NEHEMƖ 3

Juifisɔ bire mɩ Jerujalɛm gʋʋ

1 Dɩ Elɩasɩbɩɩkɛ dʋɔnɩ gbõdaar ɩɩrɛ na ɔɔ alãkha bonɩ jidara a mɩ lõfonʋɔɔkɛ wɩ n wenɩ bana lõfonʋɔ a ha Thãgba, a pɛna lõosɔ. Wɩ mɩrɛ ka fɔnɩ Mea cɔ cõcoolna foo a jalna dana Ananeyɛl cɔ cõcoolna a ha Thãgba. 2 Dɩ Jerɩkodara fʋ awɩ khu pa a mɩ, dɩ Jakuurɩkɛ dɔnɩ Ɩmɩrɩɩ bikuun fʋ Jerɩkodaraa khu pa a mɩ. 3 Dɩ Senaadara mɩrɛ lõfonʋɔɔkɛ wɩ n wenɩ thʋ̃ lõfonʋɔ, a pɩɛrɔ thɩra, a pɛna loosɔ, na kpaladaasɔ na lõ barãbɩdaasɔ. 4 Dɩ Meremɔtɩ fʋ awɩ khu pa a mɩ; ɔɔ thɩɩ i n dʋɔn Uriya, sɩ ɔɔ thɩ kɔ̃tɩ̃ɩ i na n do Hakɔsɩ. Dɩ Mesulam fʋ Meremɔtɩɩ khu pa a mɩ; ɔɔ thɩɩ i n dʋɔn Berekia, sɩ ɔɔ thɩ kɔ̃tɩ̃ɩ i na n do Mesejabɛl. Dɩ Sadɔkɩɩkɛ dʋɔnɩ Baanaa bikuun fʋ Mesulamɩ khu pa a mɩ. 5 Dɩ Tekoadara fʋ Sadɔkɩɩ khu pa a mɩ. Sɩ awɩ ƴɛkʋʋldara na n wur awɩbara kɔ̃tɩnnaakɛ n hɩnɛnɩ thɔma ga.

6 Dɩ Yehoyadaakɛ dʋɔnɩ Paseaa bikuun, na Mesulamɩkɛ dʋɔnɩ Besodɩaa bikuun mɩrɛ lõfonɔ tɩ̃ɩ, a pɩɛrɔ thɩra, a pɛna lõosɔ na kpaladaasɔ na lõ barãbɩdaasɔ. 7 Dɩ Melatɩaakɛ thɛnɩ Gabaɔ̃ na Yadɔ̃ɔkɛ thɛnɩ Meronɔtɩ fʋrɛ awɩ khu pa a mɩ, na ɩkhaa Gabaɔ̃dara na Mɩsɩpadara. Ʋrɛ dɔnɩ gobanɛr kɛkɛ Efɩratɩ mɩɩr iiro, ɔɔ dɩ gbulona wɩ the. 8 Dɩ Ujɩɛlɩkɛ dʋɔnɩ dɛ phebɩdaar, kɛ dɔnɩ Harayaa bikuun fʋ awɩ khu pa a mɩ. Dɩ Hananɩaakɛ dɔnɩ parfɛ̃ cʋʋdaar fʋ Ujɩɛlɩ khu pa a mɩ. Wɩ dor thɔma le Jerujalɛm a jalna pɩɩr kana gʋʋ pɩɛrnɩ. 9 Dɩ Refayaakɛ dʋɔnɩ kɔ̃tɩn, Jerujalɛm dɩ seer kur bɩɛlla, kɛ dɔnɩ Huurɩ bikuun fʋ awɩ khu pa a mɩ. 10 Dɩ Yedayaakɛ dʋɔnɩ Harumafɩɩ bikuun fʋ welee khu pa kana ɔɔ cɔ pɛnɩ ƴɩɛ a mɩ. Dɩ Hatusɩɩkɛ dʋɔnɩ Hasabɩnɩaa bikuun fʋ Yedayaa khu pa a mɩ. 11 Dɩ Malkɩyaakɛ dʋɔnɩ Harɩmɩ bikuun, na Hasubɩɩkɛ dʋɔnɩ Pahatɩ-Moabɩɩ bikuun gbɛbɩ go gɛl kpɩɩ, a gbɛbɩna cɔ cõcoolnaakɛ dʋɔnɩ cama cʋɔr. 12 Dɩ Halohɛsɩɩ bikuunikɛ n dʋɔnɩ Salum, kɛ dʋɔnɩ Jerujalɛm dɩ gbulõ kur bɩɛlɩ kɔ̃tɩ̃ fʋ awɩ khu pa na ɔɔ bikhɛrsɔ a mɩ. 13 Dɩ Hanun, na Janoadara mɩrɛ lõfonʋɔkɛ wɩ n wenɩ ɓɛlɛ̃ lõfonʋɔ. Wɩ mɩrɛ a pɛr lõosɔ na kpaladaasɔ na lõ barãbɩdaasɔ; sa bir mɩ a dɛbɩrɔ mɛtɛrɛ taamɔy (500), a jalna dana lõfonʋɔɔkɛ wɩ n wenɩ beethɩn lõfonʋɔ. 14 Dɩ Malkɩyaakɛ dʋɔnɩ Rekabɩɩ bikuun, kɛ dʋɔnɩ Bɛtɩ-Hakɛrɛm dɩ gbulõ bɩɛlɩ kɔ̃tɩ̃ mɩrɛ beethɩn lõfonʋɔ. A mɩrɛ, a pɛr lõosɔ na kpaladaasɔ, na lõ barãbɩdaasɔ.

15 Dɩ Salumɩkɛ dʋɔnɩ Kol-Hojee bikuun, kɛ dʋɔnɩ Mɩsɩpa dɩ gbulõ bɩɛlɩ kɔ̃tɩ̃ mɩrɛ lõfonʋɔɔkɛ wɩ n wenɩ ɲɔ bu ka lõfonʋɔ. A mɩrɛ, a thiro, a pɛr lõosɔ na kpaladaasɔ na lõ barãbɩdaasɔ. Dɩ a gbɛbɩrɛ dakha gʋʋkɛ khonǝni ɲɔ tɛ korʋ, jamanaa jɛ phʋ̃ pa khʋra, foo a jalna dana sa paarsɔɔkɛ n gbunǝnɩ Davɩdɩɩ dʋɔ. 16 Dɩ Nehemɩ, kɛ dʋɔnɩ Ajɩbukɩɩ bikuun, kɛ dʋɔnɩ Bɛtɩ-Suur dɩ gbulõ kur bɩɛlɩ kɔ̃tɩ̃ fʋ Salumɩɩ khu pa a mɩ foo a jalna dana kana Davɩdɩɩ ka dʋ pasɔ pɛnɩ ƴɩɛ; a jalnanakɛ a dana ɲɔ tɛ korʋʋkɛ wɩ kpenanɩ ɲɛ̃ɛ, a jalna foo a dana kuun khanaa cɔra. 17 Dɩ Levɩɩ məlsɔɔ fʋ ɔɔ khu pa a mɩ: Rehumɩɩkɛ dʋɔnɩ Banɩɩ bikuun mɩrɛ, dɩ Hasabɩaakɛ dʋɔnɩ Keɩla dɩ gbulõ kur bɩɛlɩ kɔ̃tɩ̃ fʋ Rehumɩɩ khu pa a mɩ ɔɔ dɩ gbulõo irǝ. 18 Dɩ awɩ alãkha Levɩɩ məlsɔ fʋ ɔɔ khu pa a mɩ: Bɩnʋɩ, kɛ dʋɔnɩ Henadadɩɩ bikuun mɩrɛ. Ɔr dʋɔn Keɩla dɩ gbulõ kur bɩɛlɩlee kɔ̃tɩ̃. 19 Dɩ Ejɛɛrɩkɛ dʋɔnɩ Yesuaa bikuun, kɛ dʋɔnɩ Mɩsɩpa dɩ gbulõ bɩɛlɩ kɔ̃tɩ̃ fʋ Bɩnʋɩ khu pa a gbɛbɩ go kpɛlɛ̃ kpɩɩ dakha, kɛ eneni jʋʋn paarɩkɛ wɩ n jʋʋnanɩ koke thɩ̃bi thɩɩn cʋɔraakɛ hanɩ go caan pa khʋra. 20 Dɩ Barukɩɩkɛ dʋɔnɩ Jabaɩɩ bikuun fʋ Ejɛɛrɩ khu pa, a gbuuro yʋʋ na sobɔr a gbɛbɩ go gɛl kpɩɩkɛ thɛnɩ go caan pa khʋra a jalna dana Elɩasɩbɩɩkɛ dʋɔnɩ gbõdaarɩ lõfonɔra. 21 Dɩ Meremɔtɩ fʋ Barukɩɩ khu pa a mɩ. Ɔɔ thɩɩ i n dʋɔn Uriya, sɩ ɔɔ thɩ kɔ̃tɩ̃ɩ i na n do Hakɔsɩ. A gbɛbɩrɛ go gɛl bɩɛlɩkɛ thɛnɩ Elɩasɩbɩ gbõdaarɩ cɔ lõfonɔra, a jalna dana kana Elɩasɩbɩɩ cɔ go khunɩ.

