tiir bɩbɩ kẽkenaale, sɩ Maardose bo. 5 Dɩ le Ɛsɩtɛɛr we ɔɔ hɩ̃hɩɩn bɩɛlɩkɛ wɩ kʋɛnɩ kuun dʋʋr, kɛ dɔnɩ Hatakɩ, kɛ jamana pɛrnɩ a na n hɩnɛɛ, a thʋ̃ɔ a bulene Maardose gɩrɛ n kanɩ na gɩrɛ dɔnɩ kɩrʋ dɩ ha ha kʋɛrɛra. 6 Dɩ Hatakɩ jal yɩ Maardose, kɛ kɔɔ hanɩ le 'lo a jɩɩl le jamanaa cɔ phielo. 7 Dɩ Maardose gba gɩrɛ dananɩ a mɩgʋʋ, a mɩɛnaa dakha war nʋɔɔkɛ Hamã ƴaalnɩ a pɛr dɩ khɛɛsʋʋra sɩ wɩ kʋʋr juifisɔ fɛw. 8 A haarɛ dakha sɛbɛɛkɛ wɩ 'laanɩ Suuji dɩɩra, juifisɔ kʋʋrdara, a hana Ɛsɩtɛɛr a hɩɩn sɩ a jal a ƴɛɛ jamana a pɛr ɔɔ too juifisɔra a jɩ wɩ bʋɔra. 9 Dɩ Hatakɩ kɛr jal mɩɛ Ɛsɩtɛɛr gɩrɛ Maardose sonɩ. 10 Dɩ Ɛsɩtɛɛr bir thʋɔn wo a jalla sɔ Maardosera a yɛ: 11 «Jamanaa thɔ̃ dodara fɛw, na wɩrɛ fɛw hanɩ jamanaa dɩ gbulõsɔra fɛw, kona na khɛra fɛw jɩrɛ dɩ jɔfʋ hale, kɛ pɩɛrɛnɩ ayɩ: tibillikɛ na lonanɩ jamanaa cɔ bɩ̃ gbasara sɩ ga do ɔr wɩa', ntɛɛle wa kʋʋrɛ. Ʋrɛ dɩbara n lonanɩ dɩ jamana 'laaraa ɔɔ dɛ gbãgalãbir, ɔr na 'lɛ yire. Sɩ wire kpelẽ yʋɔr ha gɩrɛ, jamana na we mɩnɩ ɔɔ pa ga». 12 Ɔbɔɔkɛ wɩ mɩɛnɩ Maardose, gɩrɛ Ɛsɩtɛɛr sonɩ, 13 a thʋɔn sʋʋraa ayɩ: «Fa n kpɩɛr, fer wer na therore dɩbara juifisɔɔ thɩ̃thɩɩn gɩdonɩ jamanaa cɔ fɩ ha ga. 14 A fɩ bo sɩ na pɩr thɩmɩɩraakɛ, jɛna dɩ bulle na taarɛ na ther dɩkhãa pa na ɩ̃ sɛr juifisɔra, sɩ fɛrɛ na afɩ thɩɩ cɔ, na khiire. Amɛ jɛ? Agakpaana', gɩrɛɛkɛra dɔ kɩrʋ fɩ hanɩ kɩɛr. 15 Dɩ Ɛsɩtɛɛr thɔ̃ so Maardosera: 16 «Jalla kpa juifisɔɔkɛ hanɩ Suuji dɩɩra a dera. Nɩ le nʋɔ a ɓana mɩ. Na n kho dikora', na n ɲɔ ɲʋɔna', dɩwɩlʋ na dɩtɩnɛ, a cʋɛna wire yẽther. Mɛrɛ dakha, ma lire nʋɔ na ɩ̃ thɔ̃daar khɛrsɔ. Agɩpɩ ma lʋʋn jamanaa pa, narakɛ awɩ jɔfʋʋle fɛw; ado mɩ teena ɩ̃ khe, ɩ̃ khi. 17 Dɩ Maardose kɛr a kɔ̃, a cʋʋ gɩrɛ fɛʋʋkɛ Ɛsɩtɛɛr sʋʋraanɩ a cʋɛ.