4
1 Sɩ nĩkhii fʋrɛ Sanebala na Tobɩa, na wɩrɛ dɔnɩ Arabɩsɔ, na Amɔ̃ɔ mǝlsɔ, na Asɩdɔdɩdara jɔɔ ka, mɔ̃ wɩ nɩɛnɩ dɩ Jerujalɛm go mɩr n jaal bɔɔ na ƴɛbʋrɛ, dɩ go ɓɩɛl paarsɔ dakha mar dɩ ga n sɔbɩlɛ. 2 Dɩ wɩ gʋʋrɛ kha fɛw, sɩ wɩ pɔ wɩ kena Jerujalɛmɩdara, wɩ pɛr ɲaɲaanɛ dɩɩra.3 Sɩ sɩ bɩɛlɛ asɩ Thãgba, sa pɛr bɛbɛra dɩwɩlʋ na dɩtɩnɔ fɛw, wa n bɛr sɩ; dɩɩ do awɩdara dɔ nɔɔ. 4 Sɩrakɛ Judaa məlsɔ n sor aa: Fãga pɩrɛ thɔ̃ dona mɛ̃, sɩ dɩ go kpolo bokanana thʋ̃ der a jɔr ka; sa puno na pɩɩr gʋʋ kaa dɛ! 5 Dɩ asɩ lãlaardara na n so aa sa ja', sa yɩ thɩ̃ɛ dakha ga, sɩ ɩna lʋʋn asɩ thɩ̃thɩɩn ɩnɩ n kʋʋr sɩ, sɩ ɩnɩ n jɩɩl thɔma.
6 Sɩ Juifisɔɔkɛ tɔɔnɩ a khunǝ wɩ, wɩ pɔr ɲɛ̃be yʋɔrsɔ a khe sar puureraakɛ na dananɩ, sa bɩɛl sɩ, sɩ pɔ ɩnɩɩ pa. 7 Gɛr gɩ dɩ̃ pɛr tɩbɩla go khiro, wɔ̃ paarsɔ dɩ wɩ pɩɛr thɩ kʋ̃ɔ, thɩ kʋ̃ɔ, na awɩ bajɩnasɔ na awɩ kpɩlasɔ na awɩ thasɔ. 8 Dɩ mɩ jʋʋrɛ hɩɩn, sa ɩɩr a so tɩɩ kɔ̃tɩnana na dʋɔ kɔ̃tɩnana na juifi wɩrɛra sɛnɩ, mɩɩ: Na n ma waa dɛ! Nɩ jɛna Kɔ̃tɩnɩkɛ wabɩnɛnɩ, da n kʋ maar, sa kɛ kʋʋr a pɛ anɩ omɩsɔra na anɩ bikũusɔra na anɩ bikhɛrsɔra na anɩ khɛrsɔra na anɩ cɔsɔra.
Nehemɩ gbɛbɩrɛ thɔ̃ dona koke gbɛbɩrɛ
9 Ɔbɔɔkɛ asɩ lãlaardara nɩɛnɩ dɩ wɩ khe sarɛ, na mɔ̃ wɩ jɩnɩ, dɩ Thãgba kʋɛrɛ awɩ thɔ̃, sɩ bire kɛr go mɩ paar fɛw, ntɛ ɔɔ thɔmana. 10 Sɩ a fʋna dawiile, ɩ̃ thɔ̃ donasɔra, dakuru n dʋɔn thɔma, sɩ dakuruule fʋrɔ awɩ ɲɔ̃kɔɔ kpɩlasɔ na tomɩ phidaasɔ na thaasɔ na kũkũ kɛɛ thɛsɔ. Dɩ kɔ̃tɩna hale dakha sɩkaara dɩ wa n hɩɩn Juda dʋɔdara fɛw. 11 Wɩrɛ n mɛnɩ gʋʋ na wɩrɛ dʋɔnɩ hẽeda gbana, agɩbo wɩrɛ n ɓa wɩnɩ hẽedaasɔ, ɲɔ̃ bɩɛl wɩ n dona thɔma, sa fʋrɔ koke thɩ̃ɛ na ʋ̃ʋ ɲɔ̃. 12 Wɩrɛ n mɛnɩ hananɛ bajɩna, wɛr fɛw bɩɛlbɩɛl a saa kpɩ̃kpaana, sɩ dɩ wa n do thɔma. Dɩ ʋrɛ na ʋnanɩ tutuu hale ɩ̃ gɛllɔ a jɩɩl. 13 Dɩ mɩ sor dʋɔ kɔ̃tɩnana na tɩɩ kɔ̃tɩnana na tibil wɩrɛra sɛnɩ, mɩɩ: Thɔma jɔrɛ ka, a phɩ̃ ba, dɩ sɩ bɩ̃bɩlã dɩɩdɩɩ a ha gʋʋra ƴũu; sɩ hʋnɔnɛ kha bɩɛlbɩɛl. 14 Dɩ ado nɩ nɩɛ dɩ wɩ ʋ̃ tutuu, kãakɛ nɩ hanɩnakɛ, nɩ kpa ɩna asɩ pa a gbɛba kha. Asɩ Thãgba na ker a na pɛ sar. 15 Thalera sɩ n jalna thɔma; dakuru asɩ too thɩ̃thɩɩn, kpɩlala wɩ n fʋrɔ ɲɔ̃kɔɔ, a fʋna bɔɔkɛ wire n thɔɔnɩ phãa, foo a dana ƴepǝlǝ̃bi phã bɔɔ. 16 Dɩ ga bɔɔlera, mɩ sor tɩbɩlala wo, mɩɩ: Ntɛ na ɔɔ thɔ̃daar na n cɔ kɛ Jerujalɛm bɩnɔ. Sa n bɛra dɩtɩnɔ, sɩ dɩwɩllɔ, sa n do thɔma. 17 Mɛrɛ, na ɩ̃ omɩsɔ, na ɩ̃ thɔ̃dara na konaakɛ dɔnɩ bɛbɛraakɛ n kpaanɛ marnɩ, sa n fʋʋr asɩ thɔ̃do kẽkẽsɔa', ntɛ n hananɛ ɔɔ koke thɩ̃sɔ dɩbara na ɲʋɔn.