Ɛsɩtɛɛr pɛrɛ 'lar sa lõ jamanaa pa. \ref Ɛsɩt 4.10-17; 7.1-6; Sokp 21.1
5
1 Wire yẽther wirera, Ɛsɩtɛɛr gbɛbɩrɛ biire, a to ɔɔ jamana khɛr kẽkẽ, a lõ jamanaa cɔ bɩ̃ gbasara, a pɛ ƴɩɛ ka jamana toonɩ. Jamana kɔɔ hale a too ɔɔ fãga too para, le ɔɔ cɔ, a pɛ ƴɩɛ lõfonʋɔra. 2 Ɔbɔɔkɛ a yɩnɩ Ɛsɩtɛɛr le ɔɔ gbasara, a teguure. Dɩ mɛ̃ a 'laa ɔɔ dɛ gbãgalãbirikɛ a fʋrɔnɩ ɲɔ̃kɔɔ, dɩ Ɛsɩtɛɛr tɔ pɔ a tharɔ mɩ̃kaara. 3 Agɩpɩ dɩ jamana bulee: «Aɲe ɛna fɩ yaa Ɛsɩtɛɛr? Aɲe fɩ n ƴaal? Adorakɛ ɩ̃ jamana dɩ phɛ̃ bɩɛl fɩ n ƴaal, ma ha fɛr.» 4 Dɩ Ɛsɩtɛɛr birsee: «Ado fɛr jamana ture, ɩna na Hamã nĩ ɩ̃ pa a khɔ dikorɩkɛ mɩ gbɛbɩnɩ afɩ irǝ». 5 Dɩ jamana thɔ̃ wɩ phana jalla sɔ Hamana, a pɔ ɩnɩ n jal Ɛsɩtɛɛr wera. 6 Dɩ jamana na Hamã jaal wɩ kho dikorɩkɛ Ɛsɩtɛɛr gbɛbɩnɩ a wena wɩ. Mɔ̃ wɩ khonɩ pɩ, a ha wa n ɲɔ dɩvɛ̃, jamana bulele Ɛsɩtɛɛr: «Aɲe dɔ afɩ bɩɛl? Ma ha fɛr. Aɲe dɔ afɩ ƴaal? Adorakɛ, ɩ̃ jamana dɩ phɛ̃ bɩɛl fɩ n ƴaal, ma ha fɛr» 7 Dɩ Ɛsɩtɛɛr birsee: «Gɩrɛ mɩ n ƴaalnɩ yaa?... 8 Ado mɩ 'lɛr fɛr jamanaa bɔjɩ, ado fa ture na ha mɩ gɩrɛ mɩ n bɩɛlnɩ, birǝ ɩna cʋɔ na Hamã a khɔ dɩko kɔ̃tɩ̃ɩkɛ ma gbɛbɩnɩ anɩ irǝ, gɛrra ma mɩɛ fɩ, gɩrɛ dɔnɩ ɩ̃ ƴaal.»Hamã n ƴaalɛ a kʋ Maardose \ref Jɔb 20.4-8; khɩ 37.12-13, 35
9 Ga wiilera, Hamã ther le Ɛsɩtɛɛr cɔ na daw na ha ɩɩ. Mɔ̃ a n thenɩ jamanaa cɔ lõfonʋɔra a yɩrɛ Maardose. Sɩ Maardose na ɩɩr, a ba cʋʋraakɛ dɩkha, gɩ nɩna a cʋʋra'. Dɩ nĩkhii thaa Maardosera. 10 Sɩ dɩ fʋ haar sa kɔ̃ cʋɔrɔ, a thɔ̃ we ɔɔ kũusɔ na ɔɔ khɛr Jerɛsɩ. 11 Dɩ liir a ma da n nɩna wɩ ɔɔbara mɔ̃ a donɩ tibil. A nɩna wɛr ɔɔ i dʋbɩ lẽlẽ thɩ̃sɔ, na mɔ̃ a hananɩ bikona jɔɔ; a mɩɩna wɩ dakha, mɔ̃ jamana khǝsuuni a cʋgʋʋ dɩ do yʋʋ jamanaa minisisɔra na ɔɔ thɔ̃darasɔra. 12 Sa bir so wo: «Dɩrakɛ, mɛr jamanaa khɛr Ɛsɩtɛɛr we dɩbara na jamana dɩko kɔ̃tɩɩnaakɛ a gbɛbɩnɩ. Dɩ cʋɔrakɛ wo, mɛrra a we na jamana. 13 Sɩ gelelakɛ fɛw na do mar thɩ̃ɛ ado ɩ̃ yi bi na n yɩrɛ juifi kuun Maardosedaarɩle jamanaa cɔ lõfonɔra ga. 14 Dɩ ɔɔ khɛr Jerɛsɩ na ɔɔ kũusɔɔle sʋʋraa: «Gele na do thɩ̃a'; gbɛba tɩɩ kʋ thɩrʋ, a gbaan mɛtɛrɛ kpelẽ yemɔy; cʋɔ duuro fɩ jal fɩ mɩɩna jamana wɩ juro Maardose, dɩ mɛ̃ fa jalna ha ɩɩ na jamana dɩko khʋʋ». Dɩ fɩlɛɛle dar Hamana na sobɔr, dɩ gbɛbɩ tɩɩ kʋ thɩrʋra.