22 Dɩ bonɩ jidaraakɛ thɛnɩ khuirǝsɔ fʋ ɔɔ khu pa a mɩ. 23 Dɩ Bɛ̃jamɛ̃ na Hasubɩ fʋ bonɩ jidaraa khu pa, kana awɩ cɔsɔ pɛnɩ ƴɩɛ a gbɛbɩ. Dɩ Ajarɩa fʋ awɩ khu pa a gbɛbɩ ɔɔ cɔ nɔra. Ɔɔ thɩɩ i n dʋɔn Maseya, sɩ ɔɔ thɩ kɔ̃tɩ̃ɩ i na n do Hananɩa. 24 Dɩ Bɩnʋɩɩkɛ dʋɔnɩ Henadadɩɩ bikuun fʋ Ajarɩaa khu pa a mɩ go kpɛlɛ̃ kpɩɩkɛ thɛnɩ Ajarɩaa cɔ foo a jal dã go cãa paar, kana gʋʋ kɛrnɩ. 25 Dɩ Palal, kɛ dʋɔnɩ Ujaɩɩ bikuun gbɛbɩ go caan pa ƴɛbʋrɔ, na cɔ cõcoolnaa ƴɛbʋrɔ, kɛ yɩranɩ ƴũu jamanaa cɔ nɔra, khaɩ cɔ gbasa nʋɔra. Dɩ Pedayaakɛ dʋɔnɩ Parɔsɩɩ bikuun fʋ Palalɩ khu pa a gbɛbɩ. 26 Dɩ Thãgba fʋɔr cɔ thɔ̃ donaakɛ tɔɔnɩ Ofɛl mɩrɛ a jalna dana lõfonʋɔɔkɛ wɩ n wenɩ ɲɔ lõfonɔ ƴɛbʋrɔ, wi phã pa billo, cɔ cõcoolnana, kana gʋʋ caanɩ. 27 Dɩ Tekoadara gbɛbɩ go kpɛlɛ̃ kpɩɩ Thãgba fʋɔr cɔ thɔ̃ donaa khu pa, kɛ hanɩ cɔ kɔ̃tɩ̃ cõcoolnaa ƴɛbʋrɔ, go cãa paar, a jalna dana Ofɛl gʋʋra. 28 A fʋ lõfonʋɔraakɛ wɩ n wenɩ gãgonaa lõfonɔra, le yʋɔ, bonɩ jidara mɩrɛ wɛr fɛw bɩɛlbɩɛl, ntɛ ɔɔ cɔ ƴɛbʋrɔ. 29 Dɩ Sadɔkɩɩkɛ dʋɔnɩ Ɩmɛɛrɩ bikuun mɩ ɔɔ cɔ ƴɛbʋrɔ, bonɩ jidaraa khu pa. Dɩ Semayaakɛ dʋɔnɩ Sekanɩaa bikuun, kɛ n bɛranɩ lõfonʋɔɔkɛ hanɩ wi phã paar mɩ Sadɔkɩɩ khu pa. 30 Dɩ Hananɩaakɛ dʋɔnɩ Selemɩaa bikuun, na Hanʋnɩkɛ dʋɔnɩ Salafɩɩ maadõ bikuun gbɛbɩ go kpɛlɛ̃ kpɩɩ Semayaa khu pa. Dɩ Mesulamɩkɛ dʋɔnɩ Berekɩaa bikuun gbɛbɩ Salafɩɩ khu pa, kana ɔɔ du pɛnɩ ƴɩɛ. 31 Dɩ Malkɩyaakɛ dʋɔnɩ dɛ phebɩdaar mɩ Mesulamɩ khu pa a jalna dana Thãgba fʋɔr cɔ thɔ̃ donaa cɔra, na ƴaƴabaa cɔra, kɛ hanɩ lõfonʋraakɛ wɩ n wenɩ mɩfɩkadɩ ƴɛbʋrɔ, foo a jalna dana bɛbɛr duurǝǝkɛ hanɩ cɔ cõcoolnana ƴũu, go caan paar. 32 Dɩ dɛ phebɩdara na ƴaƴaba gbɛbɩ kana fɔnɩ bɛbɛr duurǝǝkɛ hanɩ cɔ cõcoolnana ƴũu, go caan paar a jalna dana lõfonʋɔraakɛ wɩ n wenɩ bana lõfonʋɔra.

Lãlaardara ɩɩrnanɛ bãbaranɛ Juifisɔra

33 Ɔbɔɔkɛ Sanebala nɩɛnɩ dɩ sɩ n mɩrɛ gʋʋra, ga daaraa ga, dɩ gba nĩkhii jɔɔ ka; da n maan sɛr Juifisɔ. 34 Dɩ a sor ɔɔ omɩsɔ na Samarɩ sɔrasɛɛ ƴɛra aa: Aɲe Juifisɔ, fãga bɔdaraalera n ka ƴaal wɩ cʋʋ? Sa faa wɛr dɩ wa cʋʋ, wa n jiro bonɩɛ bɛɛ? Wɩ kpɩɛrɛ wa pɩɩrɛ nəǝ bɛ? Wa bire na jaa boka kheekɛ dɔɔ hɩnɩ dɩ thɩlãkobe thiro dɩ ga hana ire bɛɛ? 35 Dɩ Tobɩaakɛ thɛnɩ Amɔ̃ɔ mǝllǝ hale Sanebalaa kɩrɔ; dɩ so dakha aa: Wɩ mɛ bɛɛ! Awɩ boka goole, a tawɩɩ jʋʋnɔ, a na sar na ɓɛl yaa fɛ!

36 Pha! Pɛ nũu yaa asɩ Thãgba, mɔ̃ wɩ n beesɩ sɩnɩ ɓoɓo! Cʋɛ awɩ beesɩra n bir gɩ heen awɩ yʋɔ. Cʋɛ, wɩ phʋʋn wɩ, sɩ wɩ jalna wɩ dɩkhãa paa dʋɔ wɩ do dea. 37 Fa n faa awɩ dɩpa a ha wa', dɩ awɩ sopuu na n pɩɩn afɩ ƴɛbʋrɔa', gɩdonɩ wɩ cʋʋrɛ wɩrɛ n mɛnɩ gʋʋ puure ka.

38 Mɛ̃ sɩ bir a mɩ gʋʋ waa, a mɩ gʋʋra fɛw dɩɩ jʋʋn a mɩɛna jɩ̃jɩɩn, gɩdonɩ tɩbɩla fɛw kɔɔ gbuure thɔmanana yʋʋ na haar fɛw.