NEHEMƖ 2

Nehemɩ 'lɛr hʋɛ a na jal Jerujalɛm

1 Artajɛɛrsɛsɩ donɩ jamana, ɔɔ yɛna kpelena, nɩsã sɩpora^g, mɔ̃ a hanɩ diko kho paar, mɩ gbaar dɩvɛ̃ a sɛ haa. Ma kɔɔ kʋɛ ƴɩɛ thale kpɩɩrakɛ ɔɔ ƴɛra ga. 2 Dɩ jamana bule mɩ aa: Ga n kho fa', sɩ dɩ fɩ kʋɛ ƴɩɛ thaa, aɲe gɩ? Haar kʋɛa fɩ dɛ! Dɩ maar fʋ mɩ jɔɔ ka. 3 Dɩ̃ɩ birse jamana, mɩɩ: Jamana n hanana yire ƴɛrr! Dɩɩraakɛ ɩ̃ thɩ kɔ̃tɩ̃sɔɔ kasɔ hanɩ wɩɛlɛ, dɩ dɔɔ hɩ̃ ɔɔ lõsɔ, mɔ̃ ma do, sɩ ma kʋɛ ƴɩɛa'? 4 Dɩ jamana bule mɩ aa: Dɩ aɲe fɩ n ƴaal tɔr? Dɩ̃ɩ bɩɛl Thãgbaakɛ hanɩ le ƴũu, 5 sa so jamanana, mɩɩ: Ado ga dar fɛr jamanana, ado mɛr afɩ thɔ̃daar, ɩ̃da da farɛ, thɔna mɩ Juda bǝǝnnǝ, ka ɩ̃ thɩ kɔ̃tɩ̃sɔɔ kasɔ hanɩ ɩ̃ jal ɩ̃ bir ɩ̃ mɩ dɩɩ. 6 Jamanaa khɛr kɔɔ hale a too khunəə, dɩ jamana bule mɩ aa: Bɔɔ yemɔ̃ fa jal a na cʋʋ, dɩ ʋmɔ̃ɔ bɔɔ fa kɛr? Gɩ dar jamanana dɩ ha mɩ hʋɛ ɩ̃ jala. Dɩ mɩ pɛrɛ bɔɔ a haa. 7 Agɩpɩ, mɩ sor jamanana, mɩɩ: Ado ga dar fɛr jamanana, wɩ hana mɩ sɛbɛsɔ ɩ̃ ha gobanɛrsɔɔkɛ hanɩ le mɩɩr iiro, gɩ do nɔɔ wɩ faa mɩ ɩ̃ ka, phaphapha ɩ̃ dã Juda bǝǝnnǝ. 8 Wɩ hana mɩ dakha sɛbɛ ɩ̃ ha Ajafɩɩkɛ dɔnɩ jamanaa lu hɩ̃ɩdaar, gɩ do nɔɔ a ha mɩ thɩra ɩ̃ mɩna sɔrasɩ cɔ kɔ̃tɩ̃ lõfonʋɔsɔɔkɛ khonǝni Thãgba fʋɔr cɔ kɔ̃tɩ̃ɩ, na gʋʋkɛ diǝnɩ dɩɩra, na cʋɔrɩkɛ ma n cɔrɔnɩ. Dɩ jamana ha mɛr, gɩdonɩ ɩ̃ Thãgba har kha na mɛrɛ.

9 Dɩ mɩ jaal a dã gobanɛrsɔɔkɛra hanɩ le mɩɩr iiro, a gba jamanaa sɛbɛsɔra a ha wɩ. Sɩ jamana kɔɔ pɛ marɛ sɔrasɩ kɔ̃tɩna, na gãgo jʋ̃ʋ sɔrasɛ dɩ wɩ thɔɔ mɩ. 10 Dɩ Sanebalaakɛ thɛnɩ Horɔ̃ dɩɩra, na Tobɩaakɛ dɔnɩ thɔ̃daarɩkɛ thɛnɩ Amɔ̃ɔ mǝllǝ, ga da war mɔ̃ wɩ nɩɛnɩ dɩ tibil ɩnɛ da n ƴaal Ɩjɩrayɛl bɩsanaa dabɔa'.

Nehemɩ daan Jerujalɛm

11 Mɩ danɩ Jerujalɛm dɩɩra, wire yẽther mɩ cʋʋ; 12 agɩpɩ dɩ̃ ɩɩr dɩtɩnɔ na tibil ɩkha gbe, sɩ ma nɩna tibil bɩɛllakɛ gɩrɛ ɩ̃ Thãgba kɔɔ pɛnɩ ɩ̃ hara dɩ ma cʋʋ Jerujalɛm dɩɩra ga. Ma kɔɔ hana thɩ̃ kpɩɩ sɩ a ga do kũkǝ̃ǝkɛra dɩbara mɩ n jʋʋnɩ gaaga. 13 Dɩ mɩ ther dɩtɩnʋɔ na lõfonʋɔkɛ eeneni ɓɛlɛ̃, a jalna Dɩragɔ̃^a ɲɔ bu ka billu, na lõfonʋɔkɛ wɩ n wenɩ beethɩ̃ lõfonɔ billu a hɩɩn Jerujalɛm gʋʋra ɓɩɛlɛnɩ, na lõosɔɔkɛra dɔɔ hɩnɩ. 14 Dɩ mɩ kananɛ lõfonʋɔɔkɛ wɩ n wenɩ ɲɔ bu ka lõfonɔ kɩrɔ, na jamanaa ɲɔ tɛ kor kɩrɔ, dɩɩ do ka paar na hale dɩ nʋmɩɩkɛ mɩ jʋʋnɩ na kana ga. 15 Dɩ mɩ gbaar kɔlɔ̃ a jal dɩtɩnɔɔlera a hɩɩn gʋʋ; agɩpɩ dɩ̃ kɛr a kɔ̃ na lõfonʋɔkɛ wɩ n wenɩ ɓɛlɛ̃ lõfonɔ billu^b. 16 Sɩ dʋɔ kɔ̃tɩna na kɔɔ jɩ kana mɩ kɔɔ jalnɩ, na gɩrɛ mɩ cʋʋna'. A dana ɔbɔɔle, ma kɔɔ mɩɛ tibil dakha thɩ̃ɛ, dɩ Juifisɔ wɛ, dɩ bonɩ jidara wɛ, dɩ tɩɩ kɔ̃tɩna gɩ, agɩbo dʋɔ kɔ̃tɩna gɩ, dɩ tɩɩ kpɩɩsɔɔkɛ kɔɔ hananɩ thɔ̃ dɩkha gɩraka'. 17 Liir mɩ so war dɩphã mɩɩ: Nɛrɛ thɛthɛ yɩrɛ bɔ caaraakɛra sɩ hanaa! Jerujalɛm kʋɛrɛ, dɔɔ hɩnɛ ɔɔ lõsɔ! Nɩ ɩna sɩ bir sɩ mɩ Jerujalɛm gʋʋ, dɩ mɛ̃ sa ha yicur caaraakɛ bã. 18 Dɩ mɩ mɩɛ wɛr mɔ̃kɛ ɩ̃ Thãgba kɔɔ hanɩ kha na mɛrɛ, na thɩmɩaakɛ jamana kɔɔ mɩɩ mɩnɩ. Dɩ wɩ sor aa: Sɩ ɩrɛ a mɛ! Dɩ wɩ pɛrɛ 'lar wɩ cʋʋna thɔ̃ bʋɔɔlera.

Sanebala na Tobɩaa nyɛ̃ khiir thɩmɩsɔ

19 Sɩ Sanebalaakɛ thɛnɩ Horɔ̃ dɩɩra, na Tobɩaakɛ dɔnɩ thɔ̃daarɩkɛ thɛnɩ Amɔ̃ɔ mǝllǝ, na Gesɛmɩɩkɛ thɛnɩ Arabɩ dɩɩra nɩɛrɛ, dɩ wa n maan sɩ, dɩ wa n beesina sɩ aa: Aɲe nɩ n ka cʋʋ kɩɛrɩ? Lãʋ nɩ n ƴaal nɩ ɩɩrna jamanana bɛɛ? 20 Dɩ mɩ birse wer thaa ayɩ: Thãgbaakɛ hanɩ le ƴũu, ɔr na hana sɩ punone dɩ sa pɩɩrna thɔmana. Sɛr ɔɔ thɔ̃dara, sa ɩɩrɛ a na mɩ, sɩ nɛrɛ, na hana thɩ̃ɛ kɩɛr a na hɩ̃a', na hana hʋɛ dɩkhara ga, wa jɩna nɩnakɛ Jerujalɛm dɩɩra ga.