Lãlaardara ɩɩrnanɛ fɩɩlɛ wo Nehemɩna
6
1 Ɔbɔɔkɛ Sanebala na Tobɩa na Gesɛmɩkɛ thɛnɩ Arabɩ dɩɩra, na asɩ lãlaardara wɩrɛ sɛnɩ nɩɛnɩ dɩɩ do mɩ bire mɩ gʋʋ, dɩ go ɓɩɛl paarsɔ na hale 'lo bã; sɩ ga bɔɔle, ma kɔɔ pɛr lõo pɩraka'. 2 Sanebala na Gesɛm thʋ̃ɔ a so mar, aa, ɩ̃ pɔ sɩ caan kha Kefɩrɩm dɩ ʋkha bɩɛlla, Ono ɓɛlɛnɔ sɩ yɩ kha. Jaa wɩ n kɔɔ ƴaalɛ wɩ cʋʋ mɩ puure. 3 Dɩ mɩ thɔ̃ warɛ thɔ̃thɔna, a ha wɩ tuur mɩɩ: Mɩ hananɛ thɔma jɔɔ dɩ ma n cʋʋ; ma puno a na pɔa'. Aɲe dɔ kɩrʋ dɩ ma pɔ anɩ pa, sɩ na faa thɔma dɩ ga jɩɩl? 4 Dɩ wɩ thɔna marɛ thɩmɩɩ ca bɩɛlla balanã, dɩ̃ ha wɩ tuur bɩɛlla. 5 Dɩ balamɔɩdaara, Sanebala thɔna marɛ ɔɔ thɔ̃daar na thɩmɩɩ bɩɛlɩlera. Dɩ a fʋrɔrɛ lɛtɛrɛɛkɛ khɛranɩ ɲɔ̃kɔɔ. 6 Dɩ gɩ kherere lɛtɛrɛrara aa: Wɩ n hũhuune ca kpɩɩsɔɔ thɩ̃thɩɩn, dɩ Gesɛm so mɛna aa, fɛrɛ na Juifisɔ, nɩ n ƴaalɛ nɩ ɩɩrna lãʋ; aa gɛr dɔ kɩrʋ dɩ fɩ bir, dɩ fa n mɩ gʋʋ. Wɩ yɩ aa, fɩ n ƴaalɛ fɩ do awɩ jamana. 7 Aa fɩ phiire Thãgbaa mɩmɩɩsɔɔrakɛ pɩ a pɛr wɩ hulene Jerujalɛm a sɔ: Jamana hakɛ Juda bǝənnǝ! Dɩ nɛnɛ̃, hũhuun caarɩle na daan jamana dɛ. Gɛr gɩ, ɩna sɩ mɩɩ kha. 8 Dɩ mɩ thɔnanɛ tuur a sʋʋraa, mɩɩ: Hũhuun dɔɔle fɩ n mɩɩnɩ na do sobɔra'. Fɛr te gɩ afɩ thɛthɛɛ kpɩɛra. 9 Tɩbɩlaale fɛw n ƴaalɛ wɩ cʋʋ sɩ maar n fʋ sɩ. Wɩ n kɔɔ kpɩɛrɛ ɲɛ̃ɛ na khiir ser, gɩ do nɔɔ thɔma na cʋa'.Nɛnɛ̃ɛkɛ, Thãgba wei, hana mɩ fãga!
10 Dɩ mɩ gbaar jal Delayaa bikuunɩkɛ wɩ n wenɩ Semayaa cɔ; ɔɔ thɩ kɔ̃tɩ̃ɩ i n dʋɔn Metabeyɛl. Dɩ a kɔɔ hale a khãa ɔɔbarara. Dɩ a so marɛ aa: Sɩ jala Thãgbaa cɔ, a lona Thãgba fʋɔr cɔ thɩ̃thɩ̃ bɩnɔ, sa khaanɛ Thãgba fʋɔr cɔ lõosɔ, a mɛ̃ ga, wa ɩnɛ a na kʋ fɩ; dɩtɩnɔ wa ɩ̃ a na kʋ fɩ. 11 Dɩ mɩ birseere, mɩɩ: Kuun n ho mɛrkɛ sɩ a ca mɔ̃kɛ! Dɩrakɛ tibil ʋmɔ̃ mɛrkɛɛ kha na lona Thãgba fʋɔr cʋɔrɔ sɩ a na hana yire? Ma lõ la'. 12 Mɩ jɩrɛ dɩ ga do Thãgba thɔnaa ga; sɩ bobon thɩmɩaale a mɩɩ marnɩ, Sanebala na Tobɩa hanaa mũsumo, sɩ a mɩa. 13 Wɩ haarɛ mũsumo thale, a kpɩɛr maar na fʋ mɛr ɩ̃ kpaan ɔɔ fɩlla; gɩ do sopuu mɩ cʋʋ; dɩ mɛ̃ wa yɩ hʋɛ a na mɩɩ dapuu wa n pɛ mar, wɩ kʋɛ mɩ ire.
14 Ɩ̃ Thãgba wei, jɛna gɩrɛ Tobɩa na Sanebala cʋʋnɩ, na Noadɩaakɛ dʋɔnɩ khɛr bobon dakha, na bobon kpɩɩsɔɔkɛ n ƴaalɛnɩ wɩ cʋʋ mɩ maar n fʋ mɩ.
Wɩ mɩrɛ Jerujalɛm gʋʋ pɩ
15 Wɩ mɩrɛ gʋʋ a pɩ Elula sɩporɩ wire kpelẽ yemɔɩra. Wire kpalaɲɔ yʋɔr yeɲɔ thɔma cʋʋ fɛw, sa pɩɩr. 16 Ɔbɔɔkɛ asɩ lãlaardara fɛw, na ca kpɩɩsɔɔkɛ fɛw diǝ sarnɩ nɩɛnɩ dɩ gʋʋ mɩrɛ pɩ, maar fʋlɛ wɛr, dɩ yicur kɔ̃tɩ̃ɩ fʋlɛ wɩ awɩbara, gɩdonɩ wɩ jɩrɛ dɩɩ do Thãgba tuurǝ thɔmaale cʋʋ.
17 Ga bɔsɔɔlee thɩ̃thɩɩna, Juda tɩɩ kɔ̃tɩna haleekɛ n kherenenɩ lɛtɛrɛsɔ bɔɔ fɛw Tobɩara, dɩ Tobɩaadasɔ dakha na n pɔ war. 18 Jɔjʋɔ hale Juda bǝǝnnǝ, kɛ wɩ n mananɩ kha dɩɩ the mɔ̃ wɩ ʋlfɛnɩ kha, gɩdonɩ Araa bikuunɩkɛ n dʋɔnɩ Sekanɩaa thɛɛ gɩ; dɩ ɔɔ bikuun Yohana dakha he Berekɩaa bikuunɩkɛ n dʋɔnɩ Mesulamɩ bikhɛr. 19 Dɩ wɩ n mɩɩrɛrakɛ ɔɔ dabɔ ɩ̃ ƴɛra, dɩ wɩ jalna ɩ̃ thɩmɩɩsɔ a na mɩgʋʋ. Dɩ Tobɩa n thɔna lɛtɛrɛsɔ, ɩnɩ n cʋʋ mɩ maar n fʋ mɩ.