Jamana dʋbɩrɛ Maardose. \ref Sokp 14. 35,19; Luk 1.52-53
6
1 Ɔ dɩtɩnɔɔle daan bor jamana yire; aa puno na daara'. Dɩ yɩ wɩ gba dɩ sɛbɛ kɔ̃tɩ̃ɩ a pɔna. Dɩ wɩ pɔnanɛ sɛbɛra a so ɔɔ ƴɛra. 2 Dɩ wɩ kɔɔ khɛrɛ kapaarɩkɛ wɩ kherenɩ Bɩgɩtã na Terɛsɩɩkɛ dɔnɩ jamanaa thɔ̃dara yeɲɔɔkɛ n hɩnɛnɩ ɔɔ cɔ lõfonɔɔda, mɔ̃ wɩ ƴaalnɩ wɩ kʋ Asierisi jamana, dɩ Maardose khɩɩraa. 3 Dɩ jamana bule: Aɲee dɔ karɩkɛ sɩ kanɩ Maardose gelelala? Mɔ̃ sɩ dɩbʋʋ?» Dɩ ɔɔ thɔ̃ dodara birsee: «Wa cʋʋraa thɩ̃a'».4 Dɩ jamana bule: «Amɛ hãale gbasara?» Sɩɩ do Hamã pʋɔn da n lõ gbasa kɔ̃tɩɩna, a mɩɩna jamana a bɩɛlʋʋ sɩ wɩ ju Maardose tɩɩ kʋ thɩrʋraakɛ a gbɛbɩnɩ. 5 Dɩ thɔ̃ dodara sʋʋraa: «Hamã hanale gbasara». Dɩ jamana so a lona. 6 Dɩ Hamã lʋʋn dɩ jamana bulee: «Aɲe wɩ n cʋʋ tibilǝǝkɛ jamana ƴaalnɩ a dʋbɩ?» Dɩ Hamã n kpɩɛrɛ ayɩ amɛ wer hãale dɩ jamana na dʋbɩ sɩ a ga do ɩnɛr ga. 7 Dɩ birse jamana ayɩ: «Tibilikɛ jamana ƴaalnɩ a dʋbɩ ya?» 8 Dɔ jamana n 'laa ɔɔ gbɔɔlɔ̃ bɩɛlɩkɛ a kɔɔ tonɩ, a 'laana dakha gãgʋʋkɛ a kɔɔ jʋʋnɩ, kɛ wɩ subinɩ jamana kpɩɛ. 9 Dɔ minisi bɩɛl n gba gbɔɔlɔ̃ɔle a to ntɛ, a cʋgʋʋ a jʋʋn gãgʋʋle, a thɔgʋʋ a na n kpaarna dɩɩra, a na n sona: "Nɩ yɛ mɔ̃ jamana n cʋʋnɩ tibillikɛ a n ƴaalnɩ a dʋbɩ"». 10 Dɩ jamana so Hamana: «Phana khǝ̃khǝ̃ a gba gbɔɔlɔ̃ na gãgʋʋra mɔ̃ fɩ sonɩ, a cʋɛ gɩrɛ fɛʋʋkɛ fɩ sonɩ juifi kuunaakɛ n tɔɔnɩ jamanaa cɔ lõfonʋɔra, kɛ dɔnɩ Maardose. Fa n sɩ thɩ̃ bɩɛllakɛ gɩrɛrakɛ, fɩ mɩɛna'». 11 Dɩ Hamã jal a gba gbɔɔlɔna a to Maardose, a cʋgʋʋ dɩ jʋʋn gãgʋʋrara, sa thɔgʋʋ da n kpaarna dɩɩra da n sona: "Nɩ yɛ gɩrɛ jamana n cʋʋnɩ tibilǝǝkɛ a n ƴaalnɩ a dʋbɩ"».
12 Agɩpɩ, Maardose kɛrɛ bir ɔɔ thɔna, le jamanaa cɔ lõfonʋɔra, sɩ Hamã thi ƴɩɛ a kɛrna phananɛ a kɔ̃ na yicuru ɔɔ cɔ. 13 Dɩ Hamã mɩɩrɛ ɔɔ khɛr Jerɛsɩ na ɔɔ kũusɔ gɩrɛ kɔɔ danaanɩ. Dɩ ɔɔ fɩl 'laadara na ɔɔ khɛr Jerɛsɩ sʋʋraa: «Jɛna fa puno Maardose, kuunile fɩ manɩ dɩ fa n wuro gɩrɛ bã', gɩdonɩ juifi haa mɛna a na n sʋʋr fɩ. 14 Wa mɩɩrakɛ pa', sɩ jamanaa thɔ̃thɔna pɔ na phananɛ wɩ kpa Hamã wɩ jalna dikorakɛ Ɛsɩtɛɛr gbɛbɩnɩ a wena wɩ.