Nehemɩ naarɛ ɔɔ too fɩl gõgolõ
5
1 Bɔ bɩɛlla, asɩ too, kona na awɩ khɛrsɔ mar dɩ wa n huo jɔɔ ka awɩ omɩsɔraakɛ dɔnɩ Juifisɔ. 2 Ɩkhasɔ na n so aa: Sɛrɛ, na asɩ bikũusɔ na asɩ bikhɛrsɔ, sɩ jɔrɛ ka; sɩ n ƴaalɛ dikor sa n kho, sɩ puno sɩ hana yire. 3 Dɩ wɛ na n so aa: Asɩ lɛsɔ na asɩ dɩvɛ̃ thɩr lɛsɔ na asɩ cɔsɔ sɩ n gba a 'laa kɔmɛr bɔɔ, sɩ dɩ sɩ 'lɛ dikor. 4 Dɩ ɩkhasɔ wo na n so aa: Asɩ lɛsɔ na asɩ dɩvɛ̃ thɩr lɛsɔra sɩ n 'laa, sa pemɩ mũsumo a na lɩmɩ jamanaa lãpho. 5 Sɩrakɛ ca bɩɛlla sɩ do na asɩ omɩsɔɔlera; mɔ̃ awɩ bikũusɔ hanɩ, mɛna asɩ bikũusɔ ha; sɩ dɩ sɩ gba asɩ bikũusɔ na asɩ bikhɛrsɔ wer dɩ sa n to dee dʋʋra. Dɩrakɛ asɩ bikhɛrsɔra, jɔjʋɔ 'lire dʋʋr dea pɩ, sa hana ka pa kpɩɩ bã, gɩdonɩ asɩ lɛsɔ, na asɩ dɩvɛ̃ lɛsɔ fɛw, tɩɩ kpɩɩsɔ hɩna.6 Ɔbɔɔkɛ mɩ nɩɛnɩ awɩ huo, na ga thɩmɩɩsɔɔle pɩ, nĩkhii fʋ mɛr jɔɔ ka. 7 Dɩ mɩ gbaar kpɩɛrɛ ɩ̃ phaan wɩrɛ dʋɔnɩ tɩɩ kɔ̃tɩna na dʋɔ kɔ̃tɩna, a so war mɩɩ: Mɔ̃ ka gɩ! Nɩ n pemine anɩ omɩsɔ thɩ̃ɛ dɩ na n dɛɛnɔ khor ya! Dɩ mɩ pɛr gbɛbɩ kha kɔ̃tɩ̃ɩ awɩdara. 8 Dɩ mɩ so warɛ, mɩɩ: Sɩ kɔɔ dor bʋɔ, mɔ̃ asɩ puno hanɩ a birse asɩ omɩ Juifisɔɔkɛ wɩ dolonɩ ca kpɩɩsɔra dɩ wɩ do dea. Dɩ nɛrɛ thɛthɛ bir dɩ na n dolõ wɩ gɩrɛ wo asɩ harara bɛɛ! Dɩ wɩ pɩr, wa yɩ thɩ̃ɛ a na birsǝ'. 9 Dɩ̃ɩ bir so, mɩɩ: Gɩrɛ nɩ n cʋʋnɩ, ga bɔra'. Ga do asɩ Thãgba maara nɩ teena na n ɩrɛ, gɩ do nɔɔ ca kpɩɩsɔɔkɛ dʋɔnɩ asɩ lãlaardara na n pɛ nar yicuruǝǝ gaa? 10 Mɛrɛ dakha na ɩ̃ omɩsɔ, na ɩ̃ thɔ̃dara, sɩ kɔɔ pemɩ wer mũsumo na dikor. Nɛnɛ̃, mɩ n bɩɛl nɛr, sɩ faa helula a hana wɩ. 11 Nɩ birsene nĩkɛra awɩ lɛsɔ na awɩ dɩvɛ̃ thɩr lɛsɔ na awɩ olɩvɩ thɩr lɛsɔ na awɩ cɔsɔ a hana wɩ. Nɩ faa khorɩkɛ nɩ kɔɔ yɩnɩ wɩ dɛɛnɔ mũsumonǝ na dikora na dɩvɛ̃ ta phaara na niinǝ, kɛ nɩ kɔɔ pemi wɩnɩ a hana wɩ. 12 Dɩ wɩ sor aa: Sa birsere a na ha wɩ, sɩ sa ƴaal war thɩ̃ɛa'; sa cʋʋrɛ mɔna fɩ sonɩ. Dɩ̃ɩ we bonɩ jidara dɩ wɩ pɔ, dɩ wɩ ʋlfɛrɛ awɩ ƴɛbʋrɔ, aa ɩna cʋʋrɛ mɔna ɩnɩ sonɩ. 13 Dɩ mɩ jɛjɛɛrɛ ɩ̃ kẽkẽ nɔ sa so, mɩɩ: Thãgba n jɛjɛɛnɛ ɔmɛ̃ tibil wo tibilikɛ na fʋɔnɩ ɔɔ nɔ ka thɩmɩa', a 'lee ɔɔ cɔ na ɔɔ thɩ̃. Wɩ jɛjɛɛnɛ ntɛ thale a too dakhɩɩ. Dɩ tɩbɩla fɛw tu aa: Amɛn! Sa khɩɩ Thãgba Kɔ̃tɩn. Dɩ tɩbɩla fʋrɛ awɩ nɔ thɩmɩɩ oti.
14 A fʋna wireekɛ jamana pɛ marnɩ ɩ̃ dɔ awɩ gobanɛr Juda bǝǝnnǝ, Artajɛɛrsɛsɩ donɩ jamana, ɔɔ yɛna kpelena a dana ɔɔ yɛna kpelẽ yʋɔr yeɲɔra, gɩ har yɛna yʋɔr yeɲɔ, sɩ mɛrɛ na ɩ̃ omɩsɔ, sa tee kakorɩkɛ teananɩ wɩ hana gobanɛr, dɩɩ haan sa'. 15 Caca gobanɛrsɔɔkɛ kɔɔ kʋlɛ mɩnɩ ƴɩɛ n kɔɔ khɔɔrɛ tɩbɩla ka. Wɩ n tee warɛ dɩkɔ na dɩvɛ̃, a teenanakɛ sikile mũsũ be kpalaɲɔ a na ɓanɔ. Awɩ thɔ̃dararakɛ n khor fãga tɩbɩlala ga do kpãkpalã ga. Sɩ mɛrɛ, ma kɔɔ cʋʋ thɩ̃ɛ thala', dɩɩ do Thãgba maar dɔ kɩrʋ. 16 Sɩ mɛrɛɛ thɛthɛ ka dor thɔma go mɩraakɛ, sɩ sa therakɛ lɛ bɩɛlla'; dɩ ɩ̃ thɔ̃dara fɛw gbɛbɩrɛ a hakɛ thɔmana. 17 Dɩ tɩbɩlaakɛ n khɔnɩ dikor ɩ̃ pa, kɛ dɔnɩ Juifisɔ na dʋɔ kɔ̃tɩna, wɩ har kona tamaa na kpalaɲɔ yʋɔr (150), sɩ ɩkha hale a ɓanɔ dɩ wɩ ɩ̃ sar, a the ca kpɩɩsɔraakɛ khonǝ sɩnɩ. 18 Wire fɛw wɩ n kʋrɛ na bɩɛl na bana bɔy maadõ, na yɔlɔsɔ. Dɩ wire yʋɔrra fɛw wɩ n cʋʋrɛ dɩvɛ̃ fɛw, mɔ̃ gɩ teenanɩ. Sɩ narakɛ gele fɛw, ma kɔɔ lʋʋr kakorɩkɛ teananɩ wɩ hana gobanɛra', gɩdonɩ thɔma kɔɔ dʋbɩrɛ tɩbɩlala jɔɔ ka.
19 Ɩ̃ Thãgba wei, jɛna mɩ, a cʋɛ mɩ bɔɔ, gɩ do gɩrɛ fɛʋʋkɛ mɩ cʋʋnɩ tɩbɩlalaakɛ dɔ kɩrʋ!