Ɛsɩtɛɛr caanɛ Hamã sʋʋ. \ref Ɛsɩt.5.7-14; khɩ 37. 12-15, 32-36
7
1 Jamana jaal ɔɔ khɛr Ɛsɩtɛɛr pa na Hamã wɩ kho dikorɩkɛ a gbɛbɩnɩ a wena wɩ. 2 Balaɲɔ wireraale, ɔbɔɔkɛ wɩ hanɩ dɩ wa n ɲɔ dɩvɛ̃, jamana bire bule ɔɔ khɛr Ɛsɩtɛɛr: «Ɛsɩtɛɛr, aɲe dɔ afɩ bɩɛl? Fa 'lɛ gɛr. Aɲe dɔ afɩ ƴaal? Ado ɩ̃ jamana dɩ phɛ̃ bɩɛl fɩ n ƴaalakɛ, ma ha fɛr». 3 Dɩ jamanaa khɛr Ɛsɩtɛɛr birsee: «Ado mɩ 'lɛr fɛr jamanaa bɔjɩ, ɩ̃ bɩɛl dɔ ɩ̃ 'lɛ yire, ɩ̃ too dakha n 'lɛ yire. Gɛr dɔ ɩ̃ bɩɛl. 4 Mɛrɛ na ɩ̃ too, wɩ dolõ ser wɩ kʋrɛ sɩ, a bũburone sɩ, sɩ hɛllɔ. Adorakɛ dolõ haar kɔɔ gɩ, ma kɔɔ so thɩ̃a'. Sɩ sodaar na jɩ puureekɛ a cʋʋnɩ jamanana ga».5 Dɩ le Asierisi jamana bule ɔɔ khɛr Ɛsɩtɛɛr: «Amɛ gɩ? Ka ntɛ ha a hinǝ kpɩɛr kpal caar thaa?» 6 Dɩ Ɛsɩtɛɛr tu: «Asɩ sodaar, asɩ lãlaardaar, Hamã gɩ. Kuun puu dɩkha!» Dɩ Hamã na n jẽ jamana na ɔɔ khɛrɩ ƴɛra. 7 Dɩ mɔ̃ nĩkhii honɩ ga lɩɛrɛ jamana, a ɩɩrɛ dɩko kho paar a the na phananɛ a jal ɔɔ jɛ phʋ̃ pa a Sɩ Hamã too da n ƴɛɛ Ɛsɩtɛɛr gɩ do nɔɔ a 'lɛ yire; gɩdonɩ a jɩrɛ dɩ jamanaa kpɩɛrra, ɔɔda hɛllɔlɛ. 8 Dɩ mɔ̃ jamana thenɩ ɔɔ jɛ phʋ̃ pa a kɛr da n bir le diko kho paar, a yɩrɛ Hamã da n wurõwu too pa gbaanaakɛ Ɛsɩtɛɛr toonɩ. Dɩ jamana phã nɔ khɩɩ: «Fɩ n ƴaalɛ wo fɩ fʋ ɩ̃ khɛr na fãga ɩ̃ yiro, ɩ̃ cɔ ya? Jamana na mɩɩ pɩraka', sɩ dɩ wɩ thi Hamã ƴɩɛb. 9 Dɩ jamanaa thɔ̃daar bɩɛlɩkɛ wɩ n wenɩ Haarbona so jamanana: «Jamana, Hamã kɔɔ gbɛbɩrɛ tɩɩ kʋ thɩrʋ ɩnɩ n juro Maardose ʋrɛɛkɛra kɔɔ taa fɩnɩ. Le a gbɛbɩ thɩɩn ɔɔ cɔ. Thɩrʋra gbaanɛ mɛtɛrɛ kpelẽ yemɔy. Dɩ jamana so, wɩ juonee thɩrʋraalera. 10 Dɩ wɩ ju Hamã tɩɩ kʋ thɩrʋraalera a gbɛbɩnɩ Maardosera. Agɩpɩ dɩ jamanaa nĩkhi ie.