Nehemɩ bire naar thɩ̃ɛsɔ wo
13
1 Ga bɔɔraalera wɩ kɔɔ sor Mʋɩjɩɩ sɛbɛ tɩbɩla fɛʋʋ ƴɛra, dɩ le wɩ yɩɛ dɩɩ khere ayɩ: Amɔ̃ɔ mǝlsɔ na Moabɩɩ məlsɔ na n lõ Thãgbaa too thɩ̃thɩɩn yuuraka'. 2 Gɩdonɩ wa kɔɔ tee Ɩjɩrayɛl bɩsana a ha wɩ dikor dɩ ɲʋɔn ga, sa bir lɩmɩ Balam a tʋɔ pɛ war a sɔna wɩ. Sɩ asɩ Thãgba fire sʋɔn dɩɩ do bɔnanɛ. 3 Ɔbɔɔkɛ Ɩjɩrayɛl bɩsana nɩɛnɩ jɔfʋʋle, wɩ leere kpɩɩ na wɩrɛ na dʋɔnɩ Ɩjɩrayɛl bɩsã birǝ'.4 Mɔ̃ gele na kɔɔ cʋʋnɩ pa', Elɩasɩbɩ bonɩ jidaar wɩ kɔɔ pɛr da n hɩɩn duusɔɔkɛ hanɩ asɩ Thãgbaa fʋɔr cɔra. Ɔɔ tibil bɩnɔ haan Tobɩya. 5 Dɩ Elɩasɩbɩ haarɛ du kɔ̃tɩ̃ɩ kãkɛ wɩ n kɔɔ thɩɩnɩ cacara bonɩ mɩ̃ɩsɔ na latɩkolo na Thãgba fʋɔr cɔ thɩ̃be, bɩɛl yʋɔr bile na bɩɛl yʋɔr dɩvɛ̃ phaa na bɩɛl yʋɔr niin, kɛ wɩ kɔɔ sonɩ jɔfʋra wa n hana Levɩɩ məlsɔ na nɩ khɩna na lõ bɛrdara na khaardaasɔɔkɛ wɩ n kɔɔ tini dɩɩ do bonɩ jidaraada. 6 Ma kɔɔ hale Jerujalɛm ɔbɔɔkɛ gelesɔra fɛw n dana'. Mɩ kɔɔ kɛrɛ a bir Artajɛɛrsɛsɩɩ pa, ɔɔ yɛna kpelẽ yʋɔr yeɲɔra, a cʋʋnɩ jamana dʋʋra Babɩlɔn dɩɩra. Mɔ̃ yɩɛr na pɩnɩ, mɩ 'lɛr hʋɛ jamanana 7 a kɛr a bir Jerujalɛm. Le mɩ yɩ puureekɛ Elɩasɩbɩ kɔɔ cʋʋnɩ mɔ̃ a gbanɩ duukɛ caanɛnɩ na Thãgba fʋɔr cɔ gbasa a ha Tobɩya. 8 Dɩ nĩkhii fʋ mɛr jɔɔ ka, dɩ̃ khɩɩ Tobɩyaa thɩ̃bisɔ fɛw le duu a dʋʋrna phiilo. 9 Agɩpɩ mɩ sor dɩ wɩ phʋɔl duusɔra, sɩ dɩ̃ bir thɩɩnɔ Thãgba fʋɔr cɔ thĩbesɔ na bonɩ mɩ̃ɩsɔ na latɩkolosɔ.
10 Mɩ nɩɛrɛ dakha mɔ̃kɛ Levɩɩ məlsɔ na n 'lɛnɩ gɩrɛ teana wɩna', dɩɩ do nɔɔ dɩ Levɩɩ məlsɔ na nɩ khɩnaakɛ kɔɔ hanɩ thɔmasɔra caalɛ, wɛr fɛw bɩɛlbɩɛl, dɩ ntɛ na n jal ɔɔ lɔɔ. 11 Dɩ mɩ phaanɛ dʋɔ kɔ̃tɩna ayɩ: Mɔ̃ dɔ nɔɔ nɩ faanɩ Thãgbaa fʋɔr cɔ ? Dɩ mɩ bire kpa Levɩɩ məlsɔ na nɩ khɩna a gbɛbɩ a bir pɛ wɩ awɩ thɔna. 12 Dɩ Judaa mǝlsɔ fɛw pɔnanɛ bɩɛl yʋɔr bile na bɩɛl yʋɔr dɩvɛ̃ ta phaa na bɩɛl yʋɔr niin thɩ̃bi thɩɩn cɔnasɔra. 13 Dɩ mɩ gbaar thɩ̃bi thɩɩn du hɩ̃ɩ thɔma a ha Selemɩa bonɩ jidaar na Sadɔkɩ, kɛ dʋɔnɩ jɔfʋ dɩɩdaar na Pedaya, kɛ dʋɔnɩ Levɩ. Dɩ mɩ pɛ warɛ Hanan a na n bul wɩ. Hanan thɩ n dʋɔn Jakuur, dɩ Jakuur thɩ na n do Matanɩa. Wɩ kɔɔ hananɛ i bʋɔ awɩ cʋʋ pa bɔ hanana. Dɩ wɩ pɛ warɛ wa n tɩnɛnɛ awɩ omɩsɔ thɩ̃ɛ.
14 Ɩ̃ Thãgba wei! Jɛna mɩ gɩ do gelela dɔ nɔɔ. Fa n diinǝ fɩl bɔ thɔmaakɛ mɩ donɩ, fɛr ɩ̃ Thãgbaa fʋɔr cɔra, na cʋɔrɩkɛɛ jɔfʋ hɩ̃ɩdara ga.
15 Ga bɔɔlera mɩ yɩ tɩbɩla Juda dɩɩra, dɩvɛ̃ ti paar dɩ wa n ti dɩvɛ̃ hɩɩr wire; dɩ wɩ gba bile a pɛ kũkǝnǝnǝ, na dɩvɛ̃, na dɩvɛ̃ be, na fɩgɩ be, na hẽeda caar dɩɩdɩɩ dɩ wa n pɔna Jerujalɛm hɩɩr wire. Dɩ mɩ kpãkpãa warɛ dawiilera wɩ n dolonɩ awɩ dɩkosɔra. 16 Tɩɩrdaraakɛ kɔɔ tɔɔnɩle hale dakha, dɩ wɩ gba thʋma na thɩ̃ dolõ caar dɩɩdɩɩ a pɔna le a na dolõ Judaa mǝlsɔra na Jerujalɛmdarara. 17 Dɩ mɩ phaanɛ Juda tɩɩ kɔ̃tɩna, a so war mɩɩ: Aɲee cʋʋ pa puu ca ha gɩrɛra nɩ n cʋʋnɩ thaa, dɩ na n ƴɔ̃ƴɔ̃ɔ hɩɩr wire? 18 Ga do thakɛra anɩ thɩ kɔ̃tɩ̃sɔ n kɔɔ cʋaa? Gɛr dɔ kɩrʋ asɩ Thãgba cʋʋnɩ dɩ bɔgaar caarsɔɔkɛ fɛw dã sɩ, na dɩɩkɛ. Dɩ nɩ bir na n ƴɔ̃ƴɔ̃ɔ hɩɩr wire, nɩ jɩɩ tɔ ɔɔ nĩkhi nɩ dɛɛnɔ woo? 19 Agɩpɩ mɩ sor mɩɩ, ɔbɔɔkɛ dɩɩ birǝnɩ, wɩ khaanɛ Jerujalɛm lõosɔ sɩ hɩɩr wire n fʋ. Mɩ sor mɩɩ a hɩɩr wire na ka ga, wa n khɛr lõosɔa'. Dɩ mɩ pɛrɛ ɩ̃ thɔ̃dara daɓolbi ɩkha lõfonʋɔra wɩ pɩɛrɛ, hẽedaar na n lõ le hɩɩr wirǝ'. 20 Dɩ ƴaƴaba na wɩrɛ n dolonenɩ thɩ̃ caar dɩɩdɩɩ cɔr Jerujalɛm khuirǝ babɩɛl, agɩbo balaɲɔ. 21 Dɩ mɩ kpãkpãa warɛ mɩɩ: Mɔ̃gɩdo dɩ nɩ ɩ̃ a cɔ go ƴɛbʋrɔ? A nɩ bir dɛbɩ, ma faa na'. A fʋna ga bɔɔle, wa n bir pɔ le hɩɩr wire bã. 22 Dɩ mɩ sor Levɩsɔra dakha, mɩɩ, wɩ phʋɔlɛ awɩbara, sa jala a na bɛra lõfonʋɔsɔ, a cʋɛ wa n cʋ hɩɩr wire gɩdonɩ wi sãasɩnanɛ gɩ.
Ɩ̃ Thãgba ya, jɛna mɩ gɩrɛraakɛ dakha wo. Bɛra mɩ gɩ do afɩ ha bulo kɔ̃tɩ̃ dɔ nɔɔ.
23 Ga bɔɔlera wo mɩ yɩ Juifisɔɔkɛ hɛnɩ Asɩdɔdɩ khɛra na Amɔ̃ khɛra na Moabɩ khɛra. 24 Dakuru awɩ bɩsãsɔra, Asɩdɔdɩ thɩmɩɩr wɩ n mɩɩ; dɩ ɩkha na n mɩɩ ca ʋrɛɛ thɩmɩɩr dɩ wɛ na n mɩɩ ca olee thɩmɩɩr; bɩɛllakɛ na jɩ Juifi thɩmɩɩr dɩ mɩa'. 25 Dɩ mɩ phãa wɛr, a sɔ̃ wɩ, a bɩɩr ɩkhasɔ, a hal wɩ yʋsuune a phɩɩr, sa cʋʋ wɩ dɩ wɩ ʋlfɛ na Thãgbaa i ayɩ, ɩna bir na ha ɩnɩɩ bikhɛrsɔ awɩ bikũusɔ wɩ he bã. Ɩna bir na gba dakha awɩ bikhɛrsɔ na ha ɩnɩɩ bikũusɔ, agɩbo ɩnɛrɛɛ thɛthɛ n gba ɩnɩ n hea'. 26 Mɩɩ, ga do gelela kɔɔ thɔa Salomɔ̃, Ɩjɩrayɛl jamana dɩ cʋʋ sopuuə'? Jamana na kɔɔ hale ca kpɩɩsɔ fɛʋʋ thɩ̃thɩɩn, a honaa ga. Ɔɔ Thãgba kɔɔ naarɛ ka, gɛr gɩ dɩ pɩɛra dɩ do jamana Ɩjɩrayɛlla, sɩ dɩ ca kpal khɛra hallʋ a to sopuurə. 27 Gɩ teere kha anɩ billo dakha wɩ nɩɛ aa, nɩ cʋʋrɛ sopuu kɔ̃tɩ̃ caar thale, a bʋʋr Thãgbaada, sa he ca kpal khɛra ya? 28 Elɩasɩbɩɩkɛ dʋɔnɩ gbõdaar ɔɔ bikuun Yehoyadaa bikũusɔ bɩɛl hale a do Sanebalaakɛ thɛnɩ Horɔ̃ dɩɩraa thɛɛ. Dɩ mɩ wegʋʋre dɩ hʋnɔna mɩ.
29 Ɩ̃ Thãgba wei, jɛna tibil ca wɩrɛ, kɛ ƴɔ̃ƴɔɔnɛnɩ bonɩ ji thɔma na nɔ bɩɛl ʋlfɛrɛɛkɛ fɩ kɔɔ ʋlfɛnanɩ bonɩ jidara na Levɩɩ məlsɔ.
Pɩpɩɩ thɩmɩɩr
30 Dɩ mɩ lee wer kpɩɩ ca kpɩɩsɔra, a phʋɔl wɩ, a bir jɩɩ thɩɩn jɔfʋʋkɛ bonɩ jidara na Levɩɩ məlsɔ teenanɩ wa n hɩnɛ dɩɩ hana fãga, ntɛ ɔɔ thɔna. 31 Mɩ bire jɩɩ thɩɩn dakha bonɩ ji dɛ ti thɩmɩɩr, kɛ dʋɔnɩ khaardaakɛ teananɩ ga n te bɔɔraakɛra wɩ pɛrnɩ na dakha caca thɩ̃ tidaa.
Ɩ̃ Thãgba wei, jɛna mɩ, a cʋɛ mɩ bɔɔ